Read Batak Simalungun 5 MUSA 26 Bible Online

5 MUSA 26 - Batak Simalungun bible

5 MUSA 26

¹Anggo domma masuk ham hu tanoh sibereon ni Jahowa Naibatamu bamu bahen parbagiananmu, dob isoluk ham tanoh ai anjaha marianan ham ijai,

²maningon buatonmu ma humbani limbuah ni ganup gogoh ni tanoh ai, na jumpah humbani tanohmu ai, na dob binere ni Jahowa Naibatamu bamu, anjaha pamasuk ham ma ai hubagas sada tapongan, anjaha boan ham ma ai hubani ianan sipilihon ni Jahowa Naibatamu bahen ianan ni goran-Ni. [253]

³Dob ai maningon parayakonmu ma malim, na marhorin bani ari ai, anjaha hatahon ham ma hu bani, “Na pabotohkon ma ahu sadari on i lobei ni Jahowa Naibatamu, paboa na dob masuk ahu hu tanoh, na dob binulawankon ni Jahowa hinan hubani ompungnami, bereon-Ni hu bennami.”

⁴Jadi buaton ni malim ai ma tapongan ai hun tanganmu, anjaha ipeakkon ma ai i lobei ni anjapanjap ni Jahowa Naibatamu.

⁵Dob ai hatahononmu ma i lobei ni Jahowa, “Halak Aram na madou-adou do anggo bapa; dob ai tuad ma ia hu Masir lanjar manginsolat ijai, otik do bilanganni, hape jadi gabe bangsa na bolon, na gogoh anjaha na buei. [254]

⁶Tapi roh ma halak Masir mambahen na so uhum bennami, iarsik anjaha iampeihon do bennami horja jabolon na borat.

⁷Jadi mandoruhi ma hanami bani Jahowa Naibata ni ompungnami, gabe itangihon Jahowa do soranami anjaha marpanatap uhurni bani hasombuhon, hangaluton pakon hasosakan na idagei hanami.

⁸Dob ai iarahkon Jahowa ma hanami luar hun Masir marhitei tangan na gogoh, pakon botohon na toltol, marhitei songgot-songgot bolon, marhitei tanda pakon halongangan;

⁹anjaha iboan ma hanami das hu ianan in, anjaha ilayak-layakkon ma bennami tanoh on, tanoh habaoran ni dadih pakon manisan ni huramah.

¹⁰Sonari pe, tonggor ma, huboan do limbuah ni gogoh ni tanoh, na binere-Mu in hu bangku, alo Jahowa!” Anjaha tibalhon ma tapongan ai i lobei ni Jahowa Naibatamu anjaha marsombah ma ham i lobei ni Jahowa Naibatamu;

¹¹anjaha marmalas ni uhur ma ham mangidah haganup na madear, na dob binere ni Jahowa Naibatamu bamu pakon hubani sinrumahmu, ham, pakon halak Levi, pakon halak dagang na i tongah-tongahmu. [255]

¹²Anggo domma siap ipatumpu ham ganup parsapuluhan ni gogoh ni tanohmu bani tahun patoluhon, ai ma tahun parsapuluhan, jadi maningon bereonmu ma ai bani halak Levi, halak dagang, dakdanak na tading maetek, puang-puang na mabalu, ase mangan sidea ibagas hutamu anjaha bosuran. [256]

¹³Anjaha hatahononmu ma i lobei ni Jahowa Naibatamu, ʻDomma hubuat ugas na pansing in hun rumah, ambah ni ai domma hubere in hubani halak Levi, halak dagang, dakdanak na tading maetek pakon puang-puang na mabalu, romban hubani ganup tonahmu, na dob tinonahkon-Mu hu bangku; seng dong huengkar age sada humbani tonah-Mu anjaha seng huhalupahon.

¹⁴Seng dong hupangan hunjin sanggah pusok ni uhurhu, barang hubuat hunjin sanggah butak ahu, barang hupaingkat hunjin bahen boanon ni na matei; hutangihon do sora ni Jahowa Naibatangku, hubahen do ganup romban hubani na tinonahkon-Mu hu bangku.

¹⁵Sai manatap ma ham humbani ianan-Mu na pansing in, hun nagori atas, anjaha pasu-pasu Ham ma bangsa-Mu halak Israel pakon tanoh na dob binere-Mu bennami, songon na dob binulawankon-Mu bani ompungnami, tanoh habaoran ni dadih pakon manisan ni huramah.ʼ

¹⁶Sadari on ma Jahowa Naibatamu manonahkon bamu mangkorjahon aturan pakon uhum on; maningon ramotkonon anjaha horjahononmu do in humbani sagala uhurmu pakon sagala tonduymu.

¹⁷Domma iparbagah ham sadari on, paboa maningon Jahowa do Naibatamu, anjaha marparlahou ham bani dalan-Ni, anjaha ramotkononmu aturan-Ni, tonah-Ni pakon uhum-Ni, anjaha maningon tangihononmu sora-Ni.

¹⁸Jahowa pe ihatahon do ham marbagah-bagah sadari on, paboa ham do bangsa-Ni sandiri, songon na dob pinarbagah-bagah-Ni hinan bamu, anjaha ramotkononmu do ganup tonah-Ni,

¹⁹ase Ia mambahen ham timbul humbani ganup bangsa sipajuh begu-begu, na dob jinadihon-Ni bahen puji-pujian pakon ambilan ampa hamuliaon, anjaha ase ham gabe bangsa na pansing bani Jahowa Naibatamu songon na dob hinatahon-Ni hinan. [257]