Read Batak Simalungun JOHANNES 6 Bible Online

JOHANNES 6 - Batak Simalungun bible

JOHANNES 6

¹Dob salpu ai, idipari Jesus ma Tao Galilea, ai ma Tao Tiberias.

²Buei do halak mangirikkon-Si, halani ididah sidea tanda halongangan, na binahen-Ni bani halak na boritan.

³Jadi tangkog ma Jesus hu dolog, laho hundul hujai rap pakon susian-Ni.

⁴Tapi dohor ma Paskah, ai ma ari raya ni Jahudi. [102]

⁵Sanggah mangkawah Jesus anjaha ididah roh buei halak hu lobei-Ni, jadi nini ma dompak si Pilippus, “Hunja ma bolionta ruti, ase mangan sidea in?”

⁶Tapi ihatahon pe sonai, na laho manlajousi do, ai ibotoh do aha sibahenon-Ni.

⁷Ibalosi si Pilippus ma Ia, “Harga dua ratus dinar pe ruti seng sungkup bani sidea, ase ganup sidea manjalo otik bei.”

⁸Jadi marbalos ma hubani sahalak humbani susian-Ni ai, ai ma si Andreas, anggi ni si Simon.

⁹“Adong do ijon sada dakdanak, na mamboan lima ruti pakon dua dengke, tapi sadiha ma in bani na sain buei?”

¹⁰Tapi nini Jesus ma, “Hatahon hanima ma hundul jolma in!” Adong do bolag sampalan ijai, gabe hundul ma dalahi ijai hira-hira lima ribu halak bueini.

¹¹Ase ibuat Jesus ma ruti ai, anjaha dob ihatahon tarima kasih, ipamberei ma bani na hundul ai; anjaha sonai do homa dengke ai, atap sadiha ninuhur ni sidea.

¹²Ase dob bosur sidea, nini ma dompak susian-Ni ai, “Patumpu hanima ma teba-teba in, ase ulang soya.”

¹³Jadi ipatumpu sidea ma, anjaha adong do sapuluh dua bantei teba-teba humbani na lima ruti ai, na so bois na mangan ai.

¹⁴Ase dob ididah simbuei ai tanda na binahen ni Jesus ai, nini sidea ma, “On ma tongon nabi ia, na sihol roh hu dunia on.” [103]

¹⁵Dob ibotoh Jesus, na sihol roh sidea manangkap-Si, laho pabangkitkon-Si gabe raja, jadi surut ma sahalak-Si hu dolog. [104]

¹⁶Ase dob bod ari, tuad ma susian-Ni ai hu tao ai.

¹⁷Imasuki sidea ma sada parau, anjaha idipari sidea ma tao ai laho hu Kapernaum. Domma pala golap ari, tapi lalab do seng roh Jesus manjumpahkon sidea.

¹⁸Anjaha mangombus ma logou na gogoh, gabe margilumbang ma tao ai.

¹⁹Jadi dob marluga sidea hira-hira dua atap tolu paal daohni, ididah sidea ma Jesus mardalan i atas tao ai, roh mandohori parau ai, gabe mabiar ma sidea.

²⁰Tapi nini ma dompak sidea, “Ahu do on, ulang mabiar!”

²¹Sihol pamasukon ni sidea ma Ia hu parau ai; mintor das ma parau ai hu pasir situjuon ni sidea ai.

²²Patarni ai ibotoh na mabuei, na i dipar ni tao ai ma, na so adong ijai parau na legan sobali na sasada ai, anjaha na so dihut Jesus masuk hu parau ai rap pakon susian-Ni, pitah susian-Ni ai do na misir.

²³Tapi marrohan do parau hun Tiberias dohor hu ianan parmanganan ruti, na tinonggohon ni Tuhan in. [105]

²⁴Ase dob ididah halak na mabuei ai, na so ijai be Jesus, age susian-Ni ai pe, imasuki sidea ma use parau ai, anjaha laho ma sidea hu Kapernaum mangindahi Jesus.

²⁵Jadi dob jumpah sidea Ia i dipar ni tao ai, nini sidea ma hu Bani, “Guru, sadihari do Ham hujon?”

²⁶Nini Jesus ma mambalosi sidea, “Na sintong tumang do na Huhatahon on bani nasiam, ipindahi nasiam pe Ahu, sedo halani na dob ididah nasiam tanda in, tapi halani na bosur ai do nasiam mangan ruti ai.

²⁷Ulang ma sipanganon na laho salpu horjahon nasiam, tapi sipanganon na totap ronsi hagoluhan sisadokah ni dokahni ma, na sihol bereon ni Anak ni Jolma in bani nasiam. Ai Ia do na tinokankon ni Bapa in, Naibata.” [106]

²⁸Dob ai nini sidea ma hu Bani, “Aha ma sibahenonnami, ase ihorjahon hanami horja harosuh ni Naibata?”

²⁹Nini Jesus ma mambalosi sidea, “On do horja harosuh ni Naibata, ase porsaya nasiam bani na sinuruh-Ni.” [107]

³⁰Dob ai nini sidea ma, “Aha tanda ibahen Ham, ase ididah hanami gabe porsaya hanami Bamu? Aha ihorjahon Ham? [108]

³¹Ia ompungnami, mangan manna do i halimisan, songon na tarsurat in, ʻIbere do ruti hun nagori atas panganon ni sidea.ʼ ” [109]

³²Jadi nini Jesus ma hubani sidea, “Sedo si Musa na mambere ruti bani nasiam hun nagori atas, tapi Bapang-Ku do mambere ruti na tongon bani nasiam hun nagori atas. [110]

³³Ai na susur hun nagori atas, in do sibere hagoluhan hu dunia on, in do ruti na humbani Naibata.”

³⁴Dob ai nini sidea ma, “Tuhan, ruti na sonin ma tongtong bere Ham bannami.”

³⁵Nini Jesus ma hubani sidea, “Ahu do ruti hagoluhan in. Barang ise na roh hu Bangku, seng anjai loheian be ia, anjaha na porsaya Bangku, seng anjai horahan be ia. [111]

³⁶Tapi domma Huhatahon bani nasiam, ididah nasiam do namin Ahu, tapi seng porsaya nasiam. [112]

³⁷Haganup na binere ni Bapa in Bangku, in do na roh hu Bangku, anjaha seng anjai pabalion-Ku na roh hu Bangku. [113]

³⁸Ai seng susur Ahu hun nagori atas, laho mambahen rosuh ni uhur-Hu, rosuh ni uhur ni na marsuruh Ahu do. [114]

³⁹Anjaha on do rosuh ni uhur ni na marsuruh Ahu, ase ulang magou Hubahen age sada humbani haganup, na dob niondoskon-Ni in Bangku, ase Hupagoluh in tene bani ari parpudi. [115]

⁴⁰Ai on do rosuh ni uhur ni na marsuruh Ahu, ase haganup na mangidah Anak in anjaha porsaya Bani, dapotan hagoluhan na sadokah ni dokahni, anjaha papuhoon-Ku do ia bani ari parpudi.” [116]

⁴¹Jadi marungut-ungut ma halak Jahudi dompak-Si halani hata-Ni ai, “Ahu do ruti, na susur hun nagori atas,”

⁴²Gabe nini sidea ma, “Ai lang Ia do Jesus, anak ni si Josep, anjaha ai lang itandai hita do bapa-Ni pakon inang-Ni? Mase ma ihatahon, ʻNa susur hun nagori atas do Ahu?”ʼ [117]

⁴³Nini Jesus ma mambalosi sidea, “Ulang nasiam marungut-ungut!

⁴⁴Ise pe lang na boi roh hu Bangku, anggo seng Bapa in, na marsuruh Ahu, manogusi; anjaha Ahu do na papuhohonsi bani ari parpudi. [118]

⁴⁵Adong do tarsurat bani buku ni nabi-nabi, ʻNa niajaran ni Naibata do sidea ganupan. Haganup na manangihon Bapa in anjaha marguru hu Bani, in do na roh hu Bangku.ʼ [119]

⁴⁶Seng dong halak na dob ongga mangidah Bapa in, sobali na roh humbani Bapa in; Ia do na dob mangidah Bapa in. [120]

⁴⁷Na tongon tumang do na Huhatahon on bani nasiam, barang ise na porsaya, parrupei do ia bani hagoluhan sisadokah ni dokahni. [121]

⁴⁸ Ahu do ruti hagoluhan in. [122]

⁴⁹Na mangan manna do ompung nasiam i halimisan, anjaha matei do. [123]

⁵⁰On do ruti na susur hun nagori atas, ase ulang matei na mangankonsi.

⁵¹Ahu do ruti na manggoluh, na susur hun nagori atas. Barang ise na mangan ruti on, manggoluh do ia sadokah ni dokahni. Ia ruti sibereon-Kai bahen hagoluhan ni dunia on, in ma daging-Ku.” [124]

⁵²Dob ai marsual ma halak Jahudi samah sidea, nini ma, “Sonaha ma boi Halak on mambere daging-Ni in panganonta?”

⁵³Jadi ihatahon Jesus ma hubani sidea, “Anggo seng ipangan nasiam daging ni Anak ni Jolma in, anjaha seng iinum nasiam daroh-Ni, seng dapot nasiam hagoluhan in.

⁵⁴Na mangankon daging-Ku anjaha na manginum daroh-Ku dapotan hagoluhan na sadokah ni dokahni, anjaha papuhoon-Ku do ia bani ari parpudi.

⁵⁵Ai sipanganon na tongon do daging-Ku, anjaha siinumon na tongon do daroh-Ku.

⁵⁶Barang ise na mangankon daging-Ku anjaha na manginum daroh-Ku, ai do na marianan ibagas Ahu anjaha Ahu ibagas ia. [125]

⁵⁷Songon parsuruh ni Bapa Sipargoluh in Bangku, gabe manggoluh Ahu marhitei Bapa in, sonai do manggoluh marhitei Ahu na mangankon Ahu.

⁵⁸On do ruti na susur hun nagori atas, tapi seng songon na pinangan ni ompung-ompung ondi, hape matei do. Na mangankon ruti on manggoluh do ronsi sadokah ni dokahni.”

⁵⁹In ma hata ni Jesus, sanggah mangajari Ia i parguruan i huta Kapernaum.

⁶⁰Ase buei ma humbani susian-Ni na manangar hata ai, mangkatahon, “Hata na koras do in, ise ma ra pabogei-bogei in?”

⁶¹Ibotoh Jesus ma, na dob marungut-ungut susian-Ni ai pasal ai, gabe nini ma dompak sidea, “Mintor halani in ma hanima sangsi?

⁶²Sonaha ma anggo ididah hanima holi Anak ni Jolma in naik hu ianan-Ni hinan? [126]

⁶³Tonduy in do pagoluhkon, seng marguna anggo daging in. Ia hata na Huhatahon bannima, Tonduy do in ampa hagoluhan. [127]

⁶⁴Tapi adong do deba hun bannima na so porsaya.” Ia Jesus ibotoh hinan do humbani mungkahni, ise sidea na so porsaya ampa na sihol mantahihon-Si. [128]

⁶⁵Jadi nini ma, “Halani ai ma ase Huhatahon bannima, paboa na so tarbahen atap ise roh hu Bangku, anggo seng na binerehon ai bani marhitei Bapa in.” [129]

⁶⁶Buei ma humbani susian-Ni ai na manadingkon-Si hunjia nari, seng be ihasomani sidea Ia.

⁶⁷Jadi nini Jesus ma hubani na sapuluh dua ai, “Ai seng dihut hanima sihol laho?”

⁶⁸Ibalosi si Petrus ma Ia, “Hu bani ise ma hanami laho Tuhan? Bamu do hata hagoluhan sisadokah ni dokahni! [130]

⁶⁹ Anjaha domma ihaporsayai anjaha itanda hanami, Ham do Na Pansing ni Naibata!” [131]

⁷⁰Ibalosi Jesus ma sidea, “Ai lang sapuluh dua do hanima, na dob Hupilih in? Tapi sibolis do sada hun bennima.”

⁷¹Si Judas, anak ni si Simon Iskariot do, na hinatahon-Ni ai. Ia do na mantahihon-Si use, ai ma sahalak humbani na sapuluh dua in.