Read Batak Simalungun 5 MUSA 17 Bible Online

5 MUSA 17 - Batak Simalungun bible

5 MUSA 17

¹Seng bulih galangkononmu bani Jahowa Naibatamu lombu barang biribiri na martikas barang na boritan; ai hagigian do ai bani Jahowa Naibatamu. [175]

²Anggo adong jumpah i tongah-tongahmu ibagas sada huta, na sihol bereon ni Jahowa Naibatamu bamu, sada dalahi barang sada naboru, na mangkorjahon sogam ni uhur ni Jahowa Naibatamu, marhitei na mangosei padan, na binahen-Ni ai, [176]

³gabe laho ma ia mambalosi naibata na legan anjaha marsombah hujai, hu mata ni ari barang hu bulan, barang hubani ganup bala ni langit, na so hutonahkon in, [177]

⁴anjaha tarbortik ai bamu anjaha ibogei pinggolmu; jadi maningon pangkei do pareksaonmu ai anjaha tonggor ma, anggo tongon do masa pahara sihagigihononkon ai i Israel,

⁵jadi maningon boanonmu do luar dalahi barang naboru, na mambahen hajahaton na sonai ai, hu darat ni horbanganmu, anjaha maningon sigijigon do dalahi barang naboru na sonai ai bani batu, ase matei.

⁶Maronjolan hubani hasaksian ni dua barang tolu halak, maningon bunuhon do na dob pinutuskon marutang hosah; tapi anggo maronjolan hubani hatorangan ni sada halak tumang do, seng bulih bunuhon ia. [178]

⁷Maningon tangan ni saksi ai lobei mangonai laho mamunuhsi, dob ai use tangan ni ganup bangsa ai. Sonai ma bahenonmu maniapkon hajahaton ai hun tongah-tongahmu.

⁸Anggo mapayahtu pareksaonmu sada pahara bani paruhuman pasal na marsibunuhan hosah, barang na marsurei, barang na marsiugahan, atap pahara na ijahanin pe ibagas hutamu, maningon laho ma ham tangkog hu ianan, na sihol pilihon ni Jahowa Naibatamu;

⁹laho ma ham hubani malim, halak Levi ai, pakon hubani panguhum bani panorang ai, laho manungkun uhum bani sidea; jadi patugahon ni sidea ma bamu haputusan ai. [179]

¹⁰Jadi maningon bahenonmu do romban hubani na ipatugah sidea bamu, humbani ianan na sihol pilihon ni Jahowa; anjaha maningon haporluhononmu do mangkorjahon ganup romban hubani na pinodahkon ni sidea bamu;

¹¹romban hubani podah, na pinodahkon ni sidea bamu, anjaha romban hubani haputusan, na ipatugah sidea bamu, maningon sonai do bahenonmu; seng bulih ham manlembang humbani haputusan, na ipatugah sidea bamu, hu siamun barang hu sambilou. [180]

¹²Anjaha dalahi na marhajungkaton ai, marhitei na lang ra ia mambalosi malim na jongjong marugas ijai i lobei ni Jahowa Naibatamu, barang panguhum pe, maningon marutang hosah ma dalahi ai; sonai ma siapkononmu hajahaton ai hun Israel.

¹³Maningon ganup bangsa ai mambogei ai, ase mabiar sidea anjaha ulang be ihorjahon sidea hajungkaton.

¹⁴Anggo masuk ham hu tanoh sibereon ni Jahowa Naibatamu bamu, anjaha anggo isoluk ham ai anjaha marianan ijai, anjaha gabe roh hatamu mangkatahon, ʻSihol pabangkitonku do sada raja manggomgom ahu, usih hubani haganup bangsa sipajuh begu-begu na inggot hu bangku.ʼ [181]

¹⁵Bulih do tongon pabangkitonmu manggomgom ham sada raja, na pinilih ni Jahowa Naibatamu; maningon hun tongah-tongah ni saninamu pabangkitonmu raja manggomgom ham, seng bulih pabangkitonmu manggomgom ham halak na legan, na so saninamu.

¹⁶Pitah, seng bulih pabueion ni raja ai huda bani, anjaha seng bulih arahkononni bangsa ai mulak hu Masir, laho pabueihon huda bani, ai domma pala ihatahon Jahowa bani nasiam, ʻSeng bulih be nasiam mulak hubani dalan on.ʼ [182]

¹⁷Anjaha seng bulih pabueionni parinangonni, ase ulang manlembang uhurni; sonai homa seng bulih pajunjunonni bani pirak pakon omas. [183]

¹⁸Anjaha anggo hundul ma ia bani paratas ni harajaonni, maningon salinonni ma bani hata ni titah on hubani sada buku i lobei ni malim pakon halak Levi.

¹⁹Maningon titah ai tongtong i lambungni, anjaha pabasa-basaonni ai sadokah manggoluh ia, ase marlajar ia marhabiaran bani Jahowa Naibatani, ase ramotanni ganup hata ni titah pakon aturan laho mandalankon ai;

²⁰ase ulang ipagijang uhurni i lobei ni saninani, anjaha ase ulang manlembang ia humbani titah ai, barang hu siamun barang hu sambilou, ase dokah ia manggoluh manjujung harajaonni ai, ia pakon ganup anakni i tongah-tongah ni Israel. [184]