Read Batak Simalungun 5 MUSA 3 Bible Online

5 MUSA 3 - Batak Simalungun bible

5 MUSA 3

¹Dob ai marhusor ma hita anjaha tangkog laho hu Basan; jadi luar ma si Og, raja hun Basan manjumpahkon hita, ia rap pakon ganup bangsani, sihol marmunsuh i Edrei. [28]

²Dob ai roh ma hata ni Jahowa hu bangku, “Ulang ho mabiar mangidahsi, ai domma Huondoskon ia hubagas tanganmu rap pakon ganup bangsani pakon tanohni; maningon bahenonmu do hu bani, songon na dob binahenmu hubani si Sihon, raja ni Amori, na marianan i Hesbon.”

³Jadi iondoskon Jahowa, Naibatanta in ma tongon age si Og, raja hun Basan rap pakon bangsani hubagas tanganta, gabe saud ma rasei ia ibahen hita, sahalak pe lang dong na tading hun bani.

⁴Anjaha ipatunduk hita ma ganup hutani ijia, seng dong age sada huta na so tarrampas humbani sidea, onom puluh huta, haganup nagori Argob, gomgoman ni si Og i Basan.

⁵Ganupan ai huta na marbenteng anjaha na martembok na gijang do, marhorbangan anjaha marpating-pating, sobali huta na so martembok buei tumang.

⁶Isiapkon hita do ganupan ai usih songon na binahenta hubani si Sihon, raja hun Hesbon, ai ma marhitei na maniapkon sagala huta, dalahi, naboru pakon dakdanak.

⁷Tapi sagala pinahan pakon taban-taban humbani huta ai iayob hita do banta. [29]

⁸Jadi ibuat hita do ijia tanoh na idipar ni Jordan hun tangan ni dua raja ni Amori, singgan ni Bah Arnon das hu Dolog Hermon.

⁹Halak Sidon manggorani Hermon ai Sirion, anjaha halak Amori manggoran ai Senir; [30]

¹⁰haganup huta na i pamah ai, sonai homa Gilead pakon ganup Basan das hu Salha pakon Edrei, huta na masuk hu gomgoman ni si Og i Basan.

¹¹Pitah si Og, raja hun Basan do na tading humbani simasima ni halak Refaim; tonggor ma, anggo podomanni, podoman bosi do; ai lang i Rabba huta ni halak Amon do ai? Siah asta ganjangni anjaha ompat asta bolagni mangihutkon asta na somal.

¹²In ma tanoh in na sinolukta ijia; singgan ni Aroer, na i topi ni Bah Arnon pakon satongah pardologan ni Gilead ampa huta-hutani domma hubere hinan hubani halak Ruben pakon halak Gad. [31]

¹³Tapi lobih-lobih ni tanoh Gilead pakon haganup Basan, gomgoman ni si Og ondi, ai ma haganup nagori Argob, domma hubere hubani satongah marga Manase. (Haganup nagori Basan ai igoran do tanoh ni halak Refaim).

¹⁴Si Jair, anak ni si Manase mambuat ganup nagori Argob ai das hu parbalogan ni halak Gesur pakon Maaka, anjaha igoran do Basan ai “dusun ni si Jair” mangihutkon goranni sandiri ronsi sadari on.

¹⁵Hubani si Makir hubere do Gilead,

¹⁶anjaha hubani halak Ruben pakon Gad hubere do tanoh ai singgan ni Gilead das hu Bah Arnon, pakon parsitongahan ni bah ai gabe parbalogan, das use hu Bah Jabok parbalogan ni halak Amon;

¹⁷ambah ni ai pamah ai pakon Jordan ampa nagori na masuk hujai, singgan ni Kinneret das hu laut na i pamah ai, ai ma laut garam na i toruh ni raboyon ni Pisga hampit hapoltakan.

¹⁸Dob ai huhatahon ma ijia hubani nasiam sonon, “Domma ibere Jahowa Naibata nasiam in tanoh on hubani nasiam bahen parbagianan nasiam; sagala nasiam siimbang munsuh maningon mandipar do, gopas marsinjata mambobahon sanina nasiam halak Israel in.

¹⁹Pitah parinangon nasiam, dakdanak nasiam pakon pinahan nasiam (hubotoh parpinahan na buei do nasiam) bulih tading i huta-huta na hu berehon ai bani nasiam,

²⁰paima marhasonangan ibahen Jahowa sanina nasiam, usih songon nasiam, ase dihut sidea manoluk tanoh, sibereon ni Jahowa, Naibata nasiam in hubani sidea i dipar ni Jordan; dob ai bulih ma mulak ganup hu parbagiananni, na dob huberehon bani nasiam.”

²¹Huhatahon do homa ijia hubani si Josua sonon, “ididah panonggormu do haganup na binahen ni Jahowa, Naibata nasiam in hubani na dua raja on, sonai do homa bahenon ni Jahowa hubani haganup harajaon siparayakonmin. [32]

²²Ulang nasiam mabiar mangidah sidea, ai Jahowa Naibata nasiam do marporang mangkopkop nasiam.” [33]

²³Jadi huelek-elek ma ijia Jahowa,

²⁴“Ale Tuhan Jahowa, domma ipungkah Ham patuduhkon bani jabolon-Mu hatimbulan-Mu pakon tangan-Mu na gogoh in, ai naibata na ijahanin ma i nagori atas barang i tanoh on tarbahensi mambahen songon jadi-jadian-Mu in pakon songon hagogohon-Mu in?

²⁵Sai lopas Ham ma mandipar ahu, ase huidah tanoh na dear ai i dipar ni Jordan, tanoh pardologan na dear ai rap pakon Libanon.”

²⁶Tapi manringis do Jahowa mangidah ahu, halani nasiam gabe seng itangihon ahu; jadi nini Jahowa ma hu bangku, “Sungkup ma ai, ulang be nunuti hatamu Bangku pasal hata on. [34]

²⁷Tangkog ma ho hu atas ni Dolog Pisga anjaha tatap ma tanoh ai dompak hasundutan, dompak utara, dompak dangsina pakon dompak hapoltakan, anjaha tatap ma ai marhitei panonggormu; tapi seng bulih diparanmu Jordan on.

²⁸Tapi martonah ma ho hubani si Josua, patenger ma uhurni anjaha pargogohi ma ia; ai mandipar do anggo ia mambobahon bangsa on, anjaha ia do na mambagihon tanoh na dob nididahmin bahen parbagianan ni sidea.” [35]

²⁹Jadi tading ma hita i pamah, na patontang pakon Bet-Peor.