Read Batak Simalungun 5 MUSA 23 Bible Online

5 MUSA 23 - Batak Simalungun bible

5 MUSA 23

¹Halak na kinasih barang na pinaborsih, seng bulih masuk hu kuria ni Jahowa.

²Seng bulih anak salong-salongan masuk hu kuria ni Jahowa; age bani sundut na pasapuluhkon seng bulih ginomparni masuk hu kuria ni Jahowa.

³Seng bulih halak Amon pakon halak Moab masuk hu kuria ni Jahowa, age sundut na pasapuluhkon seng bulih masuk humbani sidea hu kuria ni Jahowa ronsi sadokah ni dokahni,

⁴halani lang ialo-alo sidea nasiam marhitei ruti pakon bah bani dalan, sanggah luar nasiam hun Masir, pakon halani na iupahi sidea mangimbang nasiam si Bileam, anak ni si Beor, na hun Petor i Padang Aram laho mamurai nasiam. [225]

⁵Age pe sonai seng ra Jahowa Naibatamu mambalosi hata ni si Bileam; tapi ipahusor Jahowa Naibatamu do papa ai gabe pasu-pasu bamu, halani holong ni uhur ni Jahowa, Naibatamu mangidah ham.

⁶Seng bulih pindahanmu hadameion ni sidea barang hasonangan ni sidea sadokah ham manggoluh ronsi sadokah ni dokahni.

⁷Seng bulih magigi uhurmu mangidah halak Edom, ai saninamu do ia; seng bulih magigi uhurmu mangidah halak Masir, ai halak dagang do ham na ijia i tanohni. [226]

⁸Dakdanak na itubuhkon bani sidea bani sundut patoluhon, bulih do masuk hubagas kuria ni Jahowa.

⁹Anggo bingkat ham hu parporangan laho mangimbang munsuhmu, maningon ramotanmu do dirimu dompak sagala hajahaton.

¹⁰Anggo adong i tongah-tongah nasiam sahalak na butak, halani mambur bonihni borngin, maningon luar ia hu darat ni parsaranan ai, seng bulih masuk ia hubagas parsaranan ai; [227]

¹¹tapi marayak golap ari paridionni ma angkulani ibagas bah, anjaha anggo domma sundut mata ni ari, boi ma ia masuk hu parsaranan ai,

¹²Maningon adong bamu i darat ni parsaranan ai sada ianan, anjaha hujai ma ham hu duru.

¹³Ambah ni sinjatamu maningon dong bamu sada tajak-tajak, ase anggo laho ham hu duru, hurakonmu ma sada lubang, anjaha rungkubonmu ma ginagatmu ai.

¹⁴Ai Jahowa Naibatamu do mardalan-dalan i tongah-tongah ni parsarananmu laho paluahkon ham pakon mangondoskon munsuhmu bamu. Halani ai maningon pansing do parsarananmu, ase ulang adong Idahon-Ni na so patut i tongah-tongahmu, ase ulang surut Ia Hun bamu. [228]

¹⁵Seng bulih ondoskononmu sada jabolon mulak hubani tuanni, na dob lintun humbani tuanni hu bamu;

¹⁶maningon i lambungmu, i tongah-tongahmu do ia marianan, bani ianan na pinilihni ibagas sada humbani hutamu, barang ija sidearan ninuhurni; seng bulih odaronmu ia. [229]

¹⁷Seng bulih dong humbani boru ni halak Israel, na mangondoskon dirini bani ugama parriah-riahon, anjaha seng bulih dong humbani anak ni halak Israel, na mangondoskon dirini bani ugama parriah-riahon. [230]

¹⁸Seng bulih boanonmu upah parriah-riahon barang duit boli ni baliang hu rumah ni Jahowa Naibatamu, laho manggalar atap ija utang bagah-bagahmu, ai magigi do uhur ni Jahowa Naibatamu mangidah haduasi ai. [231]

¹⁹Seng bulih jaloonmu bunga humbani hasomanmu, barang bunga ni duit, barang bunga ni sipanganon, barang bunga ni atap aha pe na marbunga ipapinjamkon halak. [232]

²⁰Humbani halak na legan bulih do jaloonmu bunga, tapi anggo hubani hasomanmu seng bulih pabungahononmu atap aha pe, ase ipasu-pasu Jahowa Naibata sagala na jinamah ni tanganmu, bani tanoh simasukanmu bahen parbagiananmu.

²¹Anggo marbagah-bagah ham hubani Jahowa Naibatamu, ulang ma ipananget-nanget ham laho manggalari ai, sai tungguon ni Jahowa Naibatamu do ai hun bamu, anjaha gabe dousa do ai bamu. [233]

²²Tapi ambit lang marbagah-bagah ham seng dousa ai bamu.

²³Maningon ramotkononmu anjaha pasaudonmu do sagala na dob puas humbani pamanganmu, ai na dob binagah-bagahkonmu do ai humbani rosuh ni uhurmu hubani Jahowa Naibatamu, sagala na dob niluarhonmu marhitei pamanganmu.

²⁴Anggo masuk ham hubagas pohon anggur ni hasomanmu, bulih do panganonmu humbani buah ni anggur ai age sadiha rosuh ni uhurmu, sabosur-bosurmu, tapi sada pe lang bulih balbahulhononmu.

²⁵Anggo masuk ham hu sisabion ni hasomanmu, bulih do buatonmu buyur ni ai bani tanganmu, tapi seng bulih sabihononmu sasabimu hubani juma ni hasomanmu. [234]