Read Batak Simalungun JOHANNES 10 Bible Online

JOHANNES 10 - Batak Simalungun bible

JOHANNES 10

¹“Na sintong tumang do na Huhatahon on bani nasiam, barang ise na so masuk hun labah, laho hu harang ni biribiri, tapi manangkih humbani dalan na legan, panangko do ai anjaha panrampok.

²Tapi na masuk hun labah, ai do siparmahan bani biribiri ai.

³Ungkabon ni sijaga labah ai ma bani, anjaha itangihon biribiri ai do sorani; idilo do sidea bani goranni bei, anjaha iboan hu darat.

⁴Dob ipadarat haganup na adong bani ai, sai i lobei do ia mardalan, anjaha iirikkon biribiri ai do ia, ai itanda sidea do sorani.

⁵Halak na legan nani, seng ra sidea mangihutkon ai, tapi maporus do sidea hun bani, ai seng itanda sidea sora ni na legan ai.”

⁶Limbaga on ma ihatahon Jesus bani sidea, tapi seng iarusi sidea, na hinatahon-Ni ai bani sidea.

⁷Jadi nini Jesus ma use bani sidea, “Na sintong tumang do na Huhatahon on bani nasiam, Ahu do labah laho hubani biribiri in.

⁸Haganup na manlobei Ahu panangko do in anjaha panrampok, tapi seng itangihon biribiri in sidea. [196]

⁹Ahu do labah in; barang ise na masuk hun Bangku, maluah do, kaluar masuk ma ia, anjaha dapotan sampalan.

¹⁰Roh pe panangko, pitah na laho manangko, na manayati ampa mangagou do hansa. Roh do Ahu ase dong hagoluhan bani sidea, anjaha marlobih-lobih. [197]

¹¹Parmahan Na Madear do Ahu. Ibere Parmahan Na Madear do hosah-Ni mangkopkop biribiri-Ni. [198]

¹²Tapi anggo sipangan gaji, na so siparmahan, na so simada biribiri in, ididah pe roh begu, itadingkon do biribiri in laho lintun, gabe isoroh begu ai ma biribiri in anjaha mambur merap ibahen,

¹³ai sipangan gaji do ia, na so mansarihon biribiri in.

¹⁴Ahu do Parmahan Na Madear, Hutanda do na Bangku, anjaha itanda sidea do Ahu, [199]

¹⁵songon Bapa mananda Ahu, anjaha Ahu mananda Bapa. Hubere do hosah-Ku mangkopkop biribiring-Ku, [200]

¹⁶Adong ope biribiring-Ku na legan, na so humbani harang on. Sidea pe dihut do arahkonon-Ku, anjaha tangihonon ni sidea do sorang-Ku, gabe sada hulanan ma ai anjaha sada parmahan. [201]

¹⁷Halani on do, ase ihaholongi Bapa in Ahu, halani Huberehon hosah-Ku, ase Hujalo ai use.

¹⁸Seng dong na mambuat in hun Bangku, humbani rosuh-Ku do in Hubere. Na markuasa do Ahu mamberehon, anjaha na markuasa do Ahu use manjalo in. In ma titah na Hujalo humbani Bapa.” [202]

¹⁹Tubuh ma use parsalisihan i tongah-tongah ni halak Jahudi halani hata ai. [203]

²⁰Buei do humbani sidea na mangkatahon, “Na sibolison do In anjaha na podouan! Mase ma patangi-tangionnima In?” [204]

²¹Na legan mangkatahon, “Sedo sahap ni na sibolison in! Mintor tarungkab sibolis ma mata ni na mapitung?”

²²Dob ai jumpah ma use pesta pabayu rumah panumbahan i Jerusalem, musim borgoh do ijia.

²³Mardalan-dalan do Jesus i emper ni si Salomo, na i rumah panumbahan ai. [205]

²⁴Roh ma halak Jahudi manginggoti-Si, nini sidea ma, “Sadiha dokah on sungkun-sungkun uhurnami bahenon-Mu? Anggo Ham do Kristus in, hatahon Ham ma torang bennami.” [206]

²⁵Balos ni Jesus bani sidea, “Domma Hupatugah bani nasiam, tapi seng porsaya nasiam. Horja na Huhorjahon marhitei goran ni Bapa, ai do manaksihon pasal Ahu.

²⁶Tapi seng porsaya nasiam, ai seng masuk biribiring-Ku nasiam. [207]

²⁷Itangihon biribiring-Ku do sora-Ku, anjaha itanda sidea do Ahu, iirikkon sidea do Ahu. [208]

²⁸Hubere do bani sidea hagoluhan na sadokah ni dokahni; seng magou sidea sadokah ni dokahni, anjaha ise pe lang boi manrampas sidea humbani tangan-Ku.

²⁹Banggalan humbani haganup do Bapa, na mamberehon sidea ai Bangku, anjaha ise pe lang boi manrampas sidea humbani tangan ni Bapa.

³⁰Sada do Ahu pakon Bapa in.”

³¹Dob ai ibuat halak Jahudi ma use batu, laho manggijig-Si.

³²Tapi nini Jesus ma hubani sidea, “Buei do horja na madear humbani Bapa Hupatuduhkon bani nasiam. Halani horja do, ase sihol pargijigon nasiam Ahu?” [209]

³³Balos ni halak Jahudi, “Sedo halani horja na madear, ase sihol pargijigonnami Ham, tapi halani pangapasi-Mu ai do, ai ipados Ham do diri-Mu pakon Naibata, age pe jolma do Ham.” [210]

³⁴Dob ai ibalosi Jesus ma sidea, “Ai lang adong do tarsurat bani titah nasiam, ʻDomma Huhatahon, Naibata do nasiam?ʼ [211]

³⁵Anggo igoran Naibata, hadasan ni hata ni Naibata, anjaha seng tarkahua Surat in,

³⁶mase ma hatahonon nasiam hubani na pinapansing ni Naibata, anjaha na sinuruh-Ni hu dunia on, ʻSiapasi Naibata do Ham,ʼ halani Huhatahon, Anak ni Naibata do Ahu? [212]

³⁷Ambit lang Huhorjahon horja ni Bapa, age ulang porsaya nasiam Bangku.

³⁸Tapi anggo Huhorjahon do, hape lang porsaya nasiam Bangku, bani horja in ma nasiam porsaya, ase ibotoh anjaha itanda nasiam, ibagas Ahu do Bapa in, anjaha Ahu ibagas Bapa in.”

³⁹Dob ai sihol ma tangkapon ni sidea Ia, tapi maluah do Ia hun tangan ni sidea. [213]

⁴⁰Dob ai laho ma Ia use hu dipar ni bah Jordan, ai ma hu pandidian ni si Johannes hinan, lanjar marianan ijai.

⁴¹Anjaha buei do halak na roh marayak-Si, nini sidea ma, “Seng adong namin ibahen si Johannes tanda halongangan, tapi haganup na hinatahon ni si Johannes pasal Halak on, sintong do.”

⁴²Jadi buei do halak, na gabe porsaya Bani ijai.