Read Batak Simalungun JOHANNES 9 Bible Online

JOHANNES 9 - Batak Simalungun bible

JOHANNES 9

¹Dob ai sanggah na montas Ia, ididah ma sada halak na pitung humbani partubuhni.

²Jadi nini susian-Ni ai ma manungkun-Si, “Guru, ise do na mardousa, halak on do atap namatorasni, ase pitung ia humbani partubuhni?”

³Ibalosi Jesus ma, “Sedo halani dousani atap halani dousa ni namatorasni, tapi ase ipatalar bani horja ni Naibata. [182]

⁴Maningon horjahonon-Ku do horja ni na marsuruh Ahu, sadokah siang ari; ai rohkonsi borngin, seng tarbahen atap ise pe marhorja. [183]

⁵Sadokah i dunia on Ahu, panondang ni dunia on do Ahu.” [184]

⁶Dob ihatahon sonai, martijur ma Ia hu tanoh, laho pamalhot tanoh otik marhitei tijur-Ni ai, idaiskon ma na malhot ai bani matani, [185]

⁷lanjar nini ma hu bani, “Laho ma ham marsuhap hu bongbongan Siloam (artini: na sinuruh).” Jadi laho ma ia marsuhap, gabe marpangidah ma ia mulak hunjai.

⁸Jadi nini romban rumahni ma, sonai age na ongga mangidahsi hinan mangindo-indo, “Ai lang on do, na hundul mangindo-indo ondi?”

⁹Na deba mangkatahon, “Ia do in!” Na deba nari mangkatahon, “Lang, tapi usih do ia hujai!” Ia sandiri mangkatahon, “Ahu do in!”

¹⁰Nini sidea ma hu bani, “Sonaha do parmungkab ni matamu in?”

¹¹Nini ma mambalosi, “Sada halak, na margoran Jesus pamalhot tanoh. Idaiskon ma ai bani matangku, anjaha ihatahon ma ahu marsuhap hu bongbongan Siloam. Jadi laho ma ahu marsuhap, gabe marpangidah ma.”

¹²Dob ai nini sidea ma bani, “Ija do Ia?” Balosni, “Seng hubotoh!”

¹³Jadi iarahkon sidea ma na pitung hinan ai hu lobei ni Parisei.

¹⁴Tapi ari Sabat do tudu, sanggah na pinamalhot ni Jesus tanoh ai, anjaha na niungkab-Ni ai matani ai. [186]

¹⁵Lanjar isungkun Parisei ai ma ia, atap sonaha do, ase marpangidah ia. Jadi nini ma hubani sidea, “Tanoh na pinamalhot do idaiskon bani matangku, dob ai marsuhap ma ahu, gabe marpangidah ma ahu.”

¹⁶Piga-piga halak Parisei ai mangkatahon, “Seng na humbani Naibata Halak ai, ai seng ihargahon ari Sabat.” Na legan mangkatahon, “Mintor tarhorjahon pardousa ma tanda na sonai ai?” Jadi marsalisih ma sidea samah sidea. [187]

¹⁷Dob ai ihatahon sidea ma use bani halak na pitung ai, “Ia ho, sonaha do pangkatahonmu pasal-Si, halani iungkab matamu?” Jadi nini ma, “Nabi do Ia.”

¹⁸Seng iparhatongon Jahudi ai, na pitung hinan do ia, dob ai marpangidah use, pala idilo sidea namatoras ni na gabe marpangidah ai,

¹⁹anjaha isungkun ma sidea, “Anak nasiam do on, na hinatahon nasiam ai pitung humbani partubuhni? Na sonaha do, ase marpangidah ia nuan?”

²⁰Jadi nini namatorasni ai ma mambalosi sidea, “Tongon do on anaknami, anjaha pitung do ia tubuh.

²¹Sonaha, ase marpangidah ia sonari, seng ibotoh hanami, anjaha ise na mangungkab matani in, seng itanda hanami. Ia ma sungkun nasiam, domma sungkup umurni, domma boi ia marsahap pasal dirini.”

²²Ase sonai pe hata ni namatorasni ai, halani mabiar do sidea mangidah halak Jahudi ai. Ai domma manriah halak Jahudi, maningon sipabalion do hun kuria, barang ise na marhatongonkon Kristus do Ia. [188]

²³Halani ai do ase ihatahon namatorasni ai, “Domma sungkup umurni, ia ma sungkun nasiam.”

²⁴Dob ai idilo sidea ma paduahalihon na pitung ondi, nini sidea ma hu bani, “Pasangap ma Naibata! Ibotoh hanami, pardousa do Halak ai!” [189]

²⁵Jadi nini ma mambalosi, “Barang pardousa Ia seng hubotoh. Pitah on do na hubotoh, mapitung do ahu hinan, tapi marpangidah do nuan.”

²⁶Dob ai nini sidea ma hu bani, “Ai aha ibahen bam? Sonaha do ibahen mangungkab matamu?”

²⁷Ibalosi ma sidea, “Domma hupatugah ai bani nasiam, na so ibogei nasiam do in? Sonaha, sihol bogeion nasiam use? Sihol nasiam gabe susian-Ni?”

²⁸Jadi isuraki sidea ma ia, nini ma, “Ho do susian-Ni, anggo hanami susian ni si Musa do.

²⁹Ibotoh hanami, na iparsahapkon Naibata do si Musa, tapi anggo Halak on, seng nabotoh, atap na hunja Ia.”

³⁰Jadi nini ma mambalosi sidea, “Halongangan ma in tongon na so ibotoh nasiam atap na hunja Ia, hape iungkap do matangku!

³¹Ibotoh hita do, na so itangihon Naibata pardousa, tapi na marhabiaran Bani, anjaha sihorjahon rosuh ni uhur-Ni, ai do itangihon. [190]

³²Hun bani sapari, seng ongga nabogei, adong na mangungkab mata ni halak na mapitung tubuh.

³³Ambit seng humbani Naibata Ia, seng tarbahensi age aha.” [191]

³⁴Jadi nini sidea ma hu bani, “Hibul do ho tubuh ibagas dousa, hape sihol ajaranmu hanami?” Jadi ipabali sidea ma ia. [192]

³⁵Itangar Jesus ma, na dob ipabali sidea ia. Dob jumpah-Si ia, nini ma, “Porsaya do ho bani Anak ni Jolma in?”

³⁶Jadi nini ma mambalosi, “Ai ise do ai Tuan, ase porsaya ahu Bani?”

³⁷Nini Jesus ma hu bani, “Na nididahmu, anjaha na marsahap pakon ho, in ma Ia.” [193]

³⁸Jadi nini ma, “Na porsaya do Ahu, Tuhan!” Lanjar isombah ma Ia.

³⁹Dob ai ihatahon Jesus ma, “Mamboan uhum do ase roh Ahu hu dunia on, ase marpangidah na so marpangidah hinan, anjaha na marpangidah hinan gabe mapitung.” [194]

⁴⁰Ibogei deba halak Parisei na rap pakonsi ai ma ai, gabe nini ma dompak-Si, “Ai dihut do hanami pitung?”

⁴¹Nini Jesus ma hubani sidea, “Ambit pitung nasiam, seng mardousa nasiam. Tapi halani ihatahon nasiam, ʻMarpangidah do hanami,ʼ gabe totap ma dousa nasiam.” [195]