Read Batak Simalungun JOHANNES 20 Bible Online

JOHANNES 20 - Batak Simalungun bible

JOHANNES 20

¹Dob ai bani ari parlobei, dob salpu ari Sabat, laho ma si Maria hu tanoman, girah sogod, golap-golap ope, gabe ididah ma, na dob tarangkat batu ai hun tanoman ai.

²Jadi marlintun ma ia mangayaki si Simon Petrus ampa susian na sada nari, haholongan ni uhur ni Jesus, anjaha nini ma hubani sidea, “Adong do na mambuat Tuhan in hun tanoman, anjaha seng ibotoh hanami, huja Ia inahkon!” [372]

³Jadi laho ma si Petrus ampa susian na sada nari, gabe das ma sidea hu tanoman ai.

⁴Na rap marlintun do sidea na dua ai, tapi hinsahan do susian na sada nari ai humbani si Petrus, gabe parlobei ma ia das hu tanoman ai.

⁵Jadi ipaunduk ma dirini, ididah ma tibal pambaluti ai, tapi seng masuk anggo ia.

⁶Roh ma homa si Petrus hun pudini, imasuki ma tanoman ai, jadi ididah ma tibal pambaluti ai.

⁷Ia hiou pamalut ni ulu-Ni, seng rap ai pakon pambaluti ai, pulig do ai ilompit bani ianan na legan. [373]

⁸Dob ai masuk ma homa susian na sada nari ai, na parlobei das hu tanoman ai, ididah ma, gabe porsaya ma ia.

⁹Ai seng iarusi sidea ope hata ni Surat in, na mangkatahon, “Maningon puho do Ia humbani na matei.” [374]

¹⁰Dob ai mulak ma susian na dua ai.

¹¹Ia si Maria, jongjong do idarat ni tanoman ai tangis-tangis, anjaha sanggah na tangis ai ia, ipaunduk ma dirini manonggor hubagas tanoman ai.

¹²Gabe ididah ma hundul dua malekat ijai, marhiou silopak, sada hampit ulu-Ni, na sada nari hampit hatibalan ni nahei ni Jesus.

¹³Jadi ihatahon sidea ma hu bani, “Mase tangis ham Inang?” Ihatahon ma bani sidea, “Adong do na mambuat Tuhanku, anjaha seng hubotoh huja Ia inahkon.”

¹⁴Dob ihatahon sonai, marhusor ma ia dompak pudi, gabe ididah ma Jesus jongjong ijai, tapi seng ibotoh Jesus do ai hape.

¹⁵Nini Jesus ma hu bani, “Ham Inang, mase tangis ham? Ise ipindahi ham?” Jadi iagan ma, sijaga pohon do Ia, gabe ihatahon ma Bani, “Anggo Ham do mambuat-Si, tuan, patugah Ham ma bangku, atap huja do Ia inahkon Ham, ase hualop!”

¹⁶Dob ai nini Jesus ma hu bani, “Maria!” Jadi idompakkon si Maria ma Ia, nini ma ibagas hata Heber, “Rabbuni!” (artini: Guru)

¹⁷Ihatahon Jesus ma hu bani, “Ulang jamah Ahu, ai seng naik ope Ahu hubani Bapa in! Tapi laho ma ho hubani saninang-Ku, hatahon ma hubani sidea, na laho tangkog ma Ahu hubani Bapang-Ku anjaha Bapanima, hubani Naibatang-Ku anjaha Naibatanima.” [375]

¹⁸Jadi laho ma si Maria Magdalena, ibaritahon ma hubani susian ai, “Domma huidah Tuhan in, anjaha on do hata-Ni bangku!”

¹⁹Jadi dob bod ari, bani ari parlobei dob salpu ari Sabat ai, sanggah tutup sagala labah ni rumah, niiankon ni susian ai, halani biar ni uhur ni sidea mangidah halak Jahudi, roh ma Jesus jongjong hu tongah-tongah ni sidea, anjaha ihatahon ma bani sidea, “Damei ma bannima!”

²⁰Jadi dob ihatahon sonai, ipatuduhkon ma tangan-Ni ampa tonton-Ni bani sidea, gabe malas ma uhur ni susian ai, halani na dob ididah sidea Tuhan in. [376]

²¹Dob ai ihatahon Jesus ma use bani sidea, “Damei ma bannima! Songon sinuruh ni Bapa in Ahu, sonai do suruhon-Ku hanima!” [377]

²²Dob ihatahon sonai, manompul ma Ia dompak sidea, anjaha nini ma hubani sidea, “Jalo hanima ma Tonduy Na Pansing!

²³ Anggo isasap hanima dousa ni atap ise pe, na dob sasap ma ai, anjaha anggo ipatotap hanima dousa ni atap ise pe, na totap ma ai.” [378]

²⁴Tapi anggo si Tomas, sada humbani na sapuluh dua in, na margoran si Rindu-rindu, seng rap pakon sidea ia, sanggah na roh ai Jesus. [379]

²⁵Jadi ihatahon susian na legan ai ma dompaksi, “Domma ididah hanami Tuhan in!” Tapi ibalosi ma sidea, “Anggo seng huidah bani tangan-Ni ai bokas ni paku ondi, anjaha ijamah jari-jaringku bokas ni paku ondi, anjaha anggo seng hujamah tonton-Ni ai, seng porsaya ahu.” [380]

²⁶Dob salpu ualuh borngin, tumpu ma use susian ai i rumah ondi, rap pakon si Tomas. Jadi roh ma Jesus, sanggah tutup sagala labah, jongjong hu tongah-tongah ni sidea, nini ma dompak sidea, “Damei ma bannima!” [381]

²⁷Ihatahon ma hubani si Tomas, “Bahen hujon jari-jarimin, anjaha torih ma tangan-Ku! Surdukkon ma tanganmin, manjamah tonton-Hu. Ulang sangsi uhurmu, porsaya ma!”

²⁸Jadi nini si Tomas ma mambalosi-Si, “Ham Tuhanku anjaha Naibatangku!” [382]

²⁹Jadi ihatahon Jesus ma hu bani, “Halani ididah ho Ahu, ai do ase porsaya ho. Martuah ma na porsaya age pe lang ididah!” [383]

³⁰Buei ope tanda na legan, na binahen ni Jesus i lobei ni susian-Ni, na so sinuratkon ibagas buku on.

³¹Ase nasuratkon pe on, ase porsaya nasiam, Jesus do Kristus, Anak ni Naibata, anjaha marhitei na mangkaporsayai ai dapotan hagoluhan nasiam ibagas goran-Ni. [384]