Read Batak Simalungun LUKAS 14 Bible Online

LUKAS 14 - Batak Simalungun bible

LUKAS 14

¹Jadi masa ma, sanggah na masuk Ia hu rumah ni sada halak sintua ni Parisei bani ari Sabat, laho mangan domma ijai sidea manggompangi-Si. [189]

²Jadi adong ma ijai, i lobei-Ni, sada halak na busungon.

³Jadi nini Jesus ma manungkun sibotoh titah ampa Parisei ai, “Ai bulih do pamalumon naborit bani ari Sabat atap lang?”

⁴Tapi sip do anggo sidea. Jadi ijamah ma halak ai, ipamalum ma, lanjar isuruh ma mulak.

⁵Anjaha nini ma hubani sidea, “Ise humbani nasiam, anggo tarrobung hubagas parigi halode atap lombu nasiam, ai lang mintor itarik nasiam do ai hu atas, age bani ari Sabat?” [190]

⁶Tapi seng tarbalosi sidea hata-Ni ai.

⁷Dob ai ihatahon ma sada limbaga bani na nidilo ai, halani ididah mamilihi ianan situnggungan sidea. Nini ma dompak sidea, [191]

⁸“Anggo idilo ham hu pesta parunjukan, ulang ma hundul ham bani hundulan ianan sisangapan, atap adong niontangni sangapan hun bamu,

⁹gabe roh holi suhut ai, na mangontang ham ampa ia, mangkatahon bamu, ʻBani ma ianan in!ʼ Jadi maila ma ham hundul bani ianan sitoruhan.

¹⁰Tapi anggo hona ontang ham, laho anjaha hundul ma ham bani ianan sitoruhan, ase anggo roh na mangontang ham ai, mangkatahon bamu, ʻHu ataskon ma ham hundul!ʼ Jadi sangap ma ham idahon ni ganup hasomanmu na niontang ai.

¹¹ Ai sagala na pagijang dirini, patoruhon do, tapi na patoruh dirini, sipagijangon do.”

¹²Ihatahon ma homa hubani na mangontang-Si ai, “Anggo ibahen ham pesta-pesta sanggah arian atap bodari, ulang ma dilo ham huan-huan atap saninamu, hade-hade atap parhutamu na bayak-bayak, ase ulang idilo sidea use ham, gabe ibalas ai use bamu.

¹³Tapi anggo mambahen pesta-pesta ham, dilo ham ma na masombuh, na marsining, na repat ampa na mapitung. [192]

¹⁴Gabe martuah ma ham, ai seng tarbalos sidea ai bamu, tapi marbalos do ai bamu bani parpuhoon ni halak parpintor.” [193]

¹⁵Sada humbani na mangan ai, dob ibogei ai, nini ma hu Bani, “Martuah ma na mangan i Harajaon ni Naibata!” [194]

¹⁶Jadi nini Jesus ma mambalosi, “Adong ma sada halak na marpesta banggal; buei do iontang hujai.

¹⁷Jadi bani mata ni pesta ai isuruh ma juakjuakni mangkatahon bani na dob niontangni ai, ʻRoh ma nasiam, ai domma sirsir haganup!ʼ

¹⁸Tapi adong bei do sidalian ni sidea haganup. Nini na parlobei ai ma hu bani, ʻBaru mamboli juma do ahu, maningon laho do ahu manorih ai. Ulang pala sonaha uhurmu!ʼ

¹⁹Na legan mangkatahon, ʻBaru mamboli horbou do ahu lima pasang; laho ma ahu mamareksa ai. Ulang pala sonaha uhurmu!ʼ

²⁰Na legan use mangkatahon, ʻBaru mambuat boru ope ahu, halani ai seng tarbahen ahu roh.ʼ

²¹Dob mulak juakjuak ai, ipatugah ma ai bani tuanni ai. Jadi marah ma tuan ai, ihatahon ma bani juakjuakni ai, ʻLaho ma ho podas hu pasar ampa hu dalan na i huta on, arahkon ma halak na masombuh, na marsining, na mapitung ampa na repat.ʼ

²²Jadi, dob mulak, nini juakjuak ai ma, ʻDomma saud na hinatahonmu ai, ale tuannami, tapi lumbang ope.ʼ

²³Jadi ihatahon tuan ai ma bani juakjuak ai, ʻLaho ma ho hu darat bani dalan na bolon ampa topi ni dalan, gogohkon ma sidea masuk ase gok rumahku!ʼ

²⁴Tapi huhatahon ma bennima, ʻSahalak pe lang humbani na niontang hinan bulih mandai sipanganon na hupasirsir in.ʼ ”

²⁵Sahali sanggah buei jolma mardalan mangirikkon-Si, jadi marhusor ma Ia mandompakkon sidea, lanjar nini ma,

²⁶“Barang ise na roh hu Bangku, seng tarbahensi gabe susian-Ku, anggo seng sogam uhurni bani bapani, inangni, parinangonni, niombahni, saninani, botouni ronsi hosahni sandiri. [195]

²⁷Seng tarbahen gabe susian-Ku halak na so mamorsan silangni, laho mangirikkon Ahu! [196]

²⁸Ise ma humbani nasiam na sihol pajongjong sada menara, na so hundul lobei mangetong na porlu hujai, atap na sungkup do laho mandobkon horja ai?

²⁹Ase ulang holi, anggo domma ipauli onjolanni, hape seng tuk gogohni mandobkon, gabe igora-gora halak na mangidah ai ia.

³⁰Nini sidea hu bani, ʻIpungkah halak on do pajongjongkon, hape seng tardobkonsi.ʼ

³¹Atap raja ja ma, na laho marporang pakon raja na legan, na so parlobei hundul marpingkir-pingkir, atap na tardompakkonsi do marhasoman salaksa tentara imbangni ai, na roh mandorabsi marhasoman dua laksa?

³²Tapi anggo seng tarbahensi, tontu suruhonni do suruhan mangindo pardameian, sanggah daoh ope munsuh ai.

³³Nasiam pe, seng tarbahen atap ise pe humbani nasiam gabe susian-Ku, anggo seng tartadingkonsi haganup na dong bani.

³⁴Na marguna do garam, tapi anggo mambar daini, aha ma bahenon paporadkon ai?

³⁵Seng marguna ai hu juma atap bahen napu, siambukkonon mando ai. Barang ise na marpinggol, na marpanangar, itangihon ma ai.”