Read Batak Simalungun JOHANNES 4 Bible Online

JOHANNES 4 - Batak Simalungun bible

JOHANNES 4

¹Jadi dob ibotoh Tuhan in, na dob ibogei Parisei, buenan do susian ampa na nididi-Ni marimbang si Johannes, [57]

²age pe seng Jesus sandiri mandidihon, tapi susian-Ni do,

³itadingkon ma Judea, anjaha mulak ma Ia hu Galilea.

⁴Tapi maningon bontason-Ni do nagori Samaria.

⁵Jadi das ma Ia hu sada huta na i Samaria, na margoran Sikar, dohorhon juma, na binere ni si Jakob bani si Josep, anakni ai. [58]

⁶Ijai do parigi ni si Jakob. Jadi halani na dob loja Jesus na mardalan ai, hundul ma Ia i lambung ni parigi ai, anjaha tar tongah arian ma ai.

⁷Dob ai roh ma sada boru Samaria, laho manahui bah. Jadi nini Jesus ma hu bani, “Bere ham ma Bangku bahmu in otik!”

⁸Ia susian-Ni ai, domma laho hu huta mamboli bohal.

⁹Jadi nini boru Samaria ai ma hu Bani, “Mase Ham, halak Jahudi, mangindo bah inumon hun bangku, boru Samaria? Ia halak Jahudi seng marparsaoran ai pakon halak Samaria.”

¹⁰Dob ai nini Jesus ma mambalosisi, “Ambit itanda ham sibere-bere ni Naibata ampa na mangindo bah inumon hun bamu, gabe ham ma mangindo hun Bani, jadi bereon-Ni ma bamu bah na manggoluh.” [59]

¹¹Jadi nini naboru ai ma hu Bani, “Tuan, gari tahu-tahu seng dong Bamu, anjaha bagas do parigi on; mintor hunja ma adong Bamu bah na manggoluh?

¹²Mintor banggalan ma Ham ase ompungta si Jakob, na mamberehon parigi on bannami? Ia do na minum hunjin, anakni ampa pinahanni.”

¹³Dob ai nini Jesus ma mambalosisi, “Sagala na minum humbani bah on mangulaki horahan do, [60]

¹⁴tapi na manginum bah sibereon-Kai, seng horahan be ia sadokah ni dokahni. Ia bah sibereon-Kai gabe bah tubuh do ai ibagas dirini, na marjullak-jullak ronsi hagoluhan sisadokah ni dokahni.” [61]

¹⁵Dob ai nini naboru ai ma hu Bani, “Tuan, bere Ham ma bangku bah na sonai ai, ase ulang horahan be ahu, anjaha ulang pala be sai roh hujon laho manahui.”

¹⁶Ihatahon Jesus ma hu bani, “Laho ma ham, dilo ham ma pargotongmu, dob ai roh ma ham hujon!”

¹⁷Dob ai nini naboru ai ma mambalosi, “Seng dong pargotongku.” Nini Jesus ma hu bani, “Tongon do hatamu, seng dong pargotongmu.

¹⁸Ia ham domma lima hali laho, anjaha dalahi na rap pakon ham sisonari ai, sedo pargotongmu ai; ase na sintong do na hinatahonmu ai.”

¹⁹Jadi nini naboru ai ma hu Bani, “Tuan, huahap nabi do Ham!

²⁰Ia ompungnami i dolog an do martonggo, hape nasiam mangkatahon, Jerusalem do ianan martonggo.” [62]

²¹Nini Jesus ma hu bani, “Porsaya ma ham Bangku inang, na roh ma panorangni, seng be i dolog an atap i Jerusalem nasiam marsombah bani Bapa in.

²²Isombah nasiam do na so tinanda nasiam, tapi anggo hanami na tinandanami do isombah hanami, ai halak Jahudi do harohan ni haluahon. [63]

²³Na roh ma panorangni, anjaha domma roh ai nuan, gabe ibagas Tonduy ampa Hasintongan ma sagala partonggo na sintong martonggo hubani Bapa in, ai partonggo na sonai do ipangindo Bapa in.

²⁴ Tonduy do Naibata, ase sagala na martonggo hu Bani, maningon do martonggo ibagas Tonduy ampa Hasintongan.” [64]

²⁵Nini naboru ai ma hu Bani, “Hubotoh, ia Mesias in (ai ma Kristus), maningon do roh. Rohkonsi Ia, baritahonon-Ni ma ganupan ai bannami.” [65]

²⁶Ihatahon Jesus ma hu bani, “Ahu do in, na marsahap pakon ham!” [66]

²⁷Dob sonai, roh ma susian-Ni, anjaha longang do uhur ni sidea, halani na marsahapi ai Ia pakon naboru ai. Tapi sahalak pe seng dong na manungkun, “Aha sungkunon-Mu?” Atap, “Aha sahapkonon-Mu bani?”

²⁸Itadingkon naboru ai ma pangalopan ni bahni, mulak ma ia hu huta lanjar nini ma hubani halak na ijai ai,

²⁹“Eta nasiam! Tonggor nasiam ma sada halak, na patugahkon bangku haganup na dob ongga huhorjahon, atap Ia do Kristus in.”

³⁰Gabe luar ma sidea hun huta ai laho marayak-Si.

³¹Sanggah sonai, nini susian-Ni ai ma mangojur-Si, “Mangan ma Guru in!”

³²Tapi nini ma bani susian-Ni ai, “Adong do sipanganon Bangku, na so binotohnima!” [67]

³³Gabe nini susian ai ma samah sidea, “Ai adong do nani, na mamboban sipanganon hu Bani?”

³⁴Ihatahon Jesus ma hubani sidea, “Sipanganon do ai Bangku, mangkorjahon rosuh ni na marsuruh Ahu ampa mandobkon lahoan-Ni. [68]

³⁵Ai lang ihatahon hanima, ompat bulan nari jumpah ma pariama? Tapi Huhatahon ma bannima, mangkawah ma hanima, tonggor hanima ma juma in, domma gorsing, boi ma sabion. [69]

³⁶Manjalo upah ma sipanabi anjaha patumpuhon buah hu hagoluhan na sadokah ni dokahni, ase rap marmalas ni uhur sipartidah pakon sipanabi.

³⁷Ai ijon ma sintong hata, na mangkatahon, ʻNa sada martidah, na legan manabi.ʼ

³⁸Ahu do marsuruh hanima manabi na so hinalojahonnima. Na legan do mangkorjahon, gabe isambat hanima do horja ni sidea.”

³⁹Jadi buei ma halak Samaria na i huta ai na gabe porsaya Bani, halani hasaksian ni naboru ai na mangkatahon, “Haganup, na dob huhorjahon ipatugah do bangku.”

⁴⁰Das honsi halak Samaria ai bani Jesus, ielek-elek sidea ma Ia tondok bani sidea, jadi ijai ma Ia dua ari.

⁴¹Anjaha lambin bueini do na porsaya bani hata ni Jesus.

⁴²Nini sidea ma bani puang-puang ai, “Seng be halani hatamai mambahen porsaya hanami. Domma itangar hanami sandiri, anjaha ibotoh hanami, Ia do tongon Sipaluah dunia on.”

⁴³Jadi dob salpu na dua ari ai, misir ma Ia hunjai laho hu Galilea. [70]

⁴⁴Ai Jesus sandiri do manaksihon, na so marsangap nabi i tanoh hagodanganni. [71]

⁴⁵Jadi das honsi Ia i Galilea, ijalo halak Galilea do Ia, halani na dob ididah sidea haganup na binahen-Ni i Jerusalem bani ari raya ai, ai sidea pe dihut do bani pesta ai. [72]

⁴⁶Anjaha laho do Ia use hu Kana, na i Galilea, ianan-Ni ondi mambahen anggur humbani bah. Jadi adong ma ijai pagawai ni raja, boritan do anakni i Kapernaum. [73]

⁴⁷Jadi dob ibogei, na dob roh Jesus hun nagori Judea hu nagori Galilea, ijumpahkon ma Ia, ielek-elek ma, ase tuad Ia pamalumkon anakni, na mangkatarhatos ai.

⁴⁸Jadi ihatahon Jesus ma hu bani, “Anggo seng ididah nasiam tanda ampa halongangan, seng na porsaya nasiam.” [74]

⁴⁹Jadi ihatahon pagawai ai ma, “Sai tuad ma Ham Tuan sanggah lape matei anakkai.”

⁵⁰Ihatahon Jesus ma hu bani, “Mulak ma ham, manggoluh ma anakmu ai!” Porsaya do halak ai bani hata, na hinatahon ni Jesus bani, lanjar laho ma ia.

⁵¹Sanggah tuad ia, ialo-alo jabolonni ma ia, laho patugahkon, na dob manggoluh anakni ai.

⁵²Ipapangkei ma humbani sidea panorangni, barang sadihari malum iahap. Jadi nini sidea ma, “Nantuari, hira-hira pukul sada do surut pane-pane ai hun bani.”

⁵³Idingat bapani ai ma, pala ai ma tongon panorangni sanggah ihatahon Jesus bani, “Na manggoluh ma anakmu ai.” Gabe porsaya ma ia pakon haganup parrumahni.

⁵⁴Ase ai ma tanda na paduahon, na binahen ni Jesus use, dob mulak Ia hun Judea hu Galilea.