Read Batak Simalungun JOHANNES 18 Bible Online

JOHANNES 18 - Batak Simalungun bible

JOHANNES 18

¹Jadi dob ihatahon Jesus sonai, misir ma Ia rap pakon susian-Ni hu dipar ni Bah Kidron. Adong ma ijai sada pohon, hujai ma Ia laho pakon susian-Ni. [352]

²Tapi ibotoh si Judas, sipartahi-tahi ai do homa ianan ai, ai gati do Jesus hujai rap pakon susian-Ni. [353]

³Ia si Judas, iarahkon ma tentara ampa juakjuak ni malim ampa Parisei, jadi ijumpahkon ma hujai, marrigapan, marsuluh ampa marsinjata.

⁴Halani ibotoh Jesus do haganupan na sihol masa Bani, roh ma Ia manjumpahkon sidea, nini ma hubani sidea, “Ise do na pinindahan nasiam?” [354]

⁵Nini sidea mambalosi, “Jesus, na hun Nazaret!” Nini Jesus ma hubani sidea, “Ahu do in!” Dihut do si Judas sipartahi-tahi ai jongjong i lambung ni sidea.

⁶Sanggah ihatahon hubani sidea, “Ahu do in,” surut ma sidea mangkatompas hu tanoh.

⁷Dob ai iulaki ma manungkun sidea, “Ise do na pinindahan nasiam?” Jadi nini sidea ma, “Jesus na hun Nazaret!”

⁸Balos ni Jesus, “Domma Huhatahon bani nasiam, ʻAhu do in!ʼ Anggo Ahu do na pinindahan nasiam, palopas nasiam ma laho halak on. [355]

⁹Ase saud hata na hinatahon in, ʻSeng dong na magou age sada humbani na binere-Mu in Bangku.ʼ ” [356]

¹⁰Ia si Simon Petrus marpodang do, isintak ma ai anjaha itampulhon hubani jabolon ni sintua ni malim ai, gabe rotap ma pinggolni siamun. Si Malkus do goran ni jabolon ai.

¹¹Ihatahon Jesus ma hubani si Petrus, “Sarungkon ma podangmin! Ai lang maningon inumon-Ku do panginuman, na binere ni Bapa in Bangku?” [357]

¹²Dob ai itangkap tentera ampa kopala ni sidea pakon juakjuak ni Jahudi ai ma Jesus, lanjar isangkut ma.

¹³Jadi iboan sidea ma Ia parlobei bani si Hannas, ai ma tulang ni si Kayapas, sintua ni malim bani na satahun ai.

¹⁴Ai ma si Kayapas, na mangkatahon hinan bani Jahudi, “Dearan do matei sada halak mangkopkop bangsa in.” [358]

¹⁵Ia si Simon Petrus pakon susian na sada nari, iirikkon sidea do Jesus. Na marsitandaan do susian na sada ai ampa sintua ni malim ai, jadi masuk ma ia rap pakon Jesus hu alaman ni rumah ni sintua ni malim ai.

¹⁶Tapi jongjong do si Petrus i darat dohorhon labah. Jadi luar ma susian na sada ai, na marsitandaan pakon sintua ni malim ai, marsahap ma ia pakon naboru sijaga labah ai, gabe iarahkon ma si Petrus hubagas.

¹⁷Jadi nini naboru sijaga labah ai ma bani si Petrus, “Ai lang ho do sada susian ni halak on?” Balos ni si Petrus, “Sedo ahu in!”

¹⁸Tapi na jongjong do ijai jabolon pakon juakjuak mandadang bani pandadangan, na pinagara ni sidea halani borgohni. Rap pakon sidea do jongjong si Petrus mandadang ijai.

¹⁹Jadi isungkun sintua ni malim ai ma Jesus pasal susian-Ni ampa pasal podah-Ni.

²⁰Ibalosi Jesus ma ia, “Torang-torang do hatang-Ku bani halak na mabuei. Tongtong do Ahu mangajari i parguruan pakon i rumah panumbahan, ai ma ianan partumpuan ni ganup halak Jahudi, anjaha seng dong marponopan Ahu marsahap. [359]

²¹Mase Ahu isungkun ham? Sungkun ham ma sidea, na mambogei hatang-Kai! Ibotoh sidea do na Huhatahon ai.”

²²Dob ihatahon Jesus sonai, ipastap sada juakjuak na jongjong ijai ma Ia, lanjar nini ma, “Mintor sonai ma parbalos-Mu bani sintua ni malim in?”

²³Nini Jesus ma mambalosisi, “Anggo na salah parsahap-Kai, patugah ham ma salahni, tapi anggo na sintong do, mase ma ipastap ham Ahu?”

²⁴Ase isuruh si Hannas ma Ia sangkut hubani sintua ni malim, na margoran si Kayapas.

²⁵Ia si Simon Petrus ijai ope jongjong mandadang. Jadi nini sidea ma hu bani, “Ai lang ho do sada susian-Ni?” Jadi iporsou ma nini ma, “Seng ahu in!”

²⁶Dob ai roh ma sada halak humbani juakjuak ni sintua ni malim, ai ma sindohor ni parpinggol na tinampul ni si Petrus ai, mangkatahon hu bani, “Ai lang huidah do ho rap pakon-Si i pohon ai?”

²⁷Jadi iporsou si Petrus ma use, dob ai mintor martahuak ma dayok.

²⁸Jadi girah sogod, iboan sidea ma Jesus hun lobei ni si Kayapas hu benteng ai. Tapi seng masuk sidea hu benteng ai, ase ulang tarpantang sidea, laho mangankon Paskah ai.

²⁹Jadi luar ma si Latus manjumpahkon sidea, nini ma, “Pasal aha do pangaduan nasiam dompak Halak on?”

³⁰Nini sidea ma mambalosisi, “Ambit seng siparjahat Halak on, seng anjai ondoskononnami Ia bamu.”

³¹Nini si Latus ma hubani sidea, “Boan nasiam ma Ia, uhumi nasiam ma Ia domu hubani aturan nasiam.” Nini halak Jahudi ma hu bani, “Seng bulih bunuhonnami atap ise pe.” (bd. 19; 6, 7)

³²Ase jumpah ma ijai na hinatahon ni Jesus hinan pasal dalan ni parmatei-Ni. [360]

³³Jadi masuk ma use si Latus hubagas benteng ai, idilo ma Jesus anjaha nini ma hu Bani, “Atene, Ham do Raja ni Jahudi?”

³⁴Ibalosi Jesus ma, “Na humbagas uhurmu do na hinatahonmu in, atap hata ni halak do in bamu pasal Ahu?”

³⁵Ibalosi si Latus ma, “Ai halak Jahudi do ahu? Bangsa-Mu ampa sintua ni malim ai do padaskon Ham bangku. Ai aha dong ihorjahon Ham?”

³⁶Balos ni Jesus, “Ia Harajaon-Ku seng na hun dunia on ai. Ambit na hun dunia on Harajaon-Ku, seng tarbahen lang manlawan juakjuak-Ku, ase ulang hona ondoskon Ahu hubani halak Jahudi; tapi seng sisonin Harajaon-Kin!”

³⁷Jadi nini si Latus ma hu Bani, “Ase Raja do Ham?” Balos ni Jesus, “Songon na hinatahonmu in ma tongon. Raja do Ahu! Ase tubuh pe Ahu, anjaha ase roh pe Ahu hu dunia on, laho manaksihon hasintongan in do. Barang ise na humbani hasintongan, tangihononni in do sorang-Ku.” [361]

³⁸Nini si Latus ma hu Bani, “Aha do hasintongan?” Jadi dob ihatahon sonai, luar ma ia use marayak Jahudi, nini ma hubani sidea, “Seng dong jumpah ahu salah-Ni!

³⁹Tapi tene, somal do hupaluah sada halak bani nasiam sanggah Paskah. Marosuh do nasiam, ase hupaluah bani nasiam Raja ni Jahudi in?”

⁴⁰Gabe isurakkon sidea ma use, “Ulang Ia! Si Barabas ma!” Tapi panrampok do anggo si Barabas.