Read Batak Simalungun JOHANNES 19 Bible Online

JOHANNES 19 - Batak Simalungun bible

JOHANNES 19

¹Dob ai itogu si Latus ma Jesus anjaha ihatahon ma Ia lonsingan.

²Idandan tentara ai ma sada sortali humbani ranting-ranting na marduri anjaha inahkon ma ai hubani ulu-Ni; ibahen ma Ia homa marbaju sigerger.

³Dob ai roh ma sidea hu lobei-Ni, nini ma, “Tabi ma Bamu, ale Raja ni Jahudi!” Lanjar ipastapi ma Ia.

⁴Luar ma si Latus, ihatahon ma hubani halak Jahudi, “Tonggor ma, huboan do Ia hu lobei nasiam, ase ibotoh nasiam, na so adong jumpah ahu salah-Ni.”

⁵Jadi luar ma Jesus marsotali duri anjaha marbaju sigerger. Ihatahon si Latus ma bani sidea, “Tonggor nasiam ma Jolma in!”

⁶Jadi dob ididah sintua ni malim ampa juakjuak ai Ia, idilohon sidea ma, “Parsilangkon, parsilangkon ma Ia!” Ihatahon si Latus ma bani sidea, “Boan nasiam ma Ia anjaha parsilangkon nasiam ma! Seng dong jumpah ahu salah-Ni.”

⁷Ibalosi halak Jahudi ma ia, “Adong do undang-undang bannami, anjaha mangihutkon undang-undang ai maningon marutang hosah do Ia, ai Anak ni Naibata do Ia,” nini. [362]

⁸Mambogei ai si Latus, lambin mabiar ma ia,

⁹gabe masuk ma ia use hu kantorni, ihatahon ma hubani Jesus, “Ai na hunja do Ham?” Tapi seng ibalosi Jesus ia. [363]

¹⁰Dob ai ihatahon si Latus ma hu Bani, “Mase lang ra Ham marsahapkon ahu? Ai lang ibotoh Ham, na markuasa do ahu paluahkon Ham, anjaha na markuasa do ahu mamparsilangkon Ham?”

¹¹Balos ni Jesus, “Seng markuasa ham Bangku, ambit lang na ibere ai bamu hun datas. Halani ai banggalan do dousa ni na mangondoskon Ahu bamu.”

¹²Olat ni ai nari ipindahi si Latus ma dalan laho paluahkon-Si. Tapi marsurak-surak ma halak Jahudi, nini sidea ma, “Anggo ipaluah ham Ia, seng hasoman ni kesar in be ham! Ai barang ise na mangangkat dirini gabe raja, na mangimbang kesar do ai.”

¹³Ase dob ibogei si Latus hata ai, iboan ma Jesus hu darat lanjar hundul ma ia bani hotak paruhuman, bani ianan na margoran Dasor Batu, bani hata Heber, ʻGabbatha.ʼ

¹⁴Ai ma na masa bani ari parugason Paskah, marayak tongah ari. Ihatahon si Latus ma hubani halak Jahudi, “Tonggor nasiam ma Raja nasiam on!”

¹⁵Tapi mardilo-dilo ma sidea, “Padaoh, padaoh ma Ia! Parsilangkon ma!” Nini si Latus ma hubani sidea, “Mintor parsilangkononku ma Raja nasiam?” Jadi ibalosi sintua ni malim ma, “Seng dong rajanami sobali kesar!” [364]

¹⁶Dob ai iondoskon ma Ia bani sidea ase iparsilangkon; jadi ijalo sidea ma Jesus.

¹⁷Lanjar Ia do mamorsan hayu parsilang ai, laho hu ianan na margoran partangkurakan; Golgata do goranni bani hata Heber.

¹⁸Ijai ma iparsilangkon sidea Ia rap pakon dua halak na legan, sada i siamun, sada i sambilou, anjaha Jesus i tongah-tongah ni sidea.

¹⁹Ibahen si Latus ma sada surat anjaha ilongkotkon ma ai bani hayu parsilang ai. Sonon do hatani, “Jesus, halak Nazaret, Raja ni Jahudi.”

²⁰Buei do halak Jahudi, na mambasa surat ai, ai dohor do hun huta ai iparsilangkon Jesus, anjaha tarsurat do ai bani hata Heber, hata Rom ampa hata Gorik.

²¹Dob ai ihatahon pangintuai ni halak Jahudi ma hubani si Latus, “Ulang suratkon ham, ʻRaja ni Jahudi,ʼ tapi na hinatahon-Ni ai ma, ʻAhu do Raja ni Jahudi!ʼ ”

²²Balos ni si Latus, “Na dob husurat, na dob husurat ma in!”

²³Ase dob iparsilangkon tentara ai Ia, ibuat sidea ma hiou-Ni, ibagi ompat ma ai, ganup sidea sabagian, ambah ni ai baju ganjang-Ni ai. Ia baju ganjang ai seng marpanjaruman, na tinonun do ai torus.

²⁴Nini sidea ma samah sidea, “Ulang ma rigat hita on, manjomput na sinurat ma hita pasal on, atap bani ise on.” Jadi jumpah ma na tarsurat in, na mangkatahon, “Ibagi sidea do hiou-Hu, anjaha manjomput na sinurat do sidea pasal bajung-Ku.” Ase sonai ma pambahen ni tentara ai.

²⁵Jongjong do i lambung parsilang ni Jesus ai inang-Ni, sanina ni inang-Ni, si Maria parinangon ni si Kleopas, ampa si Maria Magdalena.

²⁶Anggo Jesus, dob ididah ijai do inang-Ni ampa susian haholongan ni uhur-Ni ai i lambungni, ihatahon ma bani inang-Ni ai, “Andin ma Inang, anakmu!” [365]

²⁷Dob ai ihatahon ma bani susian-Ni ai, “Andin ma inangmu!” Olat ni ai nari ijalo susian ai ma ia hu rumahni.

²⁸Jadi dob ibotoh Jesus, na dob marujung haganup, ase jumpah na tarsurat ai nini ma, “Horahan Ahu!” [366]

²⁹Jadi adong ma ijai gusi na marisi anggur na migar. Isornobkon sidea ma limut hubagas anggur na migar ai, ilongkotkon sidea ma ai bani hayu ni hisop, anjaha isurdukkon ma hubani pamangan-Ni. [367]

³⁰Dob ijalo Jesus na migar ai, nini ma, “Domma salosei!” Dob ai ipaunduk ma ulu-Ni anjaha iondoskon ma tonduy-Ni.

³¹Halani ari parugasonkon do ai, anjaha ase ulang bani parsilang ai bangkei ai sanggah ari Sabat (ai ari na banggal do ari Sabat ai), jadi laho ma halak Jahudi hubani si Latus mangindohon, ase iparponggol ma nahei ni sidea anjaha ipasusur. [368]

³²Jadi laho ma tentara ai, iparponggol sidea ma nahei ni sidua halak ai, na tarsilang rap pakon Jesus.

³³Tapi das honsi sidea bani Jesus, ididah ma na dob matei Ia, gabe seng be pala iparponggol sidea nahei-Ni.

³⁴Tapi ipantomkon sahalak humbani tentara ai ma tanjani bani tonton-Ni, gabe mintor luar ma daroh ampa bah.

³⁵Anjaha na mangidah ai do na manaksihon ai, anjaha sintong do na sinaksihonni ai. Ibotoh do, na sintong do na hinatahonni ai, andohar porsaya age nasiam.

³⁶Ase masa pe ai, ase saud do na tarsurat in, “Seng bulih ponggolhonon holi-holi-Ni!” [369]

³⁷Anjaha surat na legan use mangkatahon, “Idahon ni sidea do na pinantom ni sidea in.” [370]

³⁸Dob salpu ai ipindohon si Josep, na hun Arimatea ma hubani si Latus, atap boi do pasusuronni bangkei ni Jesus. Dihut do ia susian ni Jesus, tapi ponop do, halani biarni mangidah Jahudi. Jadi ibalosi si Latus ma ai, gabe laho ma ia pasusurhon bangkei ni Jesus.

³⁹Roh do homa si Nikodemus, ai ma na ongga roh marayak Jesus borngin-borngin, iboan do mir na maragu aloe hira-hira saratus kati. [371]

⁴⁰Dob ai ibuat sidea ma bangkei ni Jesus, ibaluti ma ai bani hiou putih rap pakon na morum-morum ai, mangihutkon adat pananomon ni Jahudi.

⁴¹Dohor bani ianan ni Jesus tarsilang ai, adong do sada pohon, anjaha ibagas pohon ai adong do sada tanoman na baru, seng ongga ope inahkon bangkei hujai.

⁴²Ase hujai ma itibalhon sidea Jesus, halani ari parugasonkon ai, ai dohor do tanoman ai.