Read Batak Simalungun 5 MUSA 30 Bible Online

5 MUSA 30 - Batak Simalungun bible

5 MUSA 30

¹Anjaha anggo domma sogop bamu magira haganup hata on, pasu-pasu barang papa, na hunahkon i lobeimu, hape ipaulak ham use uhurmu hubagas i tongah-tongah ni ganup bangsa sipajuh begu-begu, pambuangan ni Jahowa Naibatamu bamu, (bd. 28)

²anjaha mulak ham pakon anakmu hubani Jahowa Naibatamu, anjaha itangihon ham sora-Ni, romban hubani na hutonahkon in bamu sadari on, humbani ganup uhurmu pakon humbani ganup tonduymu, [307]

³jadi marpangulaki ma uhur ni Jahowa mangidah habuanganmu, anjaha idop ma uhur-Ni mangidah ham, anjaha patumpuon-Ni ma ham humbani ganup bangsa, pangerapan ni Jahowa Naibatamu bamu. [308]

⁴Porini pe mallok ham hu ujung ni langit, sai patumpuon ni Jahowa Naibatamu do ham hunjai, anjaha alopon-Ni do ham hunjai,

⁵anjaha boanon ni Jahowa Naibatamu ma ham mulak hu tanoh na dob tinean ni ompungmu hinan, ase teanonmu ai use, anjaha tumpakon-Ni ma ham, mardoharan anjaha bueinan humbani ompungmu.

⁶Dob ai sunaton ni Jahowa Naibatamu ma uhurmu pakon uhur ni ginomparmu laho mangkaholongi Jahowa Naibatamu humbani sagala uhurmu pakon sagala tonduymu, ase manggoluh ham. [309]

⁷Tapi honahonon ni Jahowa Naibatamu ma haganup papa-papa on hubani munsuhmu pakon imbangmu, sagala na mangayak-ayak ham.

⁸Dob ai mulak ma use ham anjaha tangihononmu ma sora ni Jahowa, anjaha horjahononmu ma ganup tonah-Ni, sagala na hutonahkon in bamu sadari on.

⁹Jadi marlobih-lobih ma ham tumpakon ni Jahowa Naibatamu bani haganup horja ni tanganmu, bani boras ni boltokmu, bani panggargar ni pinahanmu pakon bani gogoh ni tanohmu; ai mangulaki ma marmalas ni uhur Jahowa manumpakkon na madear hu bamu, usih songon malas ni uhur-Ni na ijia mangidah ompungmu,

¹⁰anggo itangihon ham sora ni Jahowa Naibatamu, laho manramotkon titah-Ni pakon aturan-Ni, sagala na tarsurat ibagas buku titah on, anggo mulak uhurmu hubani Jahowa Naibatamu humbani sagala uhurmu pakon sagala tonduymu.

¹¹ Ai titah, na hutonahkon on bamu sadari on seng mapayahtu in bamu anjaha seng madaohtu.

¹²Seng i nagori atas in, mambahen pala hatahononmu, ʻIse ma gantihnami naik hu nagori atas laho mangalop in bennami, ase ibogei hanami in anjaha ihorjahon hanami in?ʼ [310]

¹³Anjaha seng idipar ni laut hata in, mambahen maningon pala hatahononmu, ʻIse ma gantihnami mandipar laut laho mangalop in bennami, ase ibogei hanami in anjaha ihorjahon hanami in?ʼ

¹⁴ Ai dohor tumang do hata in bamu; ibagas pamanganmu anjaha ibagas uhurmu do in ase boi horjahononmu in.

¹⁵Tonggor ma, domma hupatuduhkon bamu sadari on hagoluhan pakon hatuahon, hamatean pakon hamagouan, [311]

¹⁶marhitei na huhatahon ham sadari on mangkaholongi Jahowa Naibatamu, marhitei na marparlahou ham ibagas dalan-Ni anjaha iramotkon ham titah-Ni, aturan-Ni pakon uhum-Ni, ase manggoluh ham anjaha lambin bueini, anjaha pasu-pasuon ni Jahowa Naibatamu ham i tanoh siparayakonmu nuan bahen parbagiananmu.

¹⁷Tapi anggo marbalik uhurmu, anjaha seng ra ham manangihon, tapi ra ham ajar-ajaranni marsombah hubani naibata na legan anjaha mambalosi ai,

¹⁸na pabotohkon hinan ma bani nasiam sadari on, maningon magou tumang ma nasiam; seng anjai dokah nasiam manggoluh i tanoh siparayakonmu marhitei na mandipari Bah Jordan laho mambuat ai bahen parbagianan. [312]

¹⁹Diloonku ma sadari on langit pakon tanoh gabe saksingku dompak nasiam, paboa na dob hupatuduhkon bamu hagoluhan pakon hamatean, pasu-pasu pakon papa-papa; halani ai pilih ma hagoluhan, ase manggoluh ham pakon ginomparmu, [313]

²⁰marhitei na mangkaholongi Jahowa Naibatamu, manangihon sorani, anjaha marsijoloman hu bani; ai hagoluhan do ai bamu anjaha haganjangon ni umur, manggoluh i tanoh na dob binulawankon ni Jahowa hubani ompungmu, hubani si Abraham, si Isak pakon si Jakob, laho mamberehon ai bani sidea.