Read Batak Simalungun JOHANNES 2 Bible Online

JOHANNES 2 - Batak Simalungun bible

JOHANNES 2

¹Anjaha bani ari patoluhon adong ma na marunjuk i huta Kana, na i nagori Galilea, anjaha ijai do inang ni Jesus.

²Jesus pe ampa susian-Ni ai iontang do bani pesta ai.

³Jadi dob hurangan anggur sidea, ihatahon inang ni Jesus ma hu Bani, “Seng dong be anggur ni sidea!”

⁴Jadi nini Jesus ma hu bani, “Aha urusanmu Bangku, inang? Seng roh ope panorang-Ku.” [28]

⁵Nini inang-Ni ai ma hubani siparugas ai, “Barang aha ihatahon bani nasiam, bahen nasiam ma!”

⁶Mangihutkon adat parburihon ni halak Jahudi, adong do ijai onom gusi siat dua ronsi tolu bat (sada bat ai ma 40 liter). [29]

⁷Ihatahon Jesus ma hubani sidea, “Goki nasiam ma gusi in bani bah!” Jadi gok tumang ma ibahen sidea.

⁸Dob ai Nini ma hubani sidea, “Tahui nasiam ma hunjin, anjaha boan nasiam ma hubani kopala ni pesta on!” Jadi iboan sidea ma.

⁹Dob idai kopala ni pesta ai bah na dob salih gabe anggur ai, seng ibotoh hunja harohanni ai, pitah siparugas na manahui ai do hansa mambotoh ai, idilo ma siparunjuk ai,

¹⁰anjaha nini ma hu bani, “Haganup halak mambere parlobei anggur sidearan, dob bosur pe, ase ibere tar na hurang daini. Tapi anggo ham, isimpan ham do anggur sidearan ronsi sonari.”

¹¹Ase ai ma tanda na parlobei, na binahen ni Jesus i huta Kana, na i Galilea, laho patalar hasangapon-Ni, gabe porsaya ma susian-Ni Bani. [30]

¹²Dob salpu ai, tuad ma Ia hu Kapernaum rap pakon inang-Ni, ampa sanina-Ni ampa susian-Ni, anjaha ijai ma sidea tar hun dokah. [31]

¹³Halani domma dohor pesta Paskah ni Jahudi, jadi tangkog ma Jesus hu huta Jerusalem.

¹⁴Jadi jumpah-Si ma hundul i rumah panumbahan ai partiga-tiga lombu, biribiri pakon asas ampa situkari duit.

¹⁵Jadi ipauli Jesus ma tali bahen lonsing-lonsing, anjaha iusir ma sidea haganup hun rumah panumbahan ai rap pakon biribiri ampa lombu; isampakkon ma duit ni sipanukari ai, anjaha ipantunggalingkon ma meja ni sidea.

¹⁶Dob ai nini ma hubani partiga-tiga asas ai, “Boan nasiam ma in hunjon! Ulang bahen nasiam rumah ni Bapa gabe rumah partiga-tigaan!”

¹⁷Jadi idingat susian-Ni ma hata na tarsurat in, “Ringis mangkopkop rumahmu do mangankon ahu.”

¹⁸Dob ai nini Jahudi ma mambalosi-Si, “Aha ma tanda patuduhon-Mu bannami, paboa na boi sonin bahenon-Mu?” [32]

¹⁹Jadi nini Jesus ma mambalosi sidea, “Parseda nasiam ma rumah panumbahan on, dob ai pajongjongon-Ku ma in ibagas tolu ari.”

²⁰Dob ai nini Jahudi ma, “Ompat puluh onom tahun do dokahni ipauli rumah panumbahan on, ia Ham, ibagas tolu ari nimu pajongjongon-Mu in?”

²¹Tapi angkula-Ni ai do rumah panumbahan, na hinatahon-Ni ai ijai. [33]

²²Ase, dob puho Ia humbani na matei idingat susian-Ni ai ma hata ondi, gabe porsaya ma sidea bani hata ni surat in ampa bani hata na hinatahon ni Jesus.

²³Anjaha sanggah i huta Jerusalem Ia, bani pesta Paskah ai, buei do na gabe porsaya bani goran-Ni, dob ididah sidea tanda na binahen-Ni ai.

²⁴Tapi seng ihaporsayai Jesus sidea, halani itanda do sidea haganup.

²⁵Anjaha seng porlu Bani hasaksian ni atap ise pe pasal jolma in, ai ibotoh do na ibagas uhur ni jolma in. [34]