Read Batak Simalungun LAHOAN NI APOSTEL 11 Bible Online

LAHOAN NI APOSTEL 11 - Batak Simalungun bible

LAHOAN NI APOSTEL 11

¹Jadi ibogei apostel ampa sanina na i Judea ma, na dob dihut do hape sipajuh begu-begu manjalo hata ni Naibata.

²Gabe ihata na porsaya humbani Jahudi ma si Petrus, das honsi ia i Jerusalem, nini sidea ma, [219]

³“Masuk do ham hape hu rumah ni halak na so marsunat, anjaha rap mangan do ham pakon sidea!” [220]

⁴Jadi jojor ma humbani mulani ipatorang si Petrus na masa ai, nini ma,

⁵“Sanggah martonggo ahu i huta Joppe, huidah ma ibagas panonggoran sada ianan songon hiou na bolag, martali haompatsi suhi-suhini, turun hun langit, itantan hu lobeihu. [221]

⁶Jadi sanggah na hukawahkon ai, laho papangkeihon, huidah ma binatang siompat nahei ni tanoh on, binatang sipanjulur ampa na liar ampa manuk-manuk na i awang-awang.

⁷Anjaha hubogei ma sora na mangkatahon hu bangku, ʻJongjong ma, Petrus, sayati ma anjaha pangan ma!ʼ

⁸Tapi ningku ma, ʻLang, Tuhan! Ai lang ongga ope na butak atap na so pansing masuk hu pamanganku.ʼ

⁹Jadi marbalos ma sora ai paduahalihon hun langit, ʻNa dob pinapansing ni Naibata, ulang hatahon ai butak!ʼ

¹⁰Tolu hali do masa na sonai, dob ai itarik ma haganupan ai hu langit.

¹¹Bani panorang ai jongjong ma tolu halak i lobei ni rumah ianannami, ai ma na sinuruh hun Kesarea, marayak ahu. [222]

¹²Anjaha ihatahon Tonduy in do bangku, ase ulang sangsi uhurhu mangirikkon sidea. Sanina na onom halak on do mangkasomani ahu, gabe masuk ma hanami hu rumah ni halak ai. [223]

¹³Ibaritahon do bannami sonaha pangidahni bani malekat ai jongjong i rumahni, na mangkatahon bani, ʻSuruh ma hu Joppe na mangalopi si Simon, na margoran si Petrus.

¹⁴Hatahononni do bamu hata na sihol paluahkon ham ampa haganup sinrumahmu!ʼ [224]

¹⁵Tapi sanggah mulai ope ahu marambilan ijai, sogop ma Tonduy Na Pansing bani sidea, songon na hu banta mungkahni ondi. [225]

¹⁶Jadi taringat ma ahu bani hata ni Tuhan in, na mangkatahon, ʻBah do ididihon si Johannes, tapi Tonduy Na Pansing do didihononkon bani nasiam!ʼ [226]

¹⁷Jadi, anggo ibere Naibata do bani sidea sibere-bere-Ni songon na hu banta, dob porsaya sidea bani Tuhan Jesus Kristus, sonaha ma boi ahu manlanglangi Naibata?”

¹⁸Ase dob ibogei sidea ai, sip ma sidea. Ipuji sidea ma Naibata, nini ma, “Ase dihut do hape bani sipajuh begu-begu ibere Naibata hamubahon ni uhur, ase manggoluh.” [227]

¹⁹Ia halak na merap ai, pangkorhon ni parburuon marhalanihon ni si Stepanus, laho ma hu Penesia, hu Pulou Kiprus ampa hu Antiokia, anjaha marambilani do sidea, tapi pitah hubani halak Jahudi do hansa. [228]

²⁰Tapi adong do deba humbani sidea, na marasal hun Kiprus ampa Kirene, na roh hu Antiokia, gabe ibaritahon sidea do homa ijai Tuhan Jesus hubani halak Gorik.

²¹Anjaha ihasomani tangan ni Tuhan in do sidea; gabe buei do na gabe porsaya, na mandompakkon Tuhan in. [229]

²²Tarbogei ma pasal ai hu kuria na i Jerusalem, gabe isuruh sidea ma si Barnabas hu Antiokia. [230]

²³Das ma ia hujai, ididah ma idop ni uhur ni Tuhan in, gabe malas ma uhurni; iojur ma sidea haganup, ase poltik uhur ni sidea marsijoloman bani Tuhan in, [231]

²⁴ai halak sidear uhur do ia, gok Tonduy Na Pansing ampa haporsayaon; buei do halak na gabe tartogu bani Tuhan in. [232]

²⁵Jadi laho ma ia hu Tarsus, mangindahi si Saulus, anjaha dob jumpahsi iboan ma ia hu Antiokia. [233]

²⁶Anjaha adong do sidea, na rap ai pakon kuria ai, satahun dokahni; buei do halak na iajari sidea. I Antiokia do mulai igoran susian ai halak Kristen. [234]

²⁷Bani panorang ai roh ma nabi-nabi hun Jerusalem hu huta Antiokia. [235]

²⁸Jadi roh ma sada halak humbani sidea, na margoran si Agabus, gabe ipatugah ma marhitei Tonduy in pasal lohei maningting, na sihol sogop hu sab tanoh on, ai ma na tongon masa sanggah panrajaion ni si Klaudius. [236]

²⁹Jadi sapanriah ma susian ai manongos tumpak, domu hubani na tarbahensi bei, hubani sanina na i Judea. [237]

³⁰Saud ma ibahen sidea ai, itongos ma ai hubani sintua-sintua na ijai ai marhitei si Barnabas ampa si Saulus. [238]