Read Batak Simalungun 5 MUSA 29 Bible Online

5 MUSA 29 - Batak Simalungun bible

5 MUSA 29

¹On ma hata ni parpadanan na hinatahon ni Jahowa hubani si Musa sibahenonni hubani halak Israel i tanoh Moab, sobali parpadanan na dob binahenni ai bani sidea i Horeb. [297]

²Dob ai ipatumpu si Musa ma haganup halak Israel anjaha nini ma dompak sidea, “Domma ididah nasiam haganup na dob binahen ni Jahowa i lobeini mata nasiam i tanoh Masir, hubani Parao pakon hubani ganup juakjuakni ampa hubani sab tanohni, [298]

³Ai ma parlajouan bolon, na dob nididah ni mata nasiam, sagala tanda pakon halongangan na bolon in.

⁴Hape lanjar ope seng ibere Jahowa hubani nasiam uhur na marimbagaskonsi, barang mata na marpangidah, barang pinggol na marpambogei ronsi sadari on. [299]

⁵Anjaha Ahu do mangiring-iring nasiam ompat puluh tahun dokahni i halimisan, seng buruk hiou nasiam bani angkula nasiam, anjaha seng buruk sipatu bani naheimu; [300]

⁶seng mangan ruti nasiam, anjaha seng minum anggur barang siinumon na koras nasiam, ase ibotoh nasiam, Ahu do Jahowa Naibata nasiam.ʼ

⁷Anjaha dob das nasiam hu ianan on, luar ma si Sihon raja ni Hesbon, pakon si Og raja ni Basan sihol manjumpahkon hita laho marmunsuh, tapi talu do sidea ibahen hita; [301]

⁸ibuat hita do tanoh ni sidea ai, anjaha ibere hita do ai bani halak Ruben, Gad pakon hubani satongah marga Manase bahen parbagiananni. (4 Mus. 32)

⁹Antong ramotkon nasiam ma hata parpadanan in, anjaha horjahon nasiam ma in, ase maruntung nasiam bani haganup sihorjahonon nasiam.

¹⁰Jongjong do nasiam ganup sadari on i lobeini Jahowa Naibata nasiam, pambobai nasiam, kopala ni marga nasiam, sintua nasiam pakon ganup dalahi hun Israel;

¹¹dakdanak nasiam, parinangon nasiam, pakon halak dagang na i tongah-tongah ni parsarananmu, sonai homa sitaha soban pakon sitahu bahmu,

¹²ase masuk ham hubagas parpadanan, na binahen ni Jahowa Naibatamu, pakon hubagas parbulawanan, na binahen ni Jahowa Naibatamu bamu sadari on;

¹³ase Ia pajonamkon ham sadari on gabe bangsa-Ni, anjaha Ia ma gabe Naibatamu, songon na dob pinarbagah-Ni hinan bamu, anjaha songon na dob binulawankon-Ni hubani ompungmu, si Abraham, si Isak pakon si Jakob.

¹⁴Seng pitah hubani nasiam ahu mambahen parpadanan pakon parbulawanan on, [302]

¹⁵tapi hubani haganup do tene, na jongjong pakon hita i lobei ni Jahowa Naibatanta, pakon bani haganup na so ijon sadari on rap pakon hita.

¹⁶Ai ibotoh nasiam do naha pariananta ijia i tanoh Masir, anjaha naha pamontasta hun tongah-tongah ni bangsa sipajuh begu-begu na binontas nasiam in.

¹⁷Anjaha domma ididah nasiam hagigian, na dob hinorjahon ni sidea ai, pakon gana-gana ni sidea na humbani hayu pakon batu, humbani pirak pakon omas na adong bani sidea.

¹⁸Halani ai sai ulang ma adong i tongah-tongah nasiam dalahi barang naboru, halak na saompung barang na samarga, na marbalik uhurni sadari on humbani Jahowa Naibatanta, sihol mambalosi naibata ni sipajuh begu-begu ai; ase ulang adong i tongah-tongah nasiam urat na mantunaskon buah na marrasun pakon na mapaet. [303]

¹⁹Sai ulang ma adong sada halak, age pe domma ibogei hata ni parbulawanan on, iparhatuah ope dirini ibagas uhurni, mangkatahon, “Maningon marhasonangan do ahu, age mardalan ahu ibagas hahengkengon ni uhurhu; na mamboan hamagouan do ia ai hubani tanoh na marbah pakon na horah.”

²⁰Seng tumaram marpangulaki uhur ni Jahowa mangidahsi, tapi gajak do ringis-Ni pakon parsimburuon-Ni mangidah dalahi na sonai, anjaha maningon manginsonoh do bani haganup papa na tarsurat ibagas buku on, anjaha siapkonon ni Jahowa do goranni hun toruh ni langit. [304]

²¹Anjaha maningon papuligon ni Jahowa do homa ia humbani ganup marga ni Israel laho mambahen marhinamagou, romban hubani haganup papa-papa ni parpadanan, sagala na tarsurat ibagas buku titah on.

²²Anjaha sundut na roh, anak nasiam na jongjong i pudi nasiam, pakon halak na legan, na roh hun tanoh na madaoh hatahononni ma, anggo ididah sidea papa pakon naborit, na hinonahon ni Jahowa hu tanoh on:

²³Domma gabe hirtah pakon garam, matutung ganup tanohni, seng tartidahi, anjaha seng tubuhan aha be, poyon pe seng tubuh, marongrong tene songon Sodom, Gumora, Adama pakon Zeboim, na dob marongrong ibahen Jahowa ibagas ringis-Ni pakon ibagas pargajag ni gila-Ni, [305]

²⁴hatahonon ni ganup bangsa sipajuh begu-begu ma tene, “Mase ma sonai ibahen Jahowa hu tanoh on? Aha do arti ni pargajag ni ringis na bolon on?”

²⁵Jadi hatahonon ni halak ma mambalosi, ʻHalani na tinadingkon ni sidea do parpadanan ni Jahowa Naibata ni ompung ni sidea, na binahen-Ni hubani sidea, sanggah iarahkon sidea luar hun tanoh Masir.ʼ

²⁶Hape laho do sidea use mambalosi naibata na legan anjaha marsombah hujai, naibata na so tinanda ni sidea, anjaha na so niaturhon hubani sidea.

²⁷Halani ai gajag do ringis ni Jahowa mangidah tanoh on, gabe manginsonoh hujai haganup papa, sagala na tarsurat ibagas buku on.

²⁸Jadi isiapkon Jahowa ma sidea hun tanoh ni sidea ibagas gila-Ni pakon pargajag ni ringis-Ni na bolon in, anjaha iambukkon sidea hu tanoh na legan, songon na torang masa sadari on.

²⁹Sagala rusia na ponop, Jahowa Naibata do simadasi; tapi pangungkabon na pinatalar-Ni ai, hita do simadasi pakon anakta ronsi sadokah ni dokahni, laho mangkorjahon ganup hata ni titah on.” [306]