Read Batak Simalungun 5 MUSA 20 Bible Online

5 MUSA 20 - Batak Simalungun bible

5 MUSA 20

¹Anggo laho ham hu parporangan mangimbang munsuhmu, gabe ididah ham huda pakon gareta pakon bala bueinan hun bamu, ulang ma ham mabiar mangidah sidea, ai Jahowa Naibatamu do hasomanmu, Ia do mangarahkon ham tangkog hun Masir.

²Ia dob lambin roh dohorni nasiam hu parporangan, maningon roh ma hun dohor malim ai anjaha marsahap ma ia hubani bangsa ai,

³nini ma dompak sidea, “Tangihon ma alo Israel! Na barah ma nasiam marporang mangimbang munsuh nasiam; ulang ma gobir uhur nasiam, ulang ma nasiam mabiar, ulang ma songgotan anjaha bajoraon nasiam mangidah sidea,

⁴ai Jahowa Naibata nasiam do mardalan rap pakon nasiam laho marporang mangimbang munsuh mangkopkop nasiam, laho mambere hamonangan bani nasiam.”

⁵Anjaha sipanuturi ai pe hatahononni ma hubani bangsa ai sonon, “Barang ise pajongjong rumah na baru, tapi lape ibongkot ai, bulih do ai mulak hu rumahni, ase ulang matei ia i parporangan, gabe halak na legan holi mangingani rumah ai. [198]

⁶Anjaha barang ise na dob mamungkah sada pohon anggur, hape seng sompat ope ia mangankon buahni, bulih do ia mulak hu rumahni, ase ulang matei ia i parporangan, gabe halak na legan mangankon buahni. [199]

⁷Anjaha barang ise na dob martunangan pakon sada naboru, tapi seng ialop ope ia hu rumahni, bulih do ia mulak hu rumahni, ase ulang matei ia i parporangan, gabe halak na legan mambuatsi.” [200]

⁸Anjaha maningon tambahan ni sipanuturi ai ope mangkatahon hatani hubani bangsa ai, “Barang ise na mabiar anjaha gobir uhurni, bulih do ia mulak hu rumahni, ase ulang madotei uhur ni hasomanni ibahen, songon uhurni ai.” [201]

⁹Ia dob siap sipanuturi ai mangkatahon hatani hubani bangsa ai, hatahononni ma pambobai ni bala mambobahon bangsa ai.

¹⁰Anggo dohor ma ham bani sada huta laho mamorang ai, maningon usulhononmu do pardameian hujai. [202]

¹¹Anjaha anggo damei do balosni bamu, anjaha iungkab horbanganni bamu, jadi ganup bangsa isi ni huta ai maningon mambalosi rodimu anjaha gabe jabolonmu.

¹²Anjaha anggo seng ra sidea mardamei pakon ham, tapi sihol imbangonni ham marporang, maningon hubuon nasiam do huta ai.

¹³Anggo domma iondoskon Jahowa Naibatamu huta ai hubagas tanganmu, maningon matei tampulonmu ganup dalahi parhuta ai bani podang, [203]

¹⁴tapi anggo naboru barang dakdanak, pinahan ronsi atap aha pe na ibagas huta ai, ganup taban-tabanni, bulih do ayobonmu bamu; anjaha bulih do panganonmu taban-taban humbani munsuhmu, na dob binere ni Jahowa Naibatamu bamu.

¹⁵Maningon sonai do bahenonmu bani ganup huta na daoh tumang hun bamu, sagala na so masuk bani huta ni bangsa sipajuh begu-begu na ijon on.

¹⁶Tapi anggo humbani pangisi ni huta ni bangsa sipajuh begu-begu do ai, na sihol bereon ni Jahowa Naibatamu bahen parbagiananmu, seng bulih pagoluhonmu age sada halak na marhosah, [204]

¹⁷maningon siap do sidea bahenonmu, halak Het, Amori, Kanaan, Peresi, Hewi pakon Jebusi, songon na tinonahkon ni Jahowa Naibatamu bamu; [205]

¹⁸ase ulang iajarhon sidea bani nasiam mangkorjahon sagala horja hagigi, na binahen ni sidea pasangap naibata ni sidea, ase ulang mardousa nasiam bani Jahowa Naibata nasiam.

¹⁹Anggo dokah ham mangkubu sada huta, laho mamorang ai ase tunduk, seng bulih parsedaonmu hayu na ijai marhitei na managilhon hapakmu hujai; bulih do panganonmu buahni, tapi lang bulih anggo robohonmu. Ai jolma do hayu na i ladang ai, ase maningon dihut singgur ai bani pangkubuonmu ai?

²⁰Pitah hayu, na dob binotohmu hinan seng sipanganon buahni, bulih parsedaonmu anjaha robohonmu anjaha pakeionmu bahen pangkubu dompak huta, na marmunsuh pakon ham, paima tunduk huta ai ibahen ham.