Read Batak Simalungun 5 MUSA 12 Bible Online

5 MUSA 12 - Batak Simalungun bible

5 MUSA 12

¹On do aturan pakon uhum, na patut siporluhonon nasiam mangkorjahonsi i tanoh, na binerehon ni Jahowa Naibata ni ompungmu bamu, bahen parbagiananmu, sadokah nasiam manggoluh i atas tanoh on.

²Maningon parsedaon nasiam do sagala ianan panggalangan bani naibata na legan na bani bangsa sipajuh begu-begu na sihol solukon nasiam ai, na i atas dolog barang i atas raboyon, barang i toruh ni sagala hayu na ratah. [136]

³Maningon parreongon nasiam do sagala anjapanjap ni sidea, anjaha bolahon nasiam tiang ni sidea, anjaha bois tutungon nasiam sisombahon ni sidea bani apuy; maningon robohon nasiam do gana-gana ni naibata ni sidea, anjaha sasapkonon nasiam goran ni sidea hun tanoh ai.

⁴Seng bulih sonai bahenon nasiam hubani Jahowa, Naibata nasiam.

⁵Tapi ianan, na pinilih ni Jahowa Naibata nasiam humbani ganup marga nasiam laho pajonamkon goran-Ni hujai, anjaha marianan ijai, maningon ai do sipindahan nasiam, anjaha maningon hujai do nasiam laho.

⁶Maningon hujai do boanon nasiam galangan situtungon nasiam pakon galangan sisayaton nasiam, parsapuluhan nasiam pakon galangan sitatangon ni tanganmu, galangan bagah-bagahmu pakon galangan rosuh ni uhurmu, bunga tubuh ni lombumu pakon biribirimu.

⁷Maningon hujai do homa nasiam mangan i lobei ni Jahowa Naibata nasiam, anjaha marmalas ni uhur nasiam, ham pakon pangisi ni rumah nasiam, mangidah haganup jinolom ni tanganmu, sagala na pinasu-pasu ni Jahowa Naibatamu bamu.

⁸Seng bulih bahenon nasiam ijai romban hubani haganup na binahenta ijon sadari on, ganup mambahen na pintor bani uhurni bei,

⁹ai seng das ope nasiam ronsi nuan hu parsaranan, barang hu parbagianan, sibereon ni Jahowa Naibatamu bamu.

¹⁰Tapi anggo diparan nasiam ma Bah Jordan ai, anjaha marianan nasiam i tanoh na nilayak-layakkon ni Jahowa Naibata nasiam bahen parbagianan nasiam, anjaha marhasonangan nasiam ibahen humbani haganup munsuh nasiam inggot, gabe marsonang-sonang nasiam marianan, [137]

¹¹jadi maningon hubani ianan, na sihol pilihan ni Jahowa, laho pajonamkon goran-Ni ijai, maningon hujai do boanon nasiam sagala na huparentahkon bamu. Galangan situtungon nasiam pakon galangan sisayaton nasiam, parsapuluhan nasiam pakon galangan sitatangon nasiam pakon ganup galangan bagah-bagah nasiam, sagala na binagah-bagahkon nasiam hubani Jahowa.

¹²Maningon marmalas ni uhur do nasiam i lobei ni Jahowa Naibata nasiam, nasiam pakon anak nasiam pakon boru nasiam, jabolon nasiam dalahi pakon jabolon nasiam naboru ronsi halak Levi na marianan ibagas huta nasiam, ai seng dapotan parbagianan barang tean-teanan sidea. [138]

¹³Jaga ma dirimu, ase ulang igalangkon ham galangan situtungon nasiam bani ganup ianan na dear ninuhurmu;

¹⁴tapi bani ianan na sihol pilihon ni Jahowa i tongah-tongah ni sada humbani margamu, maningon ijai do galangkononmu galangan situtungonmu, anjaha maningon ijai do bahenonmu sagala na hutonahkon in bamu.

¹⁵Tapi bulih do sayatonmu anjaha panganonmu gulei ibagas hutamu, marguru hubani sir ni uhurmu, romban hubani pasu-pasu ni Jahowa Naibatamu, na binerehon-Ni in bamu ibagas haganup iananmu; halak na butak pakon na borsih, bulih do mangankon hunjai, songon balua barang ursa. [139]

¹⁶Pitah daroh ni ai tene seng bulih panganon nasiam, maningon hu tanoh do ai useihononkon songon bah. [140]

¹⁷Seng bulih panganon nasiam ibagas huta nasiam parsapuluhan humbani gandummu, barang humbani anggurmu, barang humbani minakmu, barang bunga tubuh humbani lombumu barang humbani biribirimu, barang atap aha pe humbani galangan bagah-bagahmu na dob binagahkonmu, barang galangan rosuh ni uhurmu pakon sitatangon humbani tanganmu.

¹⁸Maningon i lobei ni Jahowa Naibatamu do panganonmu ai, bani ianan na sihol pilihon ni Jahowa Naibatamu, ham pakon anakmu ampa borumu, jabolonmu dalahi pakon jabolonmu naboru pakon halak Levi na marianan ibagas hutamu; maningon marmalas ni uhur do ham i lobei ni Jahowa Naibatamu ibagas haganup na hinorjahonmu. [141]

¹⁹Jaga dirimu ase ulang lang isarihon nasiam halak Levi, sadokah manggoluh ham i atas tanohmu. [142]

²⁰Anggo ipabolag Jahowa Naibatamu tanohmu, songon na dob pinarbagah-Ni hinan bamu, gabe nimu, ʻSihol mangan gulei ahu,ʼ halani sir uhurhu sihol mangan gulei, bulih do panganonmu gulei marguru hubani gok ni uhurmu.

²¹Anggo madaohtu ham humbani ianan, na sihol pilihon ni Jahowa Naibatamu, laho pajonamkon goran-Ni ijai, bulih do sayatonmu humbani lombu barang biribirimu, sagala na binere ni Jahowa bamu, songon na dob hutonahkon in bamu; anjaha bulih do ham mangan ibagas hutamu marguru hubani gok ni uhurmu.

²²Tongon tene songon na pinangan ni halak balua pakon ursa, bulih do panganonmu ai, halak na borsih pakon na butak bulih do panganonni ai. [143]

²³Tapi jaga dirimu, ase ulang ipangan ham daroh ai, ai daroh ai do hosah; halani ai seng bulih panganonmu hosah ai rap pakon dagingni. [144]

²⁴Seng bulih panganonmu daroh ai, maningon hu tanoh do ai useihononmu songon bah.

²⁵Seng bulih panganonmu ai, ase marhasonangan ham pakon ginomparmu i pudimu, anggo ihorjahon ham na pintor bani panonggor ni Jahowa.

²⁶Tapi galanganmu na pansing, na maningon sigalangkononmu, pakon galangan bagah-bagahmu, maningon buatonmu anjaha boanonmu do ai bani ianan na dob pinilih ni Jahowa,

²⁷anjaha maningon galangkononmu do galangan situtungonmu, dagingni pakon darohni, i atas anjapanjap ni Jahowa Naibatamu; daroh ni galangan sisayatonmu maningon useihononkon do ai hu atas ni anjapanjap ni Jahowa Naibatamu, tapi anggo dagingni bulih do ai panganonmu. [145]

²⁸Ramotkon anjaha tangihon ham ma ganup hata on, sagala na hutonahkon on bamu, ase marhasonangan ham pakon ginomparmu i pudimu ronsi sadokah ni dokahni, anggo ihorjahon ham na dear pakon na pintor bani uhur ni Jahowa Naibatamu.

²⁹Anggo domma isiapkon Jahowa Naibatamu i lobeimu bangsa sipajuh begu-begu, na sihol parayakon nasiam laho manoluk sidea, anjaha anggo domma isoluk ham sidea, lanjar marianan ham i tanoh ni sidea ai,

³⁰jaga ham ma dirimu, ase ulang hona tirangkap ham laho mangirikkon sidea, dob hona siapkon sidea i lobeimu, anjaha ulang sungkun-sungkun ham pasal naibata ni sidea gabe nimu, “Sonaha pambalosi ni bangsa sipajuh begu-begu on mambalosi naibatani, sonai ma homa sihol bahenonku. [146]

³¹Seng bulih bahenon nasiam sonai bani Jahowa Naibata nasiam; ai sagala pahara na masambor na hinagigihon ni Jahowa, ai do ibahen sidea hubani naibatani; ai gari anak ni sidea pakon boru ni sidea bois do itutung sidea ibagas apuy laho manggalang naibata ni sidea.