Read Batak Simalungun JOHANNES 13 Bible Online

JOHANNES 13 - Batak Simalungun bible

JOHANNES 13

¹Paima pesta Paskah ai, dob ibotoh Jesus, na roh ma panorangni manadingkon dunia on, laho marayak Bapa in, ipataridahkon ma holong-Ni ronsi ujungni na dong Bani i dunia on, songon pangkaholongi-Ni hinan bani sidea.

²Sanggah na mangan ai sidea, domma isuankon sibolis in partahi-tahian hubagas uhur ni si Judas Iskariot, anak ni si Simon. [260]

³Halani ibotoh Jesus do, na dob iondoskon Bapa in haganup hubagas tangan-Ni, Ia roh humbani Naibata anjaha mulak ma hubani Naibata, [261]

⁴gabe jongjong ma Ia humbani na mangan ai, itanggali ma baju ganjang-Ni, ibuat ma basahan lanjar igonditkon ma.

⁵Dob ai iuseihon ma bah hu sambung, iburihi ma nahei ni susian-Ni ai, anjaha iapusi ma ai merhitei basahan na ginonditkon-Ni ai.

⁶Das ma Ia hubani si Simon Petrus, jadi nini si Petrus ma hu Bani, “Mintor Ham ma Tuhan mamurihi naheihu?”

⁷Nini Jesus ma mambalosisi, “Seng iarusi ho nuan na Hubahen on, tapi arusanmu do ai use.”

⁸Nini si Petrus ma hu bani, “Lalab ma lang bulih Ham mamburihi naheihu.” Nini Jesus ma mambalosisi, “Anggo seng Huburihi ho, seng parrupei ho Bangku.”

⁹Nini si Simon Petrus ma, “Tuhan, ulang ma pitah naheihu, dihut ma tangan pakon ulungku!”

¹⁰Dob ai nini Jesus ma hu bani, “Halak na dob pinaridi, seng pala burihan be (sobali naheini), ai domma borsih ia ganupan. Na dob borsih do hanima, tapi seng haganup. [262]

¹¹Ai ibotoh do, na sihol mantahihon-Si, halani ai do, ase ihatahon, “Seng haganup hanima borsih!” [263]

¹²Ase, dob iburihi Jesus nahei ni sidea, ipakei ma use baju ganjang-Ni, hundul ma Ia, lanjar nini ma bani sidea, ai iarusi hanima do na Hubahen in bennima?

¹³Igoran hanima do Ahu Guru anjaha Tuhan, anjaha sintong do pangkatahonnima in, ai in do Ahu tongon. [264]

¹⁴Ase anggo Tuhan anjaha Gurunima mamurihi naheinima, patut ma age hanima marsiburihan nahei! [265]

¹⁵ Ai sitiruon do Hubere bannima, ase ibahen hanima songon na Hubahen in bennima. [266]

¹⁶Na sintong tumang do na Huhatahon on bannima, seng banggalan juakjuak marimbang tuanni, anjaha seng banggalan na sinuruh marimbang na marsuruhsi. [267]

¹⁷ Anggo ibotoh hanima ma in, martuah ma hanima na mangkorjahonsi. [268]

¹⁸Seng dompak hanima ganupan hatang-Kin, Hutanda do na dob Hutodoh. Tapi ase saud na tarsurat in, ʻNa mangan ruti rap pakon Ahu, in do na manadahkon neheini dompak Ahu.ʼ [269]

¹⁹Hupatugah hinan in bannima paima masa, ase porsaya hanima, anggo masa ma in, paboa Ahu do in.

²⁰Na sintong tumang do na Huhatahon on bannima, na manjalo na Husuruh, Ahu do na jinaloni ai, anjaha na manjalo Ahu, manjalo na marsuruh Ahu do.” [270]

²¹Dob ihatahon Jesus ai, bulinsah ma Ia, nini ma manaksihon, “Na tongon tumang do na Huhatahon on bennima: Sahalak hun bennima sihol mantahihon Ahu.” [271]

²²Marsikawahan ma susian ai, jut ma uhur ni sidea, atap ise do na hinatahon-Ni ai.

²³Sada humbani susian ai, na hinaholongan ni Jesus, hundul dohor i lambung-Ni.

²⁴Jadi ihilap si Petrus ma ia, ihatahon ma bani, “Sungkun ma, ise do na hinatahon-Ni ai!”

²⁵Ipadohor ma hu lambung ni Jesus, nini ma hu Bani, “Tuhan, ise do ai?”

²⁶Ibalosi Jesus ma ia, “Hu bani ise Huberehon na santopik on, dob Husornobkon, ai ma ia.” Jadi isornobkon ma ruti na santopik ai, iberehon ma ai bani si Judas Iskariot, anak ni si Simon ai.

²⁷Jadi dob ijalo ai, masuk ma sibolis bani. Ihatahon Jesus ma hu bani, “Podas ma bahen sibahenonmin!” [272]

²⁸Tapi seng dong humbani sidea na mangan ai, na mangarusi na hinatahon-Ni ai.

²⁹Ai halani si Judas do sijolom parduitan ai, gabe iagan na deba ma, na ihatahon Jesus do ia mamboli na porlu bani pesta ai, atap marsibere-bere bani na masombuh. [273]

³⁰Ase dob ijalo si Judas na santopik ai, mintor laho ma ia hu darat, tapi domma bagas borngin.

³¹Jadi dob laho ia hu darat, ihatahon Jesus ma, “Sipasangapon ma nuan Anak ni Jolma in, anjaha Naibata marsangap marhiteihon-Si.

³²Anggo marsangap Naibata marhiteihon-Si, pasangapon ni Naibata ma Ia ibagas Dirini, anjaha barah ma Ia pasangapon-Ni. [274]

³³Hanima anak-anakku, tongkin nari mando Ahu rap pakon hanima. Pindahannima ma Ahu; songon na dob Huhatahon bani halak Jahudi, sonai do hatahonon-Ku bannima, seng tarbahen hanima roh hubani siparayakon-Kai. [275]

³⁴ Titah na baru do Hubere bannima, ai ma, ase marsihaholongan hanima samah hanima. Songon holong ni uhur-Hu bannima, sonai ma marsihaholongan hanima. [276]

³⁵ Hunjon ma botohon ni ganup halak susian-Ku hanima, anggo marsihaholongan hanima.”

³⁶Nini si Simon Petrus ma, “Tuhan, huja Ham laho?” Balos ni Jesus, “Seng tarihutkon ho ope Ahu bani siparayakon-Kai anggo sonari, use pe ase ihutkononmu Ahu.” [277]

³⁷Nini si Petrus ma hu Bani, “Tuhan, mase lang tarihutkon ahu Ham sonari? Hosahku pe ra do ahu memberehon mangkopkop Ham!”

³⁸Balos ni Jesus, “Hosahmu berehononmu mangkopkop Ahu? Na sintong tumang do na Huhatahon on bam, lape martahuak dayok, domma tolu hali Ahu parnalangonmu.”