Read Batak Simalungun JOHANNES 8 Bible Online

JOHANNES 8 - Batak Simalungun bible

JOHANNES 8

²Tapi patarni ai laho ma Ia use hu rumah panumbahan; roh ma halak na mabuei ai hu lobei-Ni, jadi hundul ma Ia laho mangajari sidea.

³Jadi iboan sibotoh surat ampa Parisei ma puang-puang, na tarjumpah marbangkis, hu lobei-Ni, ipajongjong ma ia hu tongah-tongah,

⁴anjaha nini sidea ma hu Bani, “Guru, na tardapot do puang-puang on marbangkis.

⁵Nini titah ni si Musa, sipargijigon do bani batu halak na sonon; ia Ham, sonaha do nimu?” [160]

⁶Ihatahon sidea pe sonai, na laho manlajou-Si do, ase adong dalan mangaduhon-Si. Tapi ipaunduk Jesus ma diri-Ni, lanjar manurat-nurat i tanoh marhitei jari-jari-Ni.

⁷Tapi halani sai inunut sidea manungkun-Si, Jesus pe dirgak ma, anjaha ihatahon ma bani sidea, “Barang ise na so mardousa humbani nasiam, ia ma parlobei manggijigisi bani batu.”

⁸Dob ai ipaunduk ma use diri-Ni, anjaha manurati bani tanoh.

⁹Tapi mambogei ai, misiran ma sidea sada-sada, pangintuai parlobei, gabe tading ma sahalak-Si ampa puang-puang ai, na jongjong ijai. [161]

¹⁰Ipadirgak Jesus ma diri-Ni, nini ma dompaksi, “Ija do sidea inang? Seng dong na manguhumi ham?”

¹¹Nini ma, “Seng dong Tuhan.” Jadi ihatahon Jesus ma, “Ahu pe, seng uhumon-Ku ham. Laho ma ham, ulang be nunut ham mardousa hunjon hujanan!”

¹²Dob ai nini Jesus ma use mangkatahon bani sidea, “Ahu do panondang ni dunia on. Seng anjai mardalan bani na golap na mangirikkon Ahu, bani do tene Panondang hagoluhan in.” [162]

¹³Jadi nini halak Parisei ma hu Bani, “Ia Ham, diri-Mu do isaksihon Ham; seng sintong hasaksian-Mu in.”

¹⁴Jadi nini Jesus ma mambalosi sidea, “Age pe pasal diring-Ku Husaksihon, sintong do hasaksian-Kin, ai Hubotoh do, hunja Ahu roh anjaha huja Ahu sihol laho. Tapi anggo nasiam, seng ibotoh nasiam hunja Ahu roh anjaha huja sihol laho Ahu. [163]

¹⁵Mangihutkon pardagingon do nasiam manguhumi. Anggo Ahu, seng dong Huuhumi age ise.

¹⁶Anjaha anggo manguhum Ahu, sintong do uhum-Hu, ai seng pitah Ahu na manguhum ai, tapi na marsuruh Ahu do hasoman-Ku. [164]

¹⁷Anjaha bani titah nasiam pe tarsurat do, ʻSintong do sinaksihon ni dua halak.ʼ [165]

¹⁸Ahu do na manaksihon pasal diring-Ku, anjaha Bapa in pe, na marsuruh Ahu, isaksihon do Ahu.”

¹⁹Nini sidea ma hu Bani, “Ai ija do Bapa-Mu?” Ibalosi Jesus ma, “Ahu atap Bapa pe, seng itandai nasiam. Ambit itandai nasiam Ahu, tandaon nasiam do age Bapa.”

²⁰Ai ma ihatahon i kamar parartaan, sanggah na mangajari Ia i rumah panumbahan. Ise pe lang na manangkap-Si, ai seng jumpah ope panorangni.

²¹Jadi nini ma use mambalosi sidea, “Na laho ma Ahu, jadi pindahan nasiam ma Ahu, anjaha matei ma nasiam ibagas dousa nasiam. Anjaha seng boi nasiam roh hu siparayakon-Kai.” [166]

²²Dob ai nini halak Jahudi ma, “Na laho mandolos do Ia nani, ase ihatahon, ʻSeng boi nasiam roh hu siparayakon-Kai?ʼ ” [167]

²³Jadi nini ma hubani sidea, “Na hun toruh on do nasiam, na hun babou do anggo Ahu. Na hun dunia on do nasiam, seng hun dunia on anggo Ahu. [168]

²⁴Halani ai do ase Huhatahon bani nasiam, na matei ma nasiam ibagas dousa nasiam. Ai anggo seng porsaya nasiam, Ahu do In, matei ma nasiam ibagas dousa nasiam.”

²⁵Nini sidea ma hu Bani, “Ai ise do Ham?” Ibalosi Jesus ma sidea, “Songon na dob Huhatahon ai bani nasiam!

²⁶Buei do sihatahonon-Ku ampa sipinsangon-Ku pasal nasiam. Parsintong do na marsuruh Ahu, anjaha na Hubogei hun Bani, ai do Husaksihon bani dunia on.”

²⁷Seng ibotoh sidea, Bapa in do na sinahapkon-Ni bani sidea marhitei ai.

²⁸Dob ai nini Jesus ma hubani sidea, “Dob pe ipagijang nasiam Anak ni Jolma in, ase ibotoh nasiam Ahu do in, anjaha na so adong Hubahen humbani diring-Ku, tapi songon na pinodahkon ni Bapa hu Bangku, sonai do Huhatahon. [169]

²⁹Anjaha na marsuruh Ahu, Ia do hasoman-Ku. Seng ongga itadingkon sahalak Ahu, ai rosuh ni uhur-Ni do tongtong Huhorjahon.” [170]

³⁰Dob ihatahon sonai, buei ma na gabe porsaya Bani.

³¹Jadi ihatahon Jesus ma dompak halak Jahudi na dob porsaya ai Bani, “Anggo totap nasiam ibagas hatang-Ku, sintong ma nasiam susian-Ku. [171]

³²Tandaon nasiam ma hasintongan in, anjaha paluahon ni hasintongan in ma nasiam.”

³³Ibalosi sidea ma Ia, “Ginompar ni si Abraham do hanami, anjaha seng ongga hanami hona parjabolonan. Mase ma ihatahon Ham, ʻManingon paluahon do nasiam?ʼ ”

³⁴Ibalosi Jesus ma sidea, “Na sintong tumang do hatang-Kon bani nasiam: Sagala na mangkorjahon dousa, jabolon ni dousa do ai. [172]

³⁵Anjaha jabolon, seng totap ai i rumah; anak do na totap tongtong.

³⁶ Anggo ipaluah Anak in nasiam, na maluah botul ma nasiam.” [173]

³⁷“Hubotoh, ginompar ni si Abraham do nasiam, tapi ipindahi nasiam do dalan mamunuh Ahu, ai seng siat hatang-Ku bani nasiam.

³⁸Na Huidah bani Bapa, ai do Huhatahon; nasiam pe, na binogei nasiam humbani bapa nasiam, ai do ihorjahon nasiam.”

³⁹Jadi nini sidea ma mambalosi-Si, “Ia bapanami, ai ma si Abraham.” Nini Jesus ma bani sidea, “Ambit anak ni si Abraham do nasiam, ihorjahon nasiam do horja ni si Abraham.

⁴⁰Tapi ipindahi nasiam do dalan laho mamunuh Ahu, na patugahkon bani nasiam hasintongan, na Hubogei humbani Naibata. Seng sonai pambahen ni si Abraham.

⁴¹Horja ni bapa nasiam do na hinorjahon nasiam.” Nini sidea ma hu Bani, “Sedo anak salong-salongan hanami, sada do bapanami, ai ma Naibata.”

⁴²Nini Jesus ma hubani sidea, “Ambit Naibata do bapa nasiam, holong do uhur nasiam Bangku, ai humbani Naibata do Ahu roh hujon; seng humbani diring-Ku Ahu na roh on, Ia do na marsuruh Ahu.

⁴³Mase ma lang iarusi nasiam hatang-Ku? Ai ma, halani seng tartangihon nasiam hatang-Ku.

⁴⁴Na marbapa hubani sibolis do nasiam, anjaha rosuh ni bapa nasiam do sihol bahenon nasiam. Sibunuh jolma do ia humbani mungkahni, anjaha seng jongjong ia ibagas hasintongan, ai seng dong hasintongan ibagas dirini. Anggo ihatahon ladung, domu hubani hadirionni do na hinatahonni ai, ai siparladung do ia anjaha bapa ni ladung. [174]

⁴⁵Tapi hasintongan do Huhatahon, hape seng porsaya nasiam Bangku.

⁴⁶Ise humbani nasiam boi mambuktihon, pardousa Ahu? Anggo Huhatahon na sintong, mase ma lang porsaya nasiam Bangku? [175]

⁴⁷Barang ise na humbani Naibata, tangihononni ai do hata ni Naibata. Halani na so humbani Naibata do nasiam mambahen lang itangihon nasiam Ahu.” [176]

⁴⁸Jadi nini halak Jahudi ma mambalosi-Si, “Ai lang sintong do hatanami, halak Samaria do Ham anjaha na sibolison?” [177]

⁴⁹Ibalosi Jesus ma, “Seng na sibolison Ahu; Hupasangap do Bapa in, jadi iapasi nasiam do Ahu.

⁵⁰Ia Ahu seng Hupindahi sangap-Ku; adong do na mangindahi ai anjaha na manguhumi. [178]

⁵¹Na sintong tumang do hatang-Kon bani nasiam, barang ise na mangkorjahon hatang-Ku, seng idahonni hamatean sadokah ni dokahni. ” [179]

⁵²Nini halak Jahudi ma hu Bani, “Sonari ibotoh hanami ma, na sibolison do Ham. Na matei do si Abraham ampa nabi-nabi, hape Ham mangkatahon, ʻBarang ise na mangkorjahon hatang-Kin, seng dageion ni in hamatean sadokah ni dokahni.

⁵³Ai banggalan do Ham humbani bapanami si Abraham, na dob matei in? Anjaha nabi-nabi pe matei do. Ai ise do Ham, ninuhur-Mu?”

⁵⁴Ibalosi Jesus ma, “Anggo Ahu pasangap diring-Ku, na so adong ma sangap-Ku. Adong do Bapang-Ku, na pasangap Ahu, in ma na hinatahon nasiam Bapa nasiam.

⁵⁵Anjaha seng itanda nasiam Ia, tapi anggo Ahu Hutanda do. Ambit Huhatahon, seng Hutanda Ia, parladung ma Ahu songon nasiam. Tapi Hutanda do Ia, anjaha Hudalankon do hata-Ni. [180]

⁵⁶Marolob-olob do si Abraham, bapa nasiam in, halani sihol idahonni ari-Kin, jadi saud do ididah, gabe malas ma uhurni.”

⁵⁷Dob ai nini halak Jahudi ma hu Bani, “Lima puluh tahun pe lape das umur-Mu, mintor ongga ma ididah Ham si Abraham?”

⁵⁸Nini Jesus ma hubani sidea, “Na sintong tumang do na Huhatahon on bani nasiam, lape tubuh si Abraham, domma adong Ahu.”

⁵⁹Jadi ibuat sidea ma batu, laho manggijigi-Si, tapi ponop ma Jesus misir hun rumah panumbahan ai. [181]