Read Batak Simalungun 5 MUSA 8 Bible Online

5 MUSA 8 - Batak Simalungun bible

5 MUSA 8

¹Sagala titah, na huparentahkon bamu sadari on, maningon porluhon nasiam do mangkorjahon ai, ase manggoluh nasiam anjaha lambin ganda, anjaha masuk nasiam hu tanoh siteanon nasiam ai, na dob binulawankon ni Jahowa hubani ompung nasiam.

²Anjaha maningon ingatonmu do ganup panogu-noguon ni Jahowa Naibatamu bamu ibagas na ompat puluh tahun on bani dalan na i halimisan, ase Ia patoruh uhurmu, manlanjou ham, laho mananda na ibagas uhurmu barang na ramotanmu do tonah-Ni, barang lang. [94]

³Anjaha Ia do patoruh uhurmu, Ia do paturut ham loheian, anjaha Ia use mambere ham mangan manna, na so tinandamu hinan, barang tinanda ni ompungmu; ase Ia pabotohkon bamu, sedo pitah sagu-sagu hagoluhan ni jolma, tapi manggoluh do jolma tene marhitei atap aha pe na luar hun pamangan ni Jahowa. [95]

⁴Pakeianmu pe seng ra buruk bani angkulamu anjaha naheimu pe seng ra marpura-pura na ompat puluh tahun ai. [96]

⁵Tandai ma ai ibagas uhurmu, na niajaran ni Jahowa Naibatamu do ham, songon bapa mangajari anakni. [97]

⁶Halani ai maningon ramotkononmu do titah ni Jahowa Naibatamu, marhitei na mardalan bani dalanni anjaha na marhabiaran Bani.

⁷Ai Jahowa Naibatamu do na mangarahkon ham hu tanoh na dear, hu tanoh na marbah bolon, marbah tubuh pakon martao, na mabaor i habungan pakon i dolog,

⁸hu tanoh hatubuhan ni gandum pakon jagul, hayu anggur, hayu ara pakon dalima, tanoh na marhayu jetun anjaha na marmanisan ni huramah;

⁹tanoh na so pala marhangaluton panganonmu rutimu ijai, anjaha lang hurangan ham atap bani aha pe, tanoh, na marbosi batuni, anjaha hun dolog-dologni boi do ongkalonmu tombaga.

¹⁰Ia dob mangan ham anjaha bosuran, maningon pujionmu do Jahowa Naibatamu halani tanoh na madear, na dob binere-Ni ai bamu.

¹¹Jaga ma dirimu, ase ulang lupa uhurmu bani Jahowa Naibatamu, gabe lang iramotkon ham tonah-Ni, uhum-Ni pakon aturan-Ni, na hutonahkon in bamu sadari on,

¹²ase ulang ia dob mangan ham anjaha bosuran, anjaha ipauli ham rumah na jenges, anjaha marianan ijai,

¹³sonai homa lombumu pakon biribirimu lambin manggargar, anjaha pirak pakon omas lambin bueini bamu, lambin ganda haganup na dong bamu,

¹⁴gabe gijang uhurmu, anjaha ihalupahon ham Jahowa Naibatamu, na mangarahkon ham luar hun tanoh Masir, hun rumah parjabolonan,

¹⁵na manogu-nogu ham i halimisan na bolak anjaha na majangin, ianan ni ulog darih pakon gansip golang, tanoh dorging na so marisi bah, na paluarhon bamu bah hun dolog batu na mapir sahalian, [98]

¹⁶na mambere ham mangan manna i halimisan, na so tinanda ni ompungmu, laho patoruhkon uhurmu, pakon manlajou ham, laho mambahen marhasonangan ham bani ujungni.

¹⁷Ulang ma hatahon ham ibagas uhurmu, “Gogohku pakon kuasa ni tanganku do na mambere bangku habayakon on.”

¹⁸Maningon ingaton ni uhurmu do Jahowa Naibatamu, ai Ia do na mambere gogoh bamu mansari arta, ase ipahot padan-ni, na dob binulawankon-Ni hubani ompungmu, songon sadari on. [99]

¹⁹Tapi anggo ilupahon uhurmu do Jahowa, Naibatamu, anjaha iirikkon ham naibata na legan, anjaha ibalosi ampa isombah ham ai, hupalumba hinan ma nasiam sadari on, maningon magou tumang ma nasiam.

²⁰Songon bangsa sipajuh begu-begu, na dob niagou ni Jahowa hun lobei nasiam, usih sonai ma nasiam magou halani na so tinangihon nasiam sora ni Jahowa Naibata nasiam in.