Read Batak Simalungun JOHANNES 3 Bible Online

JOHANNES 3 - Batak Simalungun bible

JOHANNES 3

¹Ase adong ma sada halak humbani Parisei, na margoran si Nikodemus, pangintuai ni halak Jahudi. [35]

²Na roh do ia borngin-borngin marayak-Si, anjaha nini ma hu Bani, “Rabbi, ibotoh hanami do Ham guru na roh humbani Naibata, ai seng tarhorjahon atap ise tanda songon na binahen-Mu in, anggo seng Naibata hasomanni.”

³Dob ai nini Jesus ma mambalosisi, “Na sintong tumang do na Huhatahon bamu, anggo seng tubuh halak paduahalihon, seng tarbahensi mangidah Harajaon ni Naibata!” [36]

⁴Ihatahon si Nikodemus ma hu Bani, “Sonaha ma tarbahen use tubuh halak, anggo domma matua? Mintor tarulakisi ma masuk hu partapaan, ase itubuhkon inangni use!”

⁵Nini Jesus ma mambalosisi, “Na sintong tumang do na Huhatahon on bamu, anggo seng tubuh halak humbani bah pakon Tonduy, seng tarmasukisi Harajaon ni Naibata. [37]

⁶Aha tubuh humbani daging, ai ma daging, anjaha aha tubuh humbani Tonduy, ai ma tonduy. [38]

⁷Ulang ma longang uhurmu, halani Huhatahon bamu maningon tubuh nasiam paduahalihon.

⁸Na mangombus do logou dompak rosuh ni uhurni, ibogei ham do pardongosni, tapi seng ibotoh ham hunja rohni atap huja lahoni. Sonai do ganup na dob tubuh humbani Tonduy.”

⁹Dob ai nini si Nikodemus ma mambalosi-Si, “Sonaha ma parjadini ai?”

¹⁰Jadi nini Jesus ma mambalosisi, “Ham guru ni halak Israel, lang ibotoh ham in?

¹¹Na tongon tumang do na Huhatahon on bamu, na binotohnami do ihatahon hanami, anjaha na nididahnami do isaksihon hanami, tapi seng ijalo nasiam hasaksiannami. [39]

¹²Gari na i dunia on Huhatahon bani nasiam, seng porsaya nasiam, mintor porsaya ma nasiam, anggo Huhatahon bani nasiam na i nagori atas?

¹³Anjaha seng dong na naik hu nagori atas, sobali na susur hun nagori atas in, in ma Anak ni Jolma in. [40]

¹⁴Anjaha songon na dob pinagijang ni si Musa ulog i halimisan, sonai do pagijangon Anak ni Jolma in, [41]

¹⁵ase dapotan hagoluhan na sadokah ni dokahni sagala na porsaya Bani.

¹⁶ Ai sonon do holong ni uhur ni Naibata bani dunia on, pala do Anak-Ni na sasada in iberehon, ase ulang magou ganup na porsaya Bani, tapi ase hagoluhan na sadokah ni dokahni bani. [42]

¹⁷Ai seng isuruh Naibata Anak-Ni in hu dunia on, laho manguhumi dunia on, tapi ase maluah do dunia on marhiteihon-Si. [43]

¹⁸Seng siuhumon na porsaya Bani, tapi na so porsaya domma hona uhum, halani lang porsaya ia bani goran ni Anak sasada ni Naibata. [44]

¹⁹Tapi on ma uhum ai, domma roh na lihar in hu dunia on, tapi holongan do uhur ni jolma bani na golap in ase bani na lihar in, ai na jahat do horja ni sidea. [45]

²⁰Ai ganup na mangkorjahon na masambor, sogam do uhurni bani na lihar in, anjaha seng ijumpahkon na lihar in, ase ulang talar horjani ai. [46]

²¹Tapi na mangkorjahon hasintongan in, ijumpahkon do na lihar in, ase talar horjani ai, ai ibagas Naibata do ihorjahon ai.”

²²Dob ai laho ma Jesus rap pakon susian-Ni hu tanoh Judea, anjaha soh ijai lobei rap pakon sidea lanjar mandidi. [47]

²³Anjaha si Johannes pe mandidi do i Aenon, dohorhon huta Salim, ai buei do bah ijai. Marrohan do halak hujai, laho padidihon dirini.

²⁴Ai seng tartutup ope si Johannes ijia. [48]

²⁵Jadi tarjadi ma parsualon bani susian ni si Johannes ampa sada halak Jahudi pasal parburihan.

²⁶Roh ma sidea bani si Johannes, anjaha nini sidea ma dompaksi, “Rabbi, Halak ondi, na roh hu bamu i dipar ni Bah Jordan, ai ma na sinaksihonmu ondi, tonggor ham ma, mandidihon do Ia nuan, anjaha marrohan do ganup halak Bani.” [49]

²⁷Dob ai nini si Johannes ma mambalosi, “Seng tarbuat jolma atap aha pe, anggo seng na binere ai bani hun nagori atas. [50]

²⁸Hanima sandiri do saksingku, sanggah huhatahon, ʻSedo ahu Kristus in, tapi na sinuruh do ahu parlobei-Ni.ʼ [51]

²⁹Simada tunangan, ai do siparunjuk. Ia huan-huan ni siparunjuk, na jongjong patangi-tangisi, marmalas ni uhur do halani sora ni siparunjuk ai. Malas ni uhur na sonai do na adong bangku. [52]

³⁰Anggo Ia, patut do lambin banggal, tapi ahu lambin etek ma.

³¹Na roh hun datas, Ia do na mangatasi haganup. Na hun tanoh on, partanoh on do ai, anjaha pasal na i tanoh on do isahapkon; na roh hun datas, Ia do na mangatasi haganup.

³²Na nididah-Ni ampa na binogei-Ni do isaksihon, tapi seng dong na manjalo hasaksian-Ni ai. [53]

³³Halak na manjalo hasaksian-Ni ai, iakui do, paboa parsintong do Naibata.

³⁴Ai na sinuruh ni Naibata, Ia do na mansahapkon hata ni Naibata, anjaha seng marsibar Ia mambere Tonduy-Ni. [54]

³⁵Holong do uhur ni Bapa in bani Anak in, anjaha haganup do iondoskon hubagas tangan-Ni. [55]

³⁶Na porsaya bani Anak in, dapotan hagoluhan na sadokah ni dokahni, tapi na so mambalosi Anak in, seng idahonni ai hagoluhan, tapi ringis ni Naibata do totap bani.” [56]