Read Batak Simalungun LUKAS 15 Bible Online

LUKAS 15 - Batak Simalungun bible

LUKAS 15

¹Somal do sijalo sohei ampa sipardousa roh hun dohor hu Bani, laho manangar hata-Ni.

²Jadi marungut-ungut ma halak Parisei ampa sibotoh surat, nini sidea ma, “Ijalo on do sipardousa anjaha rap mangan do Ia pakon sidea.”

³Gabe ihatahon Jesus ma limbaga on bani sidea,

⁴“Ise ma humbani nasiam sahalak parbiribiri saratus, anggo magou sada hunjai, na so manadingkon na siah puluh siah nari ai i parmahanan, laho mangindahi na so taridah ai, ronsi na jumpahsi ai? [197]

⁵Anjaha dob jumpahsi, itampeihon ma ai bani abarani halani malas ni uhurni.

⁶Daskonsi ia hu rumahni, idilo ma martumpu huan-huanni ampa romban rumahni, nini ma bani sidea, ʻMarmalas ni uhur ma nasiam rap pakon ahu, halani jumpah ahu do biribiringku na magou ai.ʼ

⁷Huhatahon ma bani nasiam, usih hujai, buenan do malas ni uhur i nagori atas mangidah sada pardousa, na ra paubahkon uhurni, ase mangidah siah puluh siah parpintor, na so pala paubahkon uhur ni sidea.”

⁸“Atap dong do nani naboru siparduit sapuluh rupiah, anggo magou sada hunjai, na so pagarahon palita, anjaha manapui rumahni, laho mangindahi duitni na magou ai, paima jumpahsi ai?

⁹Anjaha dob jumpahsi, idilo ma martumpu huan-huanni ampa romban rumahni, nini ma, ʻMarmalas ni uhur ma nasiam rap pakon ahu, ai domma jumpah ahu duitku na magou ai.ʼ

¹⁰Huhatahon ma bani nasiam, usih hujai do masa malas ni uhur i lobei ni malekat ni Naibata mangidah sahalak sipardousa, na paubahkon uhurni.” [198]

¹¹Dob ai nini ma use, “Adong ma dua anak ni sada halak.

¹²Gabe ihatahon sianggian ai ma dompak bapani ai, ʻBapa, bere ham ma bangku humbani arta in, na sahira parbagiananku.ʼ Jadi ibagihon ma artani ai bani sidea.

¹³Anjaha seng pala piga ari i pudi ni ai, ipatumpu sianggian ai ma haganup parbagiananni ai, dob ai laho ma ia hu nagori na daoh, anjaha ijai ma iparbois-bois artani ai marhitei goluh na so marrantei.

¹⁴Dob iboiskon haganupan ai, masa ma lohei maningting i nagori ai, anjaha ia pe mulai ma marhahurangan.

¹⁵Jadi laho ma ia tondok bani sada halak parnagori ai, gabe isuruh ma ia marmahan babuy hu jumani.

¹⁶Ipindo uhurni do manggoki boltokni bani hulit-kulit ni indahan ni babuy ai, tapi seng dong na mamberesi bani. [199]

¹⁷Jadi ipaulak ma uhurni hubagas, nini ma, buei ni in gajian ni bapa, na marlobih-lobih bani sipanganon, hape ahu, matei gayuran do ijon.

¹⁸Misir mando ahu marayak bapa, huhatahon ma hu bani, ʻHam bapa, domma mardousa ahu hu nagori atas ampa bamu. [200]

¹⁹Seng talup be ahu goranon anakmu, bahen ham ma ahu songon sada halak gajian bamu.ʼ

²⁰Jadi misir ma ia marayak bapani ai. Tapi daoh ope ia, domma itatap bapani ai ia, gabe maidop ma uhurni; marlintun ma ia manjumpahkonsi, irohop ma ia anjaha isummah.

²¹Marsahap ma anak ai bani, ʻHam bapa, domma mardousa ahu hu nagori atas ampa hu bamu, seng talup be goranon ahu anakmu!ʼ

²²Tapi nini bapa ai ma dompak jabolonni, ʻBoan hanima ma pakeian sijengesan, anjaha pakeihon hanima ma ai bani! Bahen hanima ma sada tintin bani jari-jarini ampa sipatu bani naheini!

²³Alop hanima ma anak ni lombu na pinamombur ai, anjaha sayat ma, ase mangan hita anjaha marmalas ni uhur.

²⁴ Ai na dob matei do anakkon gabe mulak manggoluh, na dob magou do ia, gabe jumpah use.ʼ Jadi marmalas ni uhur ma sidea. [201]

²⁵Tapi i juma do anak ni sikahanan ai. Jadi rohkonsi ia hun dohor hu rumah, ibogei ma sora ni musik ampa na manortor.

²⁶Gabe idilo ma sahalak humbani jabolon ai, ipapangkei ma atap aha do na masa.

²⁷Jadi nini ma hu bani, ʻDomma roh anggimu, jadi isayat bapanta do lombu pinamombur ai, halani jorgit do ia mulak.ʼ

²⁸Jadi marah ma ia, anjaha seng ra roh hu rumah, gabe roh ma bapani mangajar-ajarisi.

²⁹Tapi nini ma mambalosi bapani ai, ʻMartahun-tahun ma ahu mambalosi ham, anjaha seng ongga hulanggar parentahmu. Tapi anak ni hambing pe lang ongga ibere ham bangku, ase marmalas ni uhur ahu ampa huan-huanku.

³⁰Hape rohkonsi anakmu, na mamboiskon artamu rap pakon boru jalang, gabe isayat ham do anak ni lombu na pinamombur in.ʼ

³¹Jadi nini ma hu bani, ʻAmbia, tongtong do ho rap pakon ahu, anjaha haganup na dong bangku in, ho do simadasi.

³²Tapi patut do hita marmalas ni uhur anjaha marmegah-megah, ai na dob matei do anggimon gabe manggoluh, anjaha na dob magou do ia, gabe jumpah.”ʼ