Read Batak Simalungun JOHANNES 21 Bible Online

JOHANNES 21 - Batak Simalungun bible

JOHANNES 21

¹Dob ai ipataridahkon Jesus ma use diri-Ni hubani susian ai i topi ni tao Tiberias. Sonon ma pardalanni.

²Tumpu ma si Simon Petrus pakon si Tomas, na margoran si Rindu-rindu, rap pakon si Natanael, na hun Kana i Galilea, pakon anak ni si Sebedeus ampa dua halak nari humbani susian-Ni ai. [385]

³Jadi nini si Simon Petrus ma hubani sidea, “Laho ma ahu mardengke.” Ihatahon sidea ma hu bani, “Dihut ma hanami!” Jadi laho ma sidea, masuk ma hu parau, tapi aha pe lang dapot sidea na saborngin ai.

⁴Anjaha dob siang ari, jongjong ma Jesus i pasir ai, tapi seng itanda sidea Ia. [386]

⁵Jadi ihatahon Jesus ma hubani sidea, “Ambia, adong do dengkenima ijin?” Ibalosi sidea ma Ia, “Seng dong!” [387]

⁶Dob ai ihatahon ma bani sidea, “Dabuh hanima ma jalanima hu siamun ni parau in, ase dapotan hanima!” Jadi idabuh sidea ma, gabe seng tartarik sidea be jala ai halani buei ni dengke ai. [388]

⁷Jadi ihatahon susian haholongan ni Jesus ai ma hubani si Petrus, “Tuhan in do in!” Jadi dob itangar si Simon Petrus, Tuhan in do ai hape, ialitkon ma hiouni, ai seng marhiou ia hinan, gabe manlumpat ma ia hu tao ai. [389]

⁸Tapi marparau do anggo susian na legan ai, lanjar manarad jala na marisi dengke ai, ai seng sadiha daoh sidea hun darat, hira-hira dua ratus asta do.

⁹Das honsi sidea hu darat, ididah sidea ma narnar ijai ampa dengke i atasni, ambah ni ai ruti.

¹⁰Ihatahon Jesus ma hubani sidea, “Boan hanima ma deba dengke in, na dapot hanima in!”

¹¹Jadi naik ma si Petrus hu parau ai, isarad ma jala ai hu darat, gok dengke na banggal-banggal, saratus lima puluh tolu bueini, anjaha age pe sonai bueini, seng marigat anggo jala ai.

¹²Dob ai nini Jesus ma hubani sidea, “Roh ma hanima!” Tapi seng dong humbani susian ai, na pag manungkun-Si, “Ise do Ham?” Ibotoh sidea, Tuhan in do ai.

¹³Ase roh ma Jesus, ibuat ma ruti ai, ipambere ma ai bani sidea, sonai homa dengke ai. [390]

¹⁴Ai ma na patoluhalihon ipataridahkon Jesus diri-Ni hubani susian-Ni, dob puho Ia humbani na matei.

¹⁵Ase dob mangan sidea, ihatahon Jesus ma hubani si Simon Petrus, “Ale Simon, anak ni si Jonas, holongan do uhur-Mu Bangku ase halak on?” Nini ma hu Bani, “Eak Tuhan, ibotoh Ham do holong ni uhurhu Bamu!” Ihatahon Jesus ma hu bani, “Parmahani ma anak ni biribiring-Ku!” [391]

¹⁶Ihatahon ma use paduahalihon bani, “Ale Simon, Anak ni si Jonas, holong do uhurmu Bangku?” Nini ma hu Bani, “Eak Tuhan, ibotoh Ham do holong ni uhurhu Bamu!” Jadi ihatahon ma hu bani, “Parmahani ma biribiring-Ku!” [392]

¹⁷Dob ai ihatahon ma patoluhalihon hu bani, “Ale Simon, anak ni si Jonas, holong do uhurmu Bangku?” Jadi pusok ma uhur ni si Petrus, halani patoluhalihon ma ihatahon hu bani, “Holong do uhurmu Bangku?” Jadi ihatahon ma, “Haganup do, ale Tuhan, ibotoh Ham; ibotoh Ham do holong ni uhurhu Bamu!” Dob ai ihatahon Jesus ma hu bani, “Parmahani ma biribiring-Ku!” [393]

¹⁸Na tongon tumang do na Huhatahon on bam, “Sanggah poso ho, ho do manggonditi dirimu, anjaha laho ho huja rosuh ni uhurmu. Tapi dob matua holi ho, surdukkononmu ma tanganmu, jadi gonditan ni halak na legan ma ho, anjaha boanonni ma ho hubani na so harosuh ni uhurmu.”

¹⁹Tapi ihatahon pe ai, laho patugahkon parmateini do use, laho pasangapkon Naibata. Jadi, dob ihatahon sonai, nini ma hu bani, “Ihutkon ma Ahu!” [394]

²⁰Jadi marhusor ma si Petrus, gabe ididah ma mangihut susian haholongan ni uhur ni Jesus, ai ma na hundul darngos bani Jesus, sanggah na mangan ondi sidea, anjaha na manungkun-Si ijia, “Ise do in Tuhan, na sihol mantahihon Ham?” [395]

²¹Ase dob ididah si Petrus ia, nini ma hubani Jesus, “Ham Tuhan, sonaha ia ambia on?”

²²Nini Jesus ma hu bani, “Anggo marosuh Ahu, totap ia ronsi roh Ahu, mase ma pala pasari-sarionmu ai? Tapi anggo ho, ihutkon ma Ahu!”

²³Ase sar ma hata ai bani hasoman-hasoman ai, na so matei susian ai. Tapi seng ihatahon Jesus hu bani, na so matei ia, tapi sonon do nini, “Anggo marosuh Ahu, totap ia ronsi roh Ahu, mase ma pala pasari-sarionmu ai?”

²⁴Ai ma susian, na manaksihon pasal on anjaha na manuratkon, anjaha ibotoh hanami, na sintong do na sinaksihonni in. [396]

²⁵Tapi buei ope na legan, na binahen ni Jesus; ambit nasuratkon ai sada-sada, ninuhurhu, ra seng siat i dunia on buku na sinurat ai.