Read Batak Simalungun JOHANNES 12 Bible Online

JOHANNES 12 - Batak Simalungun bible

JOHANNES 12

¹Onom ari nari paima Paskah ai, das ma Jesus hu huta Betania, ianan ni si Lasarus, na pinuhoan ni Jesus humbani na matei. [234]

²Jadi ipasirsir sidea ma ijai sipanganon Bani, anjaha si Marta do marugas; si Lasarus ma sada hasomanni, na mangan ai ijai.

³Jadi ibuat si Maria ma sakati minak nardus na maharga anjaha na so maragu; iminaki ma nahei ni Jesus, anjaha jambulanni do ibahen manlapui. Jadi igoki misbou ni minak ai ma rumah ai. [235]

⁴Sada humbani susian-Ni, ai ma si Judas Iskariot, na sihol mantahihon-Si ai, mangkatahon,

⁵“Mase ma lang na jual minak in harga tolu ratus dinar, ase naberehon in bani halak na masombuh?”

⁶Ihatahon pe sonai, sedo na masombuh sinarihonni ijai; panangko do ia tene, anjaha halani ia sijolom parduitan, somal do ia buat-buat hunjai. [236]

⁷Jadi nini Jesus ma, “Paturut ma ia, ai ibahen do in sahira hubani ari pananom-Ku.

⁸Ai tongtong do adong na masombuh i tongah-tongahnima, tapi anggo Ahu, seng totap i lambungnima.” [237]

⁹Jadi buei ma humbani halak Jahudi na mambotoh, na dob ijai Ia; jadi marrohan ma sidea, sedo pitah halani Jesus, tapi sihol idahon ni sidea do homa si Lasarus na dob pinapuho ai humbani na matei.

¹⁰Ia sintua ni malim domma manriah hinan sihol mamunuh si Lasarus homa,

¹¹ai halanisi buei do halak Jahudi na laho hujai, gabe porsaya bani Jesus.

¹²Patarni ai, dob ibogei halak na mabuei, na roh bani pesta ai, na roh ma Jesus hu Jerusalem,

¹³jadi ibuat sidea ma bulung-bulung ni palem, laho mangalo-alo-Si lanjar mandilo-dilohon, “Hosianna! Pinasu-pasu ma na roh marhitei goran ni Tuhan in, Raja ni Israel!” [238]

¹⁴Jadi dapot Jesus ma sada halode ajar-ajar, ai ma iajak domu hubani na tarsurat in, [239]

¹⁵“Ulang ho mabiar, ale boru Sion. Tonggor ma, Rajamu do na roh, mangajak halode poso-poso.”

¹⁶Seng dong iarusi susian-Ni ai hinan pasal ai; dob pe marsangap Jesus, ase idingat sidea, na marhahonaan hu Bani do hape na tarsurat ai ampa pambahen ni sidea hu Bani.

¹⁷Lanjar isaksihon halak na mabuei, na rap pakon-Si ai do, paboa na dob idilo do si Lasarus humbani tanoman, laho mamuhoi-Si humbani na matei.

¹⁸Ase ialo-alo halak na mabuei ai pe Ia, halani na dob ibogei sidea do tanda halongangan na binahen-Ni ai.

¹⁹Jadi nini halak Parisei ma samah sidea, “Tonggor ma, na so marguna do hape na binahen nasiam in, ai ganup do dunia on mangirikkon-Si.” [240]

²⁰Adong do deba halak Gorik i tongah-tongah ni halak na tangkog ai, laho martonggo bani ari Pesta ai.

²¹Jadi iparayak sidea ma si Pilippus, na hun Betsaida, na i Galilea, nini sidea ma, “Tuannami, sihol do idahonnami Jesus.” [241]

²²Laho ma si Pilippus patugahkon ai bani si Andreas; si Andreas pe laho ma rap pakon si Pilippus patugahkon ai bani Jesus.

²³Jadi nini Jesus ma mambalosi sidea, “Na dob jumpah ma panorangni, ase marsangap Anak ni Jolma in!

²⁴Na sintong tumang do na Huhatahon on bannima, seng na ganda omei in, anggo seng madabuh hu tanoh anjaha matei, dob pe matei, ase buei buahni. [242]

²⁵Agouan hosah do na mangkaholongi hosahni, tapi na mangkasogamkon hosahni i dunia on, ai do na manramotkonsi das hu hagoluhan sisadokah ni dokahni. [243]

²⁶Barang ise na sihol mambalosi Ahu, iirikkon ma Ahu; anjaha ia ija Ahu, ijai do juakjuak-Ku. Barang ise na mambalosi Ahu, pasangapon ni Bapa in do ia. [244]

²⁷Na bulinsah do uhur-Hu nuan. Aha ma sihatahonon-Ku? Ham Bapa, paluah Ham ma Ahu humbani panorang on. Tapi tene, halani in do ase das Ahu bani panorang on. [245]

²⁸Ham Bapa, pasangap Ham ma goran-Mu!” Dob ai roh ma sora hun nagori atas, “Domma Hupasangap, lanjar pasangapon-Ku do use!”

²⁹Ibogei halak na mabuei, na jongjong ijai ma ai, gabe ihatahon sidea ma, “Longgur do ai!” Na legan mangkatahon, “Malekat do na marsahap pakon-Si!”

³⁰Nini Jesus ma mambalosi, “Sedo halani Ahu ase roh sora ai, halani nasiam do. [246]

³¹Sonari ma mardalan uhum bani dunia on, sonari ma sipabalion raja ni dunia on. [247]

³²Anggo Ahu, dob ipagijang Ahu hun dunia on, tarikon-Ku do haganup sidea Bangku.”

³³Ihatahon do ai laho patidakkon parmatei-Ni holi.

³⁴Ibalosi halak na mabuei ai ma Ia, “Ibogei hanami humbani titah in, na totap do Kristus in ronsi sadokah ni dokahni. Mase ma ihatahon Ham, maningon pagijangon do Anak ni Jolma in? Ise do Anak ni Jolma in?” [248]

³⁵Jadi ihatahon Jesus ma bani sidea, “Tongkin nari mando Panondang in bani nasiam. Mardalan ma nasiam, sanggah bani nasiam ope Panondang in, ase ulang idorab na golap in nasiam; na mardalan bani na golap, seng ibotoh atap dompak ja do ia laho. [249]

³⁶Sanggah bani nasiam ope Panondang in, porsaya ma nasiam bani Panondang in, ase gabe anak ni Panondang in nasiam!” Ai ma ihatahon Jesus, dob ai itadingkon ma sidea laho marponop. [250]

³⁷Age pe sonai buei ni tanda ibahen i lobei ni sidea, seng porsaya sidea Bani,

³⁸ase jumpah na hinatahon ni Nabi Jesayas, “Ham Tuhan, ise ma na porsaya bani ambilannami? Anjaha hagogohon ni Tuhan, bani ise ma in talar?” [251]

³⁹Seng tarbahen sidea porsaya, ai sonon ope hata ni si Jesayas, [252]

⁴⁰“Ipapitung do mata ni sidea, anjaha ipahengkeng uhurni, ase ulang marpangidah mata ni sidea, anjaha ulang marpangarusion uhur ni sidea; ulang mulak sidea, ulang malum sidea hubahen.” [253]

⁴¹Sonai do ihatahon si Jesayas, halani ididah hasangapon-Ni ai, anjaha isahapkon pasal-Si. [254]

⁴²Age humbani sipambobai buei do na porsaya Bani, tapi halani biar ni sidea mangidah Parisei, seng ibagas na talar, ase ulang ipabali sidea humbani kuria, [255]

⁴³ai holongan do uhur ni sidea bani hasangapon na humbani jolma, ase hasangapon na humbani Naibata. [256]

⁴⁴Dob ai dilo-dilo ma Jesus, nini ma, “Na porsaya Bangku, sedo Ahu na hinaporsayaanni ai, tapi na marsuruh Ahu do.

⁴⁵Na mangidah Ahu, mangidah na marsuruh Ahu do. [257]

⁴⁶Ahu do Panondang na roh hu dunia on, ase ulang marianan ibagas na golap sagala na porsaya Bangku. [258]

⁴⁷Anggo adong na manangar hatang-Ku, hape seng ihorjahon, seng Ahu na manguhumisi; ai seng roh Ahu, laho manguhum dunia on, tapi laho paluahkon do. [259]

⁴⁸Na manulak Ahu anjaha na so manjalo hatang-Ku, domma adong na manguhumsi; hata na Huhatahon ai do manguhumsi bani ari parpudi.

⁴⁹Ai seng humbani diring-Ku Ahu marsahap, tapi Bapa, na marsuruh Ahu, Ia do na mangaturhon Bangku pasal sisahapkonon-Ku ampa sihatahonon-Ku.

⁵⁰Anjaha Hubotoh, hagoluhan sisadokah ni dokahni do titah-Ni in. Ase na Huhatahon in, sonin ihatahon Bapa in Bangku, sonai do Huhatahon.”