Read Batak Simalungun LAHOAN NI APOSTEL 22 Bible Online

LAHOAN NI APOSTEL 22 - Batak Simalungun bible

LAHOAN NI APOSTEL 22

¹“Nasiam sanina ampa bapa, tangar nasiam ma sonari pangapition diri na huhatahon i lobei nasiam!” [453]

²Ase dob ibogei sidea, na iparsahapkon ai sidea ibagas hata Heber, lambin sip ma sidea. [454]

³“Halak Jahudi do ahu, tubuh i Tarsus na i Silisia, tapi magodang i huta on; i lobei ni si Gamaliel do ahu iajari domu hubani hatulimaton ni titah ni ompungta, pongkut do ahu mangirikkon Naibata, songon haganup nasiam sadari on. [455]

⁴Huparburu do ronsi matei parugama on, husangkut anjaha hupatutupkon do dalahi age naboru, [456]

⁵anjaha pasal ai, sintua ni malim ampa harungguan ni pangintuai-pangintuai do saksi bangku. Hun bani sidea do hujalo surat siboanon hubani sanina-sanina ai, anjaha laho ma ahu hu Damaskus, sihol manangkapi na ijai ai homa, anjaha mamboan sidea ibagas gari hu Jerusalem, ase iuhumi.

⁶Tapi masa ma, sanggah i tongah dalan ahu, dohorhon Damaskus, hira-hira tongah arian, sompong ma marsinalsal hun datas, inggot hu bangku, sinalsal na lihar tumang.

⁷Tompas ma ahu hu tanoh, anjaha hubogei ma sora na mangkatahon hu bangku, ʻSaul! Saul! Mase ma pardakdakonmu Ahu?ʼ

⁸Jadi ningku ma mambalosi, ʻIse do Ham Tuhan?ʼ Nini ma hu bangku, ʻJesus do Ahu, na hun Nasaret, na pinardakdakmin!ʼ

⁹Ididah hasomanku do namin sinalsal ai, tapi anggo sora ai, na marsahap pakon ahu, seng ibogei sidea.

¹⁰Jadi ningku ma, ʻAha ma sibahenonku, Tuhan?ʼ Jadi ihatahon Tuhan in ma hu bangku, ʻJongjong ma ho, laho ma ho hu Damaskus, ijai ma patugahon bam haganup na patut sihorjahononmu.ʼ

¹¹Tapi seng marpangidah be ahu ibahen sinalsal ni sondang ai, gabe itogu hasomanku mando ahu das hu Damaskus.

¹²Anjaha dong ma ijai sada halak na margoran si Ananias, halak na daulat domu hubani titah in, dear do baritani bani haganup Jahudi na marianan ijai.

¹³Roh do ia hu bangku nini, ʻAmbia Saul, marpangidah ma ho!ʼ Jadi mintor marpangidah ma ahu anjaha huidah ma ia.

¹⁴Dob ai nini ma, ʻDomma ipilih Naibata ni ompungta ham, ase itanda ham rosuh ni uhur-Ni, ididah ham Parpintor in anjaha ibogei ham sandiri sora-Ni,

¹⁵ase gabe saksi-Ni ham bani haganup jolma pasal na nididah ampa na binogeimu.ʼ

¹⁶Ai pe, mase ma sonai sangsi-sangsi uhurmu? Jongjong ma anjaha tardidi, paburihkon dousamu marhitei na mandilo goran-Ni.ʼ

¹⁷Dob mulak ahu hu Jerusalem anjaha martonggo i rumah panumbahan, marpanonggoran do ahu. [457]

¹⁸Huidah do Ia mangkatahon bangku, ʻPapodas ma misir hun Jerusalem, ai seng ra sidea manjalo hasaksianmu pasal Ahu.ʼ

¹⁹Jadi ningku ma, ʻIbotoh sidea do Tuhan, na hupatutupkon anjaha hulonsingi do na porsaya Bamu bani ganup rumah parguruan.

²⁰Anjaha sanggah na hona duruskon daroh ni si Stepanus, saksi-Mu ondi, jongjong do au homa ijai, huhadearhon do ai, anjaha ahu manjaga pakeian ni na mambunuhsi.ʼ [458]

²¹Jadi nini ma dompak ahu, ʻLaho ma, ai hubani na daoh do ho suruhon-Ku, ai ma hubani sipajuh begu-begu.ʼ ”

²²Das hubani hatani on, itangihon sidea do ia; dob ai ipagogoh sidea ma sorani, nini ma, “Padaoh ma jolma sisonin hun tanoh on, seng patut ia manggoluh!” [459]

²³Tapi sai mardilo-dilo do sidea, ihilap-hilapkon pakeianni anjaha ipansaburhon orbuk hu atas.

²⁴Jadi ihatahon kapiten ai ma ia boanon hubagas tangsi, anjaha isuruh ma pareksaon ia marhitei na manlonsingisi, ase ibotoh mase sonai parsurak-surak ni sidea dompaksi. [460]

²⁵Tapi dob isangkut sidea ia bani tali hulingkuling, nini si Paulus ma dompak letnan na jongjong ijai, “Ai bulih do lonsingan nasiam warga negara Rom, age lape napareksa parkarani?” [461]

²⁶Mambogei ai letnan ai, laho ma ia bani kapiten ai, patugahkon ai, nini ma, “Ai aha do na sihol bahenonmu? Halak Rom do hape halak ai.”

²⁷Jadi roh ma kapiten ai hu bani, nini ma, “Patugah bangku, halak Rom do ho tongon?” Balosni, “Ai do!”

²⁸Dob ai marbalos ma kapiten ai, “Anggo ahu, buei do rugi mamboli hak warga negara in.” Tapi nini si Paulus ma, “Anggo ahu, humbani partubuhku do sonai.”

²⁹Jadi mintor surut ma halak na sihol mamareksa ai. Kapiten ai pe mabiar ma, dob ibotoh halak Rom do hape si Paulus, na dob sinuruhni sangkuton. [462]

³⁰Patarni ai sihol ma torang botohonni, aha halani mambahen na iaduhon halak Jahudi ia; ipadarat ma ia, ihatahon ma martumpu sintua ni malim ampa rapot bolon ai, anjaha si Paulus pe itogu ma hu tongah-tongah ni sidea. [463]