Read Batak Simalungun JOHANNES 11 Bible Online

JOHANNES 11 - Batak Simalungun bible

JOHANNES 11

¹Adong ma sada halak na boritan, si Lasarus, na hun Betania, ai ma huta ni si Maria ampa si Marta saninani ai. [214]

²Ai ma si Maria, na ongga mamminaki Tuhan in, dob ai na mangapusi nahei-Ni marhitei jambulanni. Botouni do si Lasarus na boritan ai. [215]

³Isuruh botouni ai ma na mangkatahon Bani, “Ham Tuhan, boritan do na hinaholongan ni uhur-Mu!”

⁴Mambogei ai Jesus, nini ma, “Sedo hamatean ujung ni naborit ai, tapi bahen hasangapon ni Naibata do ai, ase marsangap Anak ni Naibata marhitei ai.” [216]

⁵Tapi holong do uhur ni Jesus bani si Marta, bani saninani ai ampa bani si Lasarus.

⁶Anjaha dob ibogei na boritan do ia, soh ope Ia dua ari nari bani ianan-Ni ai.

⁷Dob salpu ai, nini ma hubani susian-Ni ai, “Eta, laho ma hita use hu Judea!”

⁸Nini susian-Ni ai ma hu Bani, “Guru, baru ope sihol pargijigon ni halak Jahudi Ham, ai ulakan-Mu ope hujai?” [217]

⁹Balos ni Jesus, “Ai lang sapuluh dua jam do sadari? Barang ise na mardalan arian, seng tartolsu ai, ai ididah do panondang ni dunia on. [218]

¹⁰Tapi barang ise na mardalan borngin, tartolsu do, ai seng dong panondang bani.” [219]

¹¹Dob ihatahon sonai, nini ma hubani sidea, “Ia si Lasarus, huan-huanta ai, domma modom; tapi na laho ma Ahu hujai mamuhoisi.” [220]

¹²Jadi nini susian-Ni ai ma hu Bani, “Ham Tuhan, anggo na modom do ia, na laho malum do.”

¹³Pasal parmateini do na hinatahon ni Jesus ai; tapi ninuhur ni sidea pasal na sinok modom do.

¹⁴Jadi ihatahon Jesus ma torang bani sidea, “Domma matei si Lasarus,

¹⁵anjaha halani hanima malas do uhur-Hu lang ijai ahu, ase porsaya hanima; tapi laho ma hita marayaksi.”

¹⁶Marsahap ma si Tomas, na ginoran si Rindu-rindu, hubani hasomanni susian ai, “Eta ma tongon laho, ase rap matei hita pakon-Si!”

¹⁷Jadi dob das ijai, domma pala ompat ari ia ibagas tanoman jumpah-Si.

¹⁸Ia huta Betania, dohor do ai hun Jerusalem, hira-hira tolu batu do daohni.

¹⁹Buei do roh halak Jahudi marayak si Marta pakon si Maria, laho mangapoh sidea halani botou ni sidea ai.

²⁰Dob ibogei si Marta na dob roh Jesus, laho ma ia mangalo-alo-Si; tading i rumah do anggo si Maria.

²¹Jadi nini si Marta ma bani Jesus, “Ambit ijon Ham Tuhan, seng matei botouhin!

²²Tapi sonari pe, hubotoh do, atap aha pe ipindo Ham humbani Naibata, sai na bereon-Ni do Bamu.”

²³Ihatahon Jesus ma hu bani, “Na laho puho do botoumai!”

²⁴Nini si Marta ma hu Bani, “Eak, hubotoh do, na puho do ia bani parpuhoon simagira.” [221]

²⁵Ihatahon Jesus ma hu bani, “Ahu do parpuhoon ampa hagoluhan. Sai manggoluh do na porsaya Bangku, age pe matei ia.

²⁶Anjaha ganup na manggoluh anjaha na porsaya Bangku, seng anjai matei ia sadokah ni dokahni! Porsaya do ho ijai?” [222]

²⁷Nini ma hu Bani, “Eak Tuhan, porsaya do ahu, Ham do Kristus, Anak ni Naibata, na roh hu dunia on.” [223]

²⁸Jadi dob ihatahon sonai, laho ma ia mandilo si Maria, anggini ai, ihusipkon ma, “Domma roh Guru in, idilo do ho!”

²⁹Mambogei ai si Maria tarolos ma ia jongjong, laho manjumpahkon-Si,

³⁰ai lape das Jesus i huta ai, tapi bani parjumpahan-Ni pakon si Marta ai ope Ia. [224]

³¹Ia halak Jahudi na adong i rumah ai rap pakon si Maria, laho mangapohsi, dob ididah sidea tarolos si Maria jongjong laho hu darat, iirikkon sidea ma ia, ai iagan sidea na laho hu tanoman do ia tangis.

³²Das honsi si Maria hu parsaranan ni Jesus, anjaha ijin ididah Ia, manrogop ma ia hu lobei-Ni, anjaha ihatahon ma, “Ambit ijon Ham Tuhan, seng matei botouhai!”

³³Dob ididah Jesus ia na tangis ai, sonai homa halak Jahudi hasomanni na roh ai tangis-tangis do, jadi manringis ma Ia anjaha bulinsah,

³⁴lanjar nini ma, “Ija do itibalhon nasiam ia?” Nini sidea ma hu Bani, “Roh ma Ham, anjaha idah Ham ma, Tuhan!”

³⁵Jesus pe tangis ma. [225]

³⁶Jadi nini halak Jahudi ma, “Tongor ma, holong ni uhur-Ni in bani!”

³⁷Tapi deba humbani sidea mangkatahon, “Ia, na mangungkab mata ni na mapitung, seng tarbahen-Si gakni, ase ulang matei halak on?”

³⁸Jadi manringis ma use Jesus, das honsi Ia hu tanoman ai. Batu na niliang do ai, lanjar batu do tutupni. [226]

³⁹Nini Jesus ma, “Angkat nasiam ma batu in!” Jadi nini si Marta, botou ni na dob matei ai ma, “Tuhan, domma marbau, ai domma pala ompat ari ia matei.”

⁴⁰Nini Jesus ma hu bani, “Ai lang domma Huhatahon bam, idahonmu do hasangapon ni Naibata, anggo porsaya ho?” [227]

⁴¹Jadi iangkat sidea ma batu ai. Mangkawah ma Jesus dompak babou anjaha nini ma, “Ham Bapa, tarima kasih ma Bamu, halani itangihon Ham Ahu!

⁴²Hubotoh do, tongtong do Ahu itangihon Ham, tapi halani na mabuei, na jongjong maringgot on do, ase Huhatahon in, ase porsaya sidea, na sinuruh-Mu do Ahu.” [228]

⁴³Jadi dob ihatahon sonai, ipagogoh ma sora-Ni mandilohon, “Lazarus, kaluar ma ho!”

⁴⁴Jadi luar ma tongon na matei ai; lilit ope hiou bani naheini ampa tanganni sonai hiou panrungkub bani bohini. Ihatahon Jesus ma, “Tanggali nasiam ma ia, ase boi ia mardalan.”

⁴⁵Jadi buei ma humbani halak Jahudi, na roh hubani si Maria ai, na gabe porsaya Bani, dob ididah sidea na binahen ni Jesus.

⁴⁶Tapi deba humbani sidea laho do marayak halak Parisei, laho patugahkon na binahen ni Jesus ai bani sidea.

⁴⁷Jadi iadongkon sintua ni malim ampa Parisei ma rapot banggal, ihatahon sidea ma, “Aha ma bahenonta? Ai buei do tanda ibahen Halak in!

⁴⁸Anggo ipaturut hita Ia sonin, porsaya ma halak haganupan Bani, gabe roh ma holi halak Rom manrampas tanohta ampa bangsanta.” [229]

⁴⁹Tapi sada humbani sidea, ai ma si Kayapas, sintua ni malim bani na satahun ai mangkatahon bani sidea, “Na hurang uhur do nasiam!

⁵⁰Seng ipingkirhon nasiam, paboa dearan do matei sada halak mangkopkop halak na mabuei in, humbani na magou ganup bangsa in.” [230]

⁵¹Sedo humbani dirini ihatahon ai; tapi halani sintua ni malim do ia bani na satahun ai, ase ijahai, na sihol matei ma Jesus mangkopkop bangsa in. [231]

⁵²Seng pitah mangkopkop bangsa in, tapi sihol patumpuon-Ni do age anak ni Naibata na marserak in ase gabe sada in. [232]

⁵³Mulai humbani ari ai manriah ma sidea laho mamunuh-Si.

⁵⁴Jadi lang be talar-talar mardalani Jesus i tongah-tongah ni halak Jahudi, tapi laho ma Ia hunjai hu sada nagori, dohorhon halimisan, hu huta na margoran Efraim; ijai ma Ia marianan ampa susian-Ni ai.

⁵⁵Tapi dohor ma Pesta Paskah ni Jahudi, jadi buei ma halak na tangkog hun nagori ai hu Jerusalem, paima Paskah ai, laho manguras dirini. [233]

⁵⁶Ipindahi sidea ma Jesus, anjaha marsisungkunan ma sidea, sanggah jongjong-jongjong sidea i rumah panumbahan ai. Sonaha do ninuhur nasiam? Na so roh do Ia nani hu pesta on?

⁵⁷Ai domma iparentahkon sintua ni malim ampa Parisei, ase ipatugah anggo adong na mambotoh, atap ija Ia marianan, ase boi tangkapon ni sidea Ia.