Read Batak Simalungun LUKAS 10 Bible Online

LUKAS 10 - Batak Simalungun bible

LUKAS 10

¹Dob salpu ai ipilih Tuhan Jesus ope pitu puluh halak nari, anjaha isuruh ma sidea mardua-dua gabe parlobei-Ni hubani ganup huta ampa ianan, na sihol siparayakon-Ni. [132]

²Ihatahon do bani sidea, “Bolag do namin sabion, tapi otik do siparhorja. Ai pe pindo hanima ma bani Simada sisabion in, ase isuruh siparhorja bani sisabion-Ni in. [133]

³Laho ma hanima. Songon biribiri do hanima Husuruh hu tongah-tongah ni begu.

⁴Ulang boan hanima parduitan, barang tas, barang sipatu; anjaha ulang tabi hanima halak i tongah dalan. [134]

⁵Laho masuk hu sada rumah, parlobei ma hatahon hanima, ʻDamei ma bani nasiam i rumah on!ʼ

⁶Anjaha anggo adong ijai anak hadameion, sogop ma bani dameinima; tapi anggo seng dong, mulak ma ai bennima.

⁷I rumah ai ma hanima tondok, mangan anjaha inum hanima ma humbani na adong bani sidea, ai patut do dapotan upah siparhorja; ulang ma mosor-osor tondokannima. [135]

⁸Anggo masuk hanima bani sada huta, anjaha ijalo do hanima, pangan hanima ma na niidangkon bennima.

⁹Pamalum hanima ma na boritan, na adong ijai, anjaha hatahon hanima ma bani sidea, ʻDomma dohor Harajaon ni Naibata bani nasiam!ʼ

¹⁰Tapi anggo imasuki hanima sada huta, hape seng ijalo sidea hanima, laho ma hanima hu alaman ni sidea, anjaha hatahon hanima ma,

¹¹ʻAge orbuk ni huta nasiam on, na longkot bani naheinami, ipirpirhon hanami ma mulak bani nasiam; tapi botoh nasiam ma, domma dohor parroh ni Harajaon ni Naibata.ʼ

¹²Huhatahon ma bannima: Hampungan do sitaronon ni Sodom bani ari ai marimbang sitaronon ni huta sisonai.” Bursik-bursik Bani Huta na So Ra Paubahkon Uhur

¹³“Bursik ma ho Korasin. Bursik ma ho Betsaida! Ai ambit i huta Tirus ampa Sidon ipamasa hagogohon, na dob pinamasa bannima, girah do paubahon ni sidea uhur ni sidea, marhiou guni, hundul bani orbuk. [136]

¹⁴Ase hampungan do sitaronon ni Tirus ampa Sidon bani ari uhum ai, marimbang sitarononnima.

¹⁵Anjaha ho Kapernaum, ai sipagijangon do ho ronsi langit? Sidabuhkononkon do ho das hu nagori toruh!

¹⁶Na manangihon hanima, Ahu do tinangihonni, anjaha na manulak hanima, Ahu do tinulakni; tapi na manulak Ahu, na marsuruh Ahu do tinulakni ijai.” [137]

¹⁷Ibagas malas ni uhur do mulak sipitu puluh halak ai, nini sidea ma, “Tuhan, tunduk do age setan-setan bannami halani goran-Mu.”

¹⁸Tapi nini ma dompak sidea, “Huidah do sibolis in madabuh hun langit songon hilap. [138]

¹⁹Tonggor ma, domma Hubere bannima kuasa mandogei ulog ampa gansip golang, sonai kuasa manlawan sagala hagogohon ni munsuh in; anjaha seng tarkahua sidea hanima. [139]

²⁰Tapi ulang ma malas uhurnima, halani tunduk setan-setan ai bannima, tapi malas ma uhurnima, halani domma tarsurat gorannima i nagori atas.” [140]

²¹Anjaha bani panorang ai marolob-olob ma Ia ibagas Tonduy Na Pansing, nini ma, “Hupuji Ham Bapa, Tuhan sigomgom nagori atas ampa tanoh on, halani iponopkon Ham do in humbani halak na pentar ampa na maruhur, hape ipatalar Ham do in hubani na saluju maruhur. Eak Bapa, sonin do iharosuhkon uhur-Mu.”

²²Haganupan do iondoskon Bapa Bangku, anjaha seng dong na mananda Anak in, sobali Bapa in, anjaha Bapa in pe, seng dong na manandasi sobali Anak in, ambah ni ai na pinodahan ni Anak in mangihutkon rosuh ni uhur-Ni.”

²³Dob ai idompakkon ma pulin susian-Ni ai, nini ma, “Martuah ma mata na mangidah na nididahnima. [141]

²⁴Ai Huhatahon ma bannima: Buei do nabi-nabi ampa raja-raja, na masihol mangidah na nididahnima, hape seng ididah, anjaha na sihol mambogei na dob binogeinima, hape seng ibogei.” [142]

²⁵Dob ai jongjong ma sada sibotoh titah manlajou-Si, nini ma, “Guru, aha do sibahenonku, ase tartean ahu hagoluhan sisadokah ni dokahni?” [143]

²⁶Gabe nini Jesus ma hu bani, “Aha do tarsurat bani titah in? Sonaha do ibasa ham?”

²⁷Jadi nini mambalosi, “Maningon haholonganmu do Tuhan Naibatamu humbani putih ni atei-ateimu, humbani gok ni tonduymu, humbani bois ni gogohmu ampa humbani gok ni uhurmu, anjaha hasomanmin songon dirimu!” [144]

²⁸Dob ai nini ma hu bani, “Sintong do balosmu in; bahen ham ma sonai, gabe manggoluh ma ham!” [145]

²⁹Tapi sihol do pintoranni dirini, gabe nini ma dompak Jesus, “Ai ise do goranon hasomanku?”

³⁰Jadi nini Jesus ma mambalosi, “Adong ma sada halak tuad hun Jerusalem, laho hu huta Jeriko, gabe isamun panamun ma ia. Irampas sidea do ia, ibalbali, dob ai laho, itadingkon ia tarhatos.

³¹Tudu ma mamontas sada malim hun dalan ai, ididah do ia, tapi ilaosi do.

³²Sonai homa sada halak Lepi, das do bani ianan ai, ididah do ia, tapi ilaosi do homa.

³³Tapi mamontas ma hunjai sada halak Samaria; dob ididah ia, idop ma uhurni bani,

³⁴idohori ma ia, ibaluti ma ugahni ai, anjaha idaisi ma ai bani minak ampa anggur. Dob ai ipahundul ma ia bani halodeni sandiri, iboan ma ia hu parbornginan, lanjar ipatorsa-torsa.

³⁵Patarni ai ibuat ma dua dinar, ibere ma ai bani simada rumah ai, anjaha nini ma, “Patorsa-torsa ham ma ia, anjaha anggo lobih hunjon harugianmu, hugalari pe sanggah mulak ahu.”

³⁶Ise do humbani sitolu halak ai, hasoman bani na tarsamun ai, ninuhurmu?”

³⁷Jadi nini ma, “Na maridop ni uhur bani.” Gabe nini Jesus ma hu bani, “Laho ma ham, bahen ma sonai!”

³⁸Sanggah na mardalani sidea, masuk ma Jesus hubagas sada huta, anjaha dong ma ijai sada naboru, na margoran si Marta, na manjalosi hu rumahni. [146]

³⁹Ia anggini na margoran si Maria hundul-hundul do i lobei ni Tuhan in manangihon hata-Ni,

⁴⁰tapi anggo si Marta, hosei tumang do marugas. Jadi ipadohor ma bani Jesus anjaha nini ma, “Tuhan, ai lang ididah Ham, na ipaturut anggingkin do sahalak ahu marugasi? Hatahon Ham ma ia mangurupi ahu!”

⁴¹Jadi nini Tuhan in ma mambalosisi, “Marta! Marta! Buei do isarihon anjaha isunsahkon uhurmu!

⁴² Sada do na porlu! Ipilih si Maria do rupei sidearan, seng sibuaton ai hun bani.” [147]