Read Batak Simalungun JOHANNES 15 Bible Online

JOHANNES 15 - Batak Simalungun bible

JOHANNES 15

¹“Ahu do hayu anggur na tongon, anjaha Bapa do sihorjai pohon in.

²Irotap do sagala ranting-Ku na so marbuah, anjaha ipaborsih do sagala na marbuah, ase ganda buahni.

³Domma borsih hanima halani hata in, na Huhatahon bannima.

⁴Totap ma hanima ibagas Ahu, songon Ahu ibagas hanima! Songon ranting in, na so tarbahen marbuah humbani dirini sandiri, anggo seng totap bani hayu anggur in, sonai ma hanima, anggo seng totap hanima ibagas Ahu.

⁵Ahu do hayu anggur in, hanima do ranting in. Na marianan ibagas Ahu, anjaha Ahu ibagas dirini, in ma na marbuahkon buei, seng tarhorjahon hanima age aha, anggo seng marhasoman Ahu. [299]

⁶Barang ise, na so marianan ibagas Ahu, ambukkonon do ai songon ranting ai gabe masak; ipatumpu ma ai, igijigkon hubagas apuy, jadi mosog ma.

⁷Anggo marianan hanima ibagas Ahu, anjaha marianan hatang-Ku ibagas hanima, Ahu bannima, jumpah hanima do barang aha pe ipindo uhurnima. [300]

⁸Marhitei ai marsangap ma Bapang-Ku, anggo ramos buahnima, anjaha gabe susian-Ku hanima.”

⁹“Songon pangkaholongi ni Bapa Bangku, sonai do holong ni uhur-Hu bannima. Totap ma hanima ibagas holong ni uhur-Hu.

¹⁰Anggo ihorjahon hanima titah-Ku, marianan ma hanima ibagas holong ni uhur-Hu, songon Ahu na mangkorjahon titah ni Bapa, gabe marianan ibagas holong ni uhur-Ni. [301]

¹¹Ase Huhatahon pe in bannima, ase marianan malas ni uhur-Hu ibagas hanima, anjaha gok malas ni uhurnima. [302]

¹²On ma titah-Ku, ase marsihaholongan hanima samah hanima, songon Ahu na mangkaholongi hanima. [303]

¹³Seng dong holong sibanggalan, anggo iberehon sada halak hosahni mangkopkop hasomanni. [304]

¹⁴Huan-Ku ma hanima, anggo ihorjahon hanima na Hutitahkon in bannima. [305]

¹⁵Seng Hugoran be hanima jabolon, ai seng ibotoh jabolon na hinorjahon ni tuanni; huan-huan do hanima Huhatahon, ai domma Hupabotohkon bannima, na Hutangar humbani Bapa.

¹⁶ Sedo hanima mamilih Ahu, tapi Ahu do mamilih hanima, anjaha Hupabangkit do hanima, ase laho hanima marbuah, anjaha ase totap buahnima ai, ase ibere bannima sagala sipindoonnima humbani Bapa in marhitei goran-Ku.

¹⁷ On ma Hutitahkon bannima, marsihaholongan ma hanima samah hanima! ”

¹⁸“Anggo idomdomi dunia on hanima, botoh hanima ma, na dob parlobei do Ahu idomdomi. [306]

¹⁹Ambit na hun dunia on hanima, haholongan ni dunia on do hasomanni, halani seng hun dunia on hanima, tapi Ahu do mamilih hanima hun dunia on, ai do ase idomdomi dunia on hanima. [307]

²⁰Ingat hanima ma hata na dob Huhatahon bannima, seng banggalan jabolon humbani tuanni. Anggo iparburu sidea Ahu, hanima pe parburuonni do. Anggo idalankon sidea hatang-Ku, dalankononni do age hatanima. [308]

²¹Tapi haganupan ai bahenon ni sidea do bannima halani goran-Ku, ai seng itanda sidea na marsuruh Ahu. [309]

²²Ambit seng roh Ahu mansahapkon ai bani sidea, seng mardousa sidea ijai; tapi sonari seng dong be sidalian ni sidea manrungkub dousa ni sidea.

²³Na marsogam ni uhur dompak Ahu, sogam do uhurni homa age dompak Bapa. [310]

²⁴Ambit lang Huhorjahon horja i tongah-tongah ni sidea, na so ongga hinorjahon ni jolma, seng mardousa sidea ijai; tapi domma ididah sidea in sonari, anjaha sogam do uhur ni sidea Bangku age bani Bapa. [311]

²⁵Tapi maningon saud do hata na tarsurat ibagas Buku Titah ni sidea, ʻSogam do uhur ni sidea Bangku, seng dong marhala!ʼ [312]

²⁶Ase rohkonsi Sipangapiti in, sisuruhon-Ku bannima humbani Bapa in, in ma Tonduy Hasintongan in, na roh humbani Bapa in, Ia do manaksihon pasal Ahu. [313]

²⁷Tapi dihut ma hanima manaksihon, ai hasoman-Ku do hanima humbani mungkahni.”