Read Batak Simalungun JOHANNES 14 Bible Online

JOHANNES 14 - Batak Simalungun bible

JOHANNES 14

¹Ulang ma tonjan uhurnima! Porsaya ma hanima bani Naibata, anjaha porsaya ma homa Bangku!

²Buei do ianan i rumah ni Bapa. Ambit lang sonai, mintor hatahonon-Ku ma bannima, na laho do Ahu pasirsirhon ianan bannima?

³Anjaha laho pe Ahu pasirsirhon ianan bannima, mulak do Ahu use mangalop hanima, ase rap hanima pakon Ahu. [278]

⁴Anjaha ibotoh hanima do dalan hu ianan siparayakon-Kai.”

⁵Nini si Tomas ma hu Bani, “Seng ibotoh hanami atap huja do Ham laho Tuhan! Sonaha ma pambotohnami bani dalan ai?”

⁶Nini Jesus ma hu bani, “Ahu do dalan in pakon hasintongan ampa hagoluhan. Seng dong na das hubani Bapa in, anggo seng marhiteihon Ahu. [279]

⁷Anggo itanda hanima Ahu, tandaonnima do age Bapa in. Olat ni on tandaonnima ma Ia anjaha idahonnima.”

⁸Nini si Pilippus ma hu Bani, “Tuhan, patuduhkon Ham ma bannami Bapa in, ase sombuh uhurnami!”

⁹Nini Jesus ma hu bani, “Domma pala na sain dokah Ahu rap pakon hanima, lanjar seng itandai ho ope Ahu, ale Pilippus? Na mangidah Ahu, na mangidah Bapa in do. Mase ma hatahononmu, ʻPatuduhkon Ham ma bannami Bapa in?ʼ ” [280]

¹⁰Seng porsaya ho, Ahu ibagas Bapa in anjaha Bapa in ibagas Ahu? Hata na Huhatahon bannima, seng humbani diring-Ku Huhatahon in. Bapa in, na marianan ibagas Ahu, Ia do na mandalankon horja-Ni. [281]

¹¹Porsaya ma hanima Bangku. Ibagas Bapa in do Ahu, anjaha ibagas Ahu do Bapa in. Anggo lang, halani horja in ma hanima porsaya! [282]

¹²Na sintong tumang do na Huhatahon on bannima, horjahonon ni na porsaya Bangku do songon horja na Hubahen in; lobih hunjai ope bahenonni, ai na laho ma Ahu hubani Bapa in. [283]

¹³Ase barang aha pe sipindoonnima marhitei goran-Ku, bahenon-Ku do, ase marsangap Bapa in ibagas Anak in. [284]

¹⁴Barang aha ipindo hanima hun Bangku marhitei goran-Ku, bahenon-Ku do ai.” [285]

¹⁵“Anggo na holong do uhurnima Bangku, dalankononnima do titah-Ku. [286]

¹⁶Anjaha pindoon-Ku ma bani Bapa in, ase ibere bannima sada Pangapiti na legan, ase Ia ma mangkasomani hanima lalab, [287]

¹⁷in ma Tonduy hasintongan in, na so tarjalo dunia on, ai seng ididah anjaha seng itanda. Tapi itanda hanima do Ia, ai na rap ma Ia pakon hanima, anjaha ibagas hanima ma Ia. [288]

¹⁸Seng tadingkonon-Ku hanima tading maetek; na roh ma Ahu marayak hanima.

¹⁹Tongkin nari mando, seng be idahon ni dunia on Ahu, tapi idahonnima do Ahu, ai manggoluh do Ahu, hanima pe manggoluh do. [289]

²⁰Bani na sadari ai ma botohonnima. Ahu ibagas Bapa, hanima ibagas Ahu anjaha Ahu ibagas hanima. [290]

²¹Barang ise na manjolom titah-Ku anjaha idalankon, ai do na marholong ni uhur Bangku. Ihaholongi Bapa do na marholong ni uhur Bangku, anjaha Ahu pe holong do uhur-Hu bani, anjaha patalaron-Ku do diring-Ku bani.” [291]

²²Ihatahon si Judas ma Bani (sedo si Iskariot ai), “Tuhan, aha do halani, ase pitah bannami patalaron-Mu diri-Mu, seng bani dunia on?”

²³Nini Jesus ma mambalosisi, “Barang ise na marholong ni uhur Bangku, horjahononni in do hatang-Ku, jadi haholongan ni Bapa ma ia, gabe roh ma hanami marayaksi, anjaha marianan bani. [292]

²⁴Na so marholong ni uhur Bangku, seng dalankononni in hatang-Ku, anjaha hata na binogeinima in, sedo Ahu simada in, tapi Bapa, na marsuruh Ahu do. [293]

²⁵In ma Huhatahon bennima, sanggah rap ope Ahu pakon hanima.

²⁶Tapi anggo pangapiti in, sisuruhon ni Bapa in marhitei goran-Ku, ajarhonon anjaha pagolpaon ni In do bannima sagala na Huhatahon in bannima. [294]

²⁷ Damei do Hutadingkon bannima, damei na adong Bangku do Hubere bannima. Seng songon pambere ni dunia on pambereng-Ku bannima. Ulang ma tonjan anjaha ulang ma mabiar uhurnima. [295]

²⁸Domma ibogei hanima hatang-Ku bannima, na laho ma Ahu, anjaha na roh ma Ahu marayak hanima. Ambit na holong uhurnima Bangku, malas do uhurnima halani laho Ahu marayak Bapa in, ai banggalan do Bapa in ase Ahu. [296]

²⁹Anjaha sonari Hupatugah hinan ma in bannima, paima masa, ase porsaya hanima masa honsi.

³⁰Seng be buei sahapkonon-Ku bannima, ai na roh ma raja ni dunia on. Seng dong kuasani Bangku; [297]

³¹tapi sihol do botohon ni dunia on, na holong do uhur-Hu bani Bapa in, anjaha sonaha ihatahon Bapa in, sonai do Huhorjahon. Ai pe, jongjong ma hanima, laho ma hita hunjon!” [298]