Read Batak Simalungun 5 MUSA 34 Bible Online

5 MUSA 34 - Batak Simalungun bible

5 MUSA 34

¹Dob ai tangkog ma si Musa hun pamah Moab hu Dolog Nebo, hu pakpak ni Pisga, tontang ni Jeriko. Dob ai ipatuduhkon Jahowa ma hubani ganup tanoh ai, olat ni Gilead das hu Dan, [358]

²ganup Naftali, tanoh Efraim pakon Manase, ganup tanoh Juda das ronsi laut hampit hasundutan,

³tanoh Dangsina pakon tanoh na i pamah Jeriko, huta parkurmaan das hu Zoar.

⁴Dob ai nini Jahowa ma hu bani, “On ma tanoh, na dob Hubulawankon hubani si Abraham, si Isak pakon si Jakob, ningku Do, ʻHubani ginomparmu do bereon-Ku on.ʼ Domma Hupatuduhkon on bam, ididah matamu, tapi seng bulih ho mandipar masuk hujai.” [359]

⁵Jadi matei ma ijai si Musa, juakjuak ni Jahowa i tanoh Moab, songon na dob hinatahon ni Jahowa, [360]

⁶anjaha Jahowa do mananomsi i habungan ai, i tanoh Moab, tontang ni Bet-Peor, anjaha seng dong na mambotoh tanomanni ai ronsi sadari on. (Jud. 9)

⁷Anjaha marumur saratus dua puluh tahun ma si Musa bani parmateini ai, seng gombur ope matani anjaha seng surut gogohni.

⁸Dob ai itangisi halak ma si Musa i pamah Moab tolu puluh ari dokahni; dob ai marujung ma panangision pakon parhoruon bani si Musa. [361]

⁹Dob ai gok tonduy hapentaran ma uhur ni si Josua, anak ni si Nun, ai domma itampeihon si Musa hinan tanganni bani; jadi itangihon halak Israel ma ia, anjaha ihorjahon romban hubani na tinonahkon ni Jahowa hinan hubani si Musa. [362]

¹⁰Anjaha seng dong be jongjong i tongah-tongah ni halak Israel sada nabi songon si Musa, na tinanda ni Jahowa dumpar bohi, [363]

¹¹ibagas haganup tanda pakon halongangan, na sinuruh ni Jahowa bahenonni i tanoh Masir, hubani Parao, hubani ganup juakjuakni pakon bani ganup tanohni,

¹²pakon ibagas haganup tangan na gogoh in pakon ibagas haganup hasonggotan bolon, na binahen ni si Musa i lobei ni ganup Israel.