Read Batak Simalungun 5 MUSA 11 Bible Online

5 MUSA 11 - Batak Simalungun bible

5 MUSA 11

¹Halani ai maningon haholonganmu do Jahowa Naibatamu, anjaha ramotkononmu pambalosion Bani, age aturan-Ni, uhum-Ni pakon tonah-Ni sadokah ham manggoluh.

²Anjaha maningon tandaonmu do sadari on (ai sedo hubani anak nasiam na so sampang mananda barang mangidah on ahu marsahap pasal pangajarion ni Jahowa Naibata nasiam) hatimbulon-Ni, tangan-Ni na gogoh in pakon botokon-Ni na gostong in,

³tanda halongangan pakon pambahenan-Ni, sagala na binahen-Ni i Masir hubani Parao raja ni Masir pakon hubani ganup tanohni;

⁴pakon na binahen-Ni hubani bala ni Masir, hubani hudani pakon garetani; sonaha pambahenan-Ni bah ni Laut Sigerger manlangkobi sidea, sanggah na iayak-ayak sidea nasiam, gabe magou sidea ibahen Jahowa ronsi sadari on; [124]

⁵pakon na binahen-Ni hubani nasiam i halimisan, paima das nasiam hubani ianan on;

⁶pakon na binahen-Ni hubani si Datan pakon si Abiram, anak ni si Eliab, ginompar ni si Ruben, naha parpangangang ni tanoh ai bani babahni laho mambondut sidea, rap pakon rumah ni sidea, lampolamponi, pakon sagala na manggoluh na mangirikkon sidea, i tongah-tongah ni ganup Israel; [125]

⁷ai mata nasiam sandiri do mangidah ganup pambahenan ni Jahowa na bolon in, sagala na binahen-Ni ai.

⁸Halani ai sai ramotkon nasiam ma sagala tonah, na hutonahkon in bamu sadari on, ase margogoh nasiam anjaha masuk nasiam hu tanoh siteanon nasiam ai, simasukan nasiam ma ai laho maneansi,

⁹anjaha ase dokah nasiam manggoluh i tanoh na dob binulawankon ni Jahowa hubani ompung nasiam, laho mamberehon hubani sidea pakon hubani ginompar ni sidea, sada tanoh habaoran ni dadih pakon manisan ni huramah. [126]

¹⁰Ia tanoh simasukan anjaha siteanon nasiam ai, seng songon tanoh Masir, pandaratan nasiam ai; ia dob isaburhon ham bonihmu hujai, gabe naheimu ibahen ham mangarbahi ai, songon pohon parlowohon;

¹¹tapi tanoh simasukan anjaha siteanon nasiam ai, tanoh dolog anjaha na marhabungan do ai, mangonsop bah udan na hun langit,

¹²sada tanoh na sinarihon ni Jahowa Naibatamu do ai; tongtong do mangkawahi mata ni Jahowa Naibatamu hujai humbani mula ni tanoh on ronsi ujungni. [127]

¹³Anjaha anggo tangi nasiam bani tonahku, na hutonahkon in bani nasiam sadari on, gabe holong uhur nasiam bani Jahowa, Naibata nasiam, anjaha ibalosi nasiam Ia humbani ganup uhurmu pakon ganup hosahmu, [128]

¹⁴bereon-Ni ma udan bani tanoh nasiam bani panorangni, udan partidahonkon pakon udan parpariamaonkon, ase tarpatumpu ham gandummu, anggurmu pakon minakmu.

¹⁵Ia homa patubuhkon poyon-poyon i ladangmu hagoluhan ni pinahanmu ase mangan ham anjaha bosuran.

¹⁶Jaga nasiam ma diri nasiam, ase ulang tarpadari-dari uhur nasiam, gabe marbalik nasiam mangirikkon naibata na legan, anjaha marsombah hujai;

¹⁷jadi gajag holi ringis ni Jahowa mangidah nasiam, gabe itutup langit ase ulang roh udan, tanoh in pe lang ibere gogohni, gabe podas nasiam magou hun tanoh na dear, na binere ni Jahowa bani nasiam. [129]

¹⁸Antong sai parimbagaskon nasiam ma hatangkon anjaha pamasuk nasiam ma in hubagas uhur nasiam, anjaha sangkutkon nasiam ma in bahen partinandaan i atas tangan nasiam, anjaha bahen pardingatan i holangkolang ni mata nasiam. [130]

¹⁹Anjaha ajarhon nasiam ma in bani anak nasiam, sahapkon nasiam ma in sanggah hundul-hundul nasiam i rumah nasiam, barang sanggah i pardalanan ham, barang laho modom pe ham, barang dob puho use.

²⁰Anjaha maningon suratkononmu do in hubani tohang ni rumahmu barang hubani horbanganmu,

²¹ase lambin ganda ari-ari ni goluhmu pakon ari-ari ni goluh ni ginompar nasiam i tanoh, na dob binulawankon ni Jahowa hubani ompung nasiam, laho mamberehon ai bani sidea, songon dokah ni langit i babou ni tanoh on.

²²Anggo botul-botul iramotkon nasiam ganup titah on, na hutonahkon in bani nasiam laho mangkorjahon ai, ihaholongi nasiam Jahowa, Naibata nasiam, mardalan nasiam bani ganup dalan-Ni, anjaha marsijoloman nasiam hu Bani,

²³maningon pabalion ni Jahowa do haganup bangsa sipajuh begu-begu hun lobei nasiam, ase isoluk nasiam bangsa sibolonan anjaha sigogohan humbani nasiam. [131]

²⁴Sagala tanoh na dob nidogei ni tapak-tapak ni nahei nasiam, maningon nasiam simadasi, olat ni halimisan ai pakon Libanon, olat ni bah ai, ai ma Eprat, das hu laut hampit hasundutan, ai ma tanoh nasiam.

²⁵Ise pe lang na manahan jongjong i lobeimu; bereon ni Jahowa Naibata nasiam ma uhur hagobiron pakon biar mangidah nasiam bani ganup tanoh, na sihol dogeion nasiam, songon na binagahkon-Ni bani nasiam.

²⁶Tonggor ma, ahu papilihkon bani nasiam sadari on pasu-pasu pakon papa-papa; [132]

²⁷pasu-pasu tene, anggo itangihon nasiam tonah ni Jahowa Naibata nasiam, sagala na hutonahkon in bani nasiam sadari on; [133]

²⁸tapi papa-papa anggo lang itangihon nasiam tonah ni Jahowa Naibata nasiam, gabe manlembang nasiam hun dalan, na hutonahkon in bani nasiam sadari on, laho mangirikkon naibata na legan, na so tinanda nasiam.

²⁹Anggo domma das ham iarahkon Jahowa Naibatamu masuk hu tanoh siparayakonmu ai bahen parbagiananmu, maningon hatahononmu do pasu-pasu on i Dolog Garisim, anjaha papa on i Dolog Ebal [134]

³⁰Ai lang haduasi do ai i dipar ni Jordan, i pudi ni dalan na hampit hasundutan, i tanoh ni halak Kanaan, na marianan i pamah ai, tontang ni Gilgal, dohorhon baringin na i More? [135]

³¹Ai diparan nasiam ma Jordan, laho masuk manean tanoh, na dob binere ni Jahowa Naibata nasiam bani nasiam; teanon nasiam ma ai anjaha marianan ma nasiam ijai.

³²Halani ai sai haporluhon nasiam ma manramotkon ganup aturan pakon uhum, na dob hutonahkon in bani nasiam sadari on.