Read Batak Simalungun 5 MUSA 27 Bible Online

5 MUSA 27 - Batak Simalungun bible

5 MUSA 27

¹Dob ai iparentahkon si Musa pakon pangintuai ni bangsa ai ma hubani bangsa ai, Ramotkon nasiam ma ganup tonah, na dob hutonahkon in bamu sadari on.

²Anggo domma idipari nasiam Jordan, das nasiam hu tanoh sibereon ni Jahowa Naibatamu bamu, maningon pajongjongonmu ma bamu batu na bolon, anjaha lapuonmu ma ai bani hapur,

³anjaha uhirhononmu ma hujai ganup hata ni titah on, anggo domma mandipar ham masuk hu tanoh sibereon ni Jahowa Naibatamu bamu, tanoh habaoran ni dadih pakon manisan ni huramah, songon na dob pinarbagah-bagah ni Jahowa Naibata ni ompungmu hinan bamu.

⁴Anjaha anggo domma idipari nasiam Jordan, maningon pajongjongon nasiam ma batu on songon na dob hutonahkon in bani nasiam sadari on, i atas ni Dolog Ebal, anjaha lapuon nasiam ma in bani hapur.

⁵Maningon pajongjongonmu homa ijai sada anjapanjap bani Jahowa Naibatamu, sada anjapanjap humbani batu; seng bulih dais hujai parugas bosi. [258]

⁶Maningon humbani batu na so binarbar pajongjongonmu anjapanjap bani Jahowa Naibatamu; anjaha maningon galangkononmu do i atasni galangan situtungon bani Jahowa Naibatamu,

⁷anjaha maningon galangkononmu homa galangan pardameian, anjaha panganonmu ijai, lanjar marmalas ni uhur ma ham i lobei ni Jahowa Naibatamu. [259]

⁸Anjaha maningon torang tumang do uhirhononmu hubani batu ai hata ni titah on.

⁹Dob ai nini si Musa pakon malim na humbani marga Levi ma dompak ganup Israel, Pasonang anjaha tangihon ma alo Israel, sadari on ma nasiam gabe bangsa ni Jahowa Naibatamu. [260]

¹⁰Halani ai sai tangihon ma sora ni Jahowa Naibatamu, anjaha horjahon ganup tonah-Ni pakon aturan-Ni, sagala na hutonahkon in bamu sadari on.

¹¹Dob ai iparentahkon si Musa ma hubani bangsa ai bani ari ai,

¹²“Anggo domma idipari nasiam Jordan, maningon jongjong ma i atas ni Dolog Garisim manaurhon pasu-pasu hubani bangsa in: Morga Simeon, Levi, Juda, Isasar, Josep pakon Benjamin. [261]

¹³Anjaha marga on ma na maningon jongjong i atas Dolog Ebal mangkonahon papa: Morga Ruben, Gad, Asser, Sebulon, Dan pakon Naftali.

¹⁴Dob ai pagogohon ni halak Levi ma sora ni sidea manaurhon hubani ganup bangsa Israel,

¹⁵Hona papa ma barang ise na mambahen gana-gana, na niuhir barang na tinuang, hagigian ni Jahowa, jadi-jadian ni tangan ni halak na pandei, anjaha ipajongjong ai bani ianan na ponop. Dob ai balosan ni ganup bangsa ai ma. “Amen!” [262]

¹⁶Hona papa ma barang ise, na marpis ni uhur mangidah bapani barang inangni. Dob ai, hatahonon ni ganup bangsa ai ma. “Amen!” [263]

¹⁷Hona papa ma barang ise na paosor parbalogan ni hasomanni. Dob ai balosan ni ganup bangsa ai ma. “Amen!” [264]

¹⁸Hona papa ma barang ise na pakahouhon halak na mapitung i tongah dalan. Dob ai hatahonon ni ganup bangsa ai ma. “Amen!” [265]

¹⁹Hona papa ma barang ise na papeol uhum bani halak dagang, dakdanak na tading maetek pakon puang-puang na mabalu. Dob ai hatahonon ni ganup bangsa ai ma. “Amen!” [266]

²⁰Hona papa ma barang ise na paganjang parinangon ni bapani, halani na dob marsaor bapani pakonsi. Dob ai hatahonon ni ganup bangsa ai ma. “Amen!” [267]

²¹Hona papa ma barang ise na marsaor pakon pinahan aha pe. Dob ai hatahonon ni ganup bangsa ai ma. “Amen!” [268]

²²Hona papa ma barang ise na marsaor pakon botouni, na sada bapa barang na sada inang pakonsi. Dob ai hatahonon ni ganup bangsa ai ma. “Amen! [269]

²³Hona papa ma barang ise na marsaor pakon simatuani naboru. Dob ai hatahonon ni ganup bangsa ai ma. “Amen!” [270]

²⁴Hona papa ma barang ise na mamunuh hasomanni ibagas na ponop. Dob ai hatahonon ni ganup bangsa ai ma. “Amen!” [271]

²⁵Hona papa ma barang ise manjalo sisip, laho mamunuh sada halak, anjaha na manduruskon darohni na so marpipot. Dob ai hatahonon ni ganup bangsa ai ma. “Amen!” [272]

²⁶Hona papa ma barang ise na so pajonamkon hata ni titah on marhitei na mangkorjahon ai. Dob ai hatahonon ni ganup bangsa ai ma. “Amen!” [273]