Read Batak Simalungun JOHANNES 5 Bible Online

JOHANNES 5 - Batak Simalungun bible

JOHANNES 5

¹I pudi ni ai adong ma pesta ni halak Jahudi, jadi tangkog ma Jesus hu Jerusalem.

²I Jerusalem, i lambung ni horbangan biribiri ai, adong do sada paridian, na margoran Bethesda bani hata Heber, adong do lima sopou-sopou ijai.

³Martibalan do ijai buei halak na boritan, na mapitung, na oyangon ampa na matei lopah, na paima-imahon bani pargunsang ni bah ai,

⁴ai turun do marnombas malekat ni Naibata manggunsang bah ai. Anjaha na parlobei masuk hubagas, dob hona gunsang bah ai, malum ma atap aha pe naboritni.

⁵Adong do ijai sada halak, na dob tolu puluh ualuh tahun dokahni boritan.

⁶Dob ididah Jesus ia tibal ijai, anjaha ibotoh, sonai ma dokahni ijai, gabe nini ma dompaksi, “Sihol malum ham?”

⁷Nini na boritan ai ma mambalosi-Si, “Ham Tuannami, seng dong diha-dihangku, na mangabingkon ahu hu paridian in bani pargunsang ni bah in, ai rohkonsi ahu, domma adong na legan manlobei ahu turun.”

⁸Nini Jesus ma hu bani, “Jongjong ma ham, angkat ma podomanmu in, laho ma ham!” [75]

⁹Jadi mintor jorgit ma halak ai, iangkat ma podomanni, lanjar laho ma ia, tapi ari Sabat do na sadari ai.

¹⁰Jadi ihatahon halak Jahudi ma bani halak na pinamalum ai, “Ari Sabat do arian on, seng bulih boanonmu podomanmu!” [76]

¹¹Nini ma mambalosi, “Halak, na pamalum ahu, Ia do mangkatahon bangku, ʻAngkat ma podomanmu, anjaha laho ma.ʼ ”

¹²Isungkun sidea ma ia, “Ise mangkatahon bam, ʻAngkat ma anjaha laho ma?”ʼ

¹³Tapi seng itandai na boritan ai Ia, ai domma laho Jesus, halani buei do jolma bani ianan ai.

¹⁴Dob salpu ai, jumpah Jesus ma ia i rumah panumbahan, gabe nini ma hu bani, “Tonggor ma, domma jorgit ham. Ulang be nunut mardousa, ase ulang sogop bamu siparahan.” [77]

¹⁵Jadi laho ma halak ai, ihatahon ma bani halak Jahudi, paboa Jesus do na pamalumkonsi.

¹⁶Jadi iparburu halak Jahudi ma Jesus, halani ibahen sonai bani ari Sabat. [78]

¹⁷Tapi nini Jesus ma mambalosi sidea, “Na marhorja do Bapa ronsi nuan, Ahu pe marhorja do.” [79]

¹⁸Halani ai lambin ipindahi halak Jahudi ma dalan laho mamunuh-Si, ai seng be pitah ari Sabat isedai, tapi igoran do homa Naibata Bapa-Ni, anjaha ipados diri-Ni pakon Naibata. [80]

¹⁹Jadi nini Jesus ma mambalosi sidea, “Na sintong tumang do na Huhatahon on bani nasiam, aha pe lang tarhorjahon Anak in humbani diri-Ni sandiri, pitah na nididah-Ni na dob ihorjahon Bapa in do. Ai aha na hinorjahon ni Bapa in, ai do homa ihorjahon Anak in. [81]

²⁰Ai holong do uhur ni Bapa in bani Anak in, anjaha haganup do ipatuduhkon Bani na hinorjahon-Ni, anjaha patuduhkonon-Ni ope Bani horja sibanggalan hunjon, ase longang uhur nasiam. [82]

²¹Ai songon pamuhoi ni Bapa in bani na matei, laho pagoluhkon sidea, sonai do Anak in, ipagoluh do atap ise, na sihol pagoluhon-Ni.

²²Ai seng dong na iuhumi Bapa in, tapi domma iondoskon haganup panguhumon in bani Anak in. [83]

²³Ase haganup pasangap Anak in, songon parpasangap ni sidea bani Bapa in. Na so pasangapkon Anak in, ai ma na so pasangap Bapa in, na marsuruh-Si. [84]

²⁴Na sintong tumang do na Huhatahon on bani nasiam, barang ise, na manangihon hatang-Ku anjaha porsaya bani na marsuruh Ahu, domma das ia bani hagoluhan na sadokah ni dokahni; seng pala be ia hu paruhuman, domma mandipar ia humbani hamatean hu hagoluhan. [85]

²⁵Na sintong tumang do na Huhatahon bani nasiam, na roh ma panorangni, anjaha domma masa ai nuan, bogeion ni na matei in ma sora ni Anak ni Naibata, gabe manggoluh ma na mambogei-Si. [86]

²⁶Ai songon Bapa in pargoluh ibagas diri-Ni, lanjar sonai do ibere bani Anak in, ase pargoluh Ia ibagas diri-Ni. [87]

²⁷Anjaha ibere do Bani kuasa manguhumi, halani Anak ni Jolma Ia. [88]

²⁸Ulang ma longang uhur nasiam pasal ai, ai na roh ma panorangni, bogeion ni haganup halak na i tanoman in ma sora-Ni,

²⁹ jadi mandarat ma, sihorjahon na madear puho hu hagoluhan, tapi sihorjahon na jahat puho bani uhum. [89]

³⁰Seng tarhorjahon Ahu atap aha pe humbani diring-Ku sandiri, domu hubani na Hubogei do panguhum-Hu, anjaha pintor do uhum-Hu, halani seng Hupindahi rosuh ni uhur-Hu, rosuh ni na marsuruh Ahu do. [90]

³¹Anggo Ahu manaksihon pasal diring-Ku, seng na sintong hasaksian-Kai.

³²Adong do na legan manaksihon Ahu, anjaha Hubotoh sintong do hasaksianni ai pasal Ahu. [91]

³³Domma isuruh nasiam na marayak si Johannes, anjaha domma isaksihon hasintongan ai. [92]

³⁴Ia Ahu, seng Huporluhon hasaksian ni jolma, tapi Husahapkon pe ai, andohar maluah nasiam.

³⁵Palita na gara anjaha na marsinalsal do ia, anjaha marosuh do nasiam tongkin marmalas ni uhur ibagas sondangni ai.

³⁶Adong do hasaksian Bangku na surungan humbani si Johannes; ai horja na niondoskon ni Bapa in Bangku, sidobkonon-Ku, in ma horja na Hubahen in, in do manaksihon paboa na isuruh Bapa in do Ahu. [93]

³⁷Anjaha Bapa na marsuruh Ahu pe isaksihon do Ahu. Seng ongga ibogei nasiam sora-Ni, anjaha rupa-Ni pe seng ongga ididah nasiam. [94]

³⁸Hata-Ni pe seng marianan ibagas nasiam, ai seng porsaya nasiam bani na sinuruh-Ni.

³⁹Ipareksa nasiam do Surat in, ai jumpah nasiam do ijin, ninuhur nasiam, hagoluhan na sadokah ni dokahni. Surat in do tongon na manaksihon pasal Ahu. [95]

⁴⁰Tapi seng ra nasiam roh hu Bangku, ase dapotan hagoluhan nasiam. [96]

⁴¹Seng Hujalo hasangapon humbani jolma. [97]

⁴²Tapi Hutanda do nasiam, seng dong holong dompak Naibata bani nasiam.

⁴³Roh do Ahu ibagas goran ni Bapa, hape seng ijalo nasiam Ahu. Tapi anggo roh na legan ibagas goranni sandiri, ijalo nasiam do anggo ai.

⁴⁴Sonaha ma tarbahen nasiam porsaya, ai marsijaloan sangap do nasiam samah nasiam; tapi anggo sangap na humbani Naibata na sasada in, seng ipindahi nasiam. [98]

⁴⁵Ulang ma iagan nasiam, Ahu mangaduhon nasiam bani Bapa in. Adong do na mangaduhon nasiam, ai ma si Musa, hatengeran ni uhur nasiam ai. [99]

⁴⁶Ai ambit na porsaya nasiam bani si Musa, porsaya do nasiam age Bangku, ai pasal Ahu do isuratkon. [100]

⁴⁷Tapi anggo seng porsaya nasiam bani suratni, sonaha ma porsaya nasiam bani hatang-Ku?” [101]