Read Batak Simalungun 5 MUSA 31 Bible Online

5 MUSA 31 - Batak Simalungun bible

5 MUSA 31

¹Dob ai inunut si Musa ma mangkatahon hata on hubani ganup Israel,

²nini ma dompak sidea, “Saratus dua puluh tahun ma umurhu sadari on; seng tarbahen ahu be luar pakon masuk. Domma ihatahon Jahowa hu bangku, ʻSeng bulih diparanmu Bah Jordan on.ʼ [314]

³Jahowa Naibatamu sandiri do mandipar i lobeimu; Ia do maniapkon bangsa ai i lobeimu, ase solukonmu sidea; anjaha si Josua do mandipar mambobahon ham, songon na dob hinatahon ni Jahowa hinan,

⁴ʻJadi bahenon ni Jahowa ma bani sidea, songon na dob hubani si Sihon pakon hubani si Og, raja ni halak Amori, pakon hubani tanoh ni sidea, na dob siniapkon-Ni ai.ʼ [315]

⁵Ondoskonon ni Jahowa ma sidea hubani nasiam, anjaha maningon bahenon nasiam ma hubani sidea romban hubani tonah, na dob hutonahkon ai hubani nasiam. [316]

⁶Tenger ma uhur nasiam anjaha marsijoloman, ulang ma mabiar anjaha gobir mangidah sidea, ai Jahowa Naibatamu do hasomanmu mardalan; seng anjai paturuton-Ni anjaha tadingkonon-Ni ham.”

⁷Dob ai idilo si Musa ma si Josua, anjaha nini ma dompaksi i lobei ni haganup Israel, “Tenger ma uhurmu anjaha marsijoloman; ai das ma ham rap pakon bangsa on masuk hu tanoh, na dob binulawankon ni Jahowa hubani ompung ni sidea, sihol mamberehon ai hubani sidea, anjaha ham ma mambagihon ai hubani sidea bahen parbagiananni. [317]

⁸Ai Jahowa sandiri do na mardalan i lobeimu, Ia do mangkasomani ham; seng anjai paturuton-Ni anjaha tadingkonon-Ni ham; ulang ma ham mabiar anjaha ulang ma ham gobir.”

⁹Dob ai isuratkon si Musa ma titah on, anjaha iondoskon ma ai hubani malim, ginompar ni si Levi, siusung poti parpadanan ni Jahowa, pakon hubani ganup pangintuai ni Israel.

¹⁰Dob ai nini si Musa ma dompak sidea, “Bani ujung ni ganup pitu tahun, tudu bani tahun haluahon, bani pesta parlampolampoan, [318]

¹¹sanggah na roh haganup Israel hulobei ni Jahowa Naibatamu, bani ianan sipilihon-Ni ai, maningon basaon ma titah on i lobei ni haganup Israel, bogeion ni pinggol ni sidea.

¹²Patumpu ma bangsa in, sagala paramangon, puang-puang pakon dakdanak pakon halak dagang na ibagas huta nasiam, ase itangar sidea anjaha iguruhon marhabiaran hubani Jahowa Naibata nasiam, anjaha iporluhon mangkorjahon ganup hata ni titah on,

¹³anjaha anak ni sidea, na so mambotoh ope, boi mambogei in anjaha mangguruhon marhabiaran hubani Jahowa Naibata nasiam, sadokah nasiam manggoluh i tanoh siparayakon nasiam, marhitei na mandipari Bah Jordan, bahen parbagiananmu.”

¹⁴Dob ai nini Jahowa ma dompak si Musa, “Tonggor ma, domma dohor jumpah ajalmu, na matei mando ho, antong dilo ma si Josua, anjaha jongjong ma hanima ibagas lampolampo partumpuan ai, ase martonah Ahu hu bani.” Jadi laho ma si Musa rap pakon si Josua, anjaha jongjong ma sidea ibagas lampolampo partumpuan ai.

¹⁵Jadi taridah ma Jahowa ibagas lampolampo ai, marhitei hombun na jongjong; anjaha i lambung ni labah ni lampolampo ai do jongjong hombun ai. [319]

¹⁶Dob ai nini Jahowa ma dompak si Musa, “Tonggor ma, na laho modom ma anggo ho rap pakon ompungmu; jadi jongjong ma bangsa on anjaha manriah-riah mangirikkon naibata na legan i tongah-tongah ni bangsa simasukan ni sidea ai, tadingkonon ni sidea ma Ahu, anjaha oseion ni sidea ma padan-Ku na Hubahen ai hubani sidea.

¹⁷Jadi gajag ma ringis-Hu bani ari na sasada ai mangidah sidea, tadingkonon-Ku ma sidea, anjaha ponopkonon-Ku ma bohing-Ku humbani sidea ase bois sidea magou, anjaha mangonai hubani sidea hamagouan pakon hasosakan na marbagei-bagei. Jadi hatahonon ni sidea ma bani ari na sasada ai: Ai lang mangonai do hamagouan on banta, halani na so i tongah-tongahta Naibatanta?”

¹⁸Anjaha ponopkonon-Ku ma bohing-Ku bani ari na sasada ai, halani haganup hajahaton, na binahen ni sidea ai, halani na dob marbalik sidea bani naibata na legan.

¹⁹On pe suratkon hanima ma bennima doding on, anjaha ajarhon ma in bani halak Israel, mamahkon ma ai bani pamangan ni sidea, ase doding on saksi Bangku dompak bangsa on. (bd. 32)

²⁰Halani anggo domma das sidea Huboan masuk hu tanoh, na dob Hubulawankon hinan hubani ompung ni sidea, hu tanoh habaoran ni dadih pakon manisan ni huramah, anjaha mangan sidea, bosur anjaha mombur, marbalik ma sidea hubani naibata na legan anjaha balosan ni sidea ma ai, mapas ma sidea mangidah Ahu anjaha oseionni ma padan-Ku. [320]

²¹Jadi anggo mangonai ma bani sidea buei hamagouan pakon hasosakan, doding on ma manaksihon bani sidea, ai seng bulih lupa ai humbani pamangan ni ginompar ni sidea, ai domma torang hinan Hutanda sura-sura, na piningkiran ni uhur ni sidea sadari on, sanggah lape das sidea Huboan hu tanoh, na dob Hubulawankon in.” [321]

²²Jadi isuratkon si Musa ma doding on bani na sadari ai, anjaha iajarhon ma ai bani halak Israel.

²³Dob ai nini Jahowa ma dompak si Josua, anak ni si Nun, “Tenger ma uhurmu anjaha marsijoloman ma; ai maningon ho do mambobahon halak Israel masuk hu tanoh, na dob Hubulawankon hubani sidea, anjaha Ahu do mangkasomani ho.”

²⁴Jadi dobkonsi isuratkon si Musa hata ni titah on hubagas sada buku,

²⁵nini si Musa ma dompak halak Levi, na mangusung poti parpadanan ni Jahowa,

²⁶“Buat nasiam ma buku titah on, anjaha nahkon nasiam ma in hu lambung ni poti parpadanan ni Jahowa Naibata nasiam, ase gabe hasaksian ai ijai dompak ham.

²⁷Ai domma hubotoh panlawanonmu pakon hahengkengonmu; tonggor ma, gari sanggah manggoluh ope ahu sonari i tongah-tongah nasiam, domma manggeori nasiam dompak Jahowa, ai lang lambin parahni ma anggo domma matei ahu?

²⁸Patumpu nasiam ma hu lambungkon haganup pangintuai nasiam mar sasamarga, pakon panuturi nasiam, ase boi husahapkon hata on bani pinggol ni sidea, anjaha hudilo langit pakon tanoh on gabe saksingku dompak sidea. [322]

²⁹Ai domma torang hinan hubotoh, anggo domma matei ahu, maningon maruhur magou nasiam, anjaha manlembang hun dalan, na hutonahkon in bani nasiam, halani ai mangonai ma hamagouan bani nasiam bani ari na laho roh, halani na hinorjahon nasiam ai sogam ni uhur ni Jahowa anjaha ipapuho nasiam ringis-Ni marhitei pambahenan ni tangan nasiam.”

³⁰Jadi ihatahon si Musa ma ibogei pinggol ni ganup kuria ni halak Israel hata ni doding on das hubani ujungni.