Read Batak Simalungun JOHANNES 17 Bible Online

JOHANNES 17 - Batak Simalungun bible

JOHANNES 17

¹In ma ihatahon Jesus. Dob ai mangkawah ma Ia dompak babou, nini ma, “Ham Bapa, domma jumpah panorangni, pasangap Ham ma Anak-Mu, ase ipasangap Anak-Mu Ham.

²Ai domma ibere Ham kuasa Bani manrajai sagala jolma, laho mamberehon hagoluhan na sadokah ni dokahni bani haganup jolma, na binerehon-Mu Bani. [333]

³ Ia hagoluhan sisadokah ni dokahni, in ma, anggo itanda sidea Ham, Naibata sisada-sada in, na sintong in, ampa Jesus Kristus, na sinuruh-Mu. [334]

⁴Domma Hupasangap Ham i tanoh on, ai domma Hudobkon horja, na binere-Mu Bangku, sihorjahonon-Ku.

⁵Sonari pe Bapa, pasangap Ham ma Ahu hu lambung-Mu, songon sangap-Ku sanggah i lambung-Mu Ahu, sanggah lape adong dunia on.” [335]

⁶“Domma Hupatalar Goran-Mu bani jolma na binere-Mu in Bangku hun dunia on. Ham hinan do simada sidea, anjaha ibere Ham do sidea Bangku; iramotkon sidea do hata-Mu. [336]

⁷Sonari, domma ibotoh sidea, na hun Bamu do haganup na binere-Mu in Bangku.

⁸Ai domma Huondoskon bani sidea hata na binere-Mu in Bangku; domma ijalo sidea hata in, anjaha torang ibotoh sidea Ahu bingkat hun Bamu, anjaha domma porsaya sidea, Ham do marsuruh Ahu. [337]

⁹Hutonggohon do sidea. Sedo dunia on Hutonggohon, sidea on do, na binere-Mu in Bangku, ai Ham do simada sidea. [338]

¹⁰Anjaha sagala na adong Bangku, na adong Bamu do in, anjaha na adong Bamu, na adong Bangku do in, anjaha domma marsangap Ahu ibagas sidea. [339]

¹¹Seng be i dunia on Ahu, tapi i dunia on ope sidea, anjaha na roh ma Ahu marayak Ham. Ham Bapa na mapansing, ramotkon Ham ma ibagas goran-Mu, sidea na binere-Mu in Bangku, ase sada sidea songon Hita.

¹²Sadokah rap Ahu pakon sidea, Ahu do manramotkon ibagas goran-Mu, sidea na binere-Mu in Bangku, anjaha Hujagai, gabe seng dong na magou humbani sidea, sobali jolma magou in, ase saud hata ni Surat in. [340]

¹³Tapi na roh ma Ahu nuan marayak Ham, anjaha ganupan in Husahapkon sanggah i dunia on ope Ahu, ase gok bani sidea malas ni uhur na Bangku in. [341]

¹⁴Domma Huondoskon hata-Mu bani sidea; sogam do uhur ni dunia on bani sidea, ai seng humbani dunia on sidea, songon Ahu na so hun dunia on. [342]

¹⁵Seng Hupindo, ase buaton-Mu sidea hun dunia on, tapi ase iramotkon Ham do sidea dompak pangagou. [343]

¹⁶Seng hun dunia on sidea, songon Ahu na so hun dunia on.

¹⁷ Papansing Ham ma sidea ibagas hasintongan; hata-Mu do hasintongan. [344]

¹⁸Songon parsuruh-Mu Bangku hu dunia on, sonai do Husuruh sidea hu dunia on. [345]

¹⁹Hupapansing do diring-Ku mangkopkop sidea, ase gabe pansing sidea ibagas hasintongan.” [346]

²⁰“Sedo pitah sidea Hutonggohon, tapi dihut do na sihol porsaya Bangku, halani hata ni sidea, [347]

²¹ase sada sidea haganup, songon Ham Bapa ibagas Ahu, anjaha Ahu ibagas Ham, sonai ma age sidea ibagas Hita, ase porsaya dunia on, Ham do marsuruh Ahu. [348]

²²Domma Huberehon bani sidea hasangapon na binere-Mu in Bangku, ase sada sidea, songon Hita na sada. [349]

²³Ahu ma ibagas sidea, anjaha Ham ibagas Ahu, ase gok dear ni hasadaon ni sidea, gabe ibotoh dunia on, Ham do na marsuruh Ahu anjaha na holong do uhur-Mu bani sidea, songon holong ni uhur-Mu Bangku. [350]

²⁴Ham Bapa, sihol do uhur-Hu, ia ijin Ahu, ijin ma pakon na binere-Mu in Bangku, ase ididah sidea hasangapon-Ku, na binere-Mu in Bangku, ai domma holong uhur-Mu Bangku, paima tombei dunia on. [351]

²⁵Ham Bapa na bonar, ia lang pe itanda dunia on Ham, anggo Ahu Hutanda do Ham, anjaha ibotoh sidea on, Ham do marsuruh Ahu.

²⁶Domma Hupabotohkon bani sidea goran-Mu, anjaha pabotohkonon-Ku do ope, ase ibagas sidea holong ni uhur-Mu na hu Bangku in, anjaha ase Ahu ibagas sidea.”