Read Batak Simalungun 1 KORINT 1 Bible Online

1 KORINT 1 - Batak Simalungun bible

1 KORINT 1

¹Hun bani si Paulus, na tardilo gabe apostel ni Kristus Jesus mangihutkon rosuh ni Naibata, ampa si Sostenes sanina in,

²hubani kuria ni Naibata na i Korint, na dob pinapansing ibagas Kristus Jesus, halak na mapansing, na tardilo rap pakon haganup halak na mandilo goran ni Tuhanta Jesus Kristus atap ija pe Tuhan ni sidea ampa Tuhanta: [1]

³Idop ni uhur ma bani nasiam ampa damei humbani Naibata Bapanta ampa humbani Tuhan Jesus Kristus! [2]

⁴Mangkatahon tarima kasih do ahu tongtong bani Naibata halani nasiam, mardingat idop ni uhur ni Naibata na binere-Ni bani nasiam ibagas Kristus Jesus.

⁵Ai na dob bayak do nasiam ibagas Ia pasal haganup ibagas ganup hata in ampa bani ganup pangarusion,

⁶halani hasaksian pasal Jesus domma totap bani nasiam,

⁷gabe seng marhahurangan be nasiam pasal haganup masam ni sibere-bere partonduyon ibagas na paimahon nasiam bani partalar ni Tuhanta Jesus Kristus. [3]

⁸Patotapon-Ni do nasiam ronsi ujungni, gabe seng sihataon be bani ari ni Tuhan Jesus Kristus. [4]

⁹ Haposan do Naibata, na mandilo nasiam hu parsaoran pakon Anak-Ni Jesus Kristus Tuhanta in. [5]

¹⁰Tapi hupodahi ma nasiam, nasiam saninangku, marhitei goran ni Tuhanta Jesus Kristus, ase sahata ma nasiam haganup, ulang ma adong parbolah-bolahan bani nasiam, tapi totap ma nasiam sada marhitei sada ni uhur ampa sada ni pingkiran. [6]

¹¹Ai das do hu bangku marhitei parrumah ni si Kloe pasal nasiam, saninangku, paboa adong do paringoran i tongah-tongah nasiam.

¹²On do na huhatahon: Ganup do nasiam mangkatahon, “Ahu susian ni si Paulus! Ahu susian ni si Apollos! Ahu susian ni si Kepas! Ahu susian ni Kristus!” [7]

¹³Ai na binagi do Kristus in? Ai na dob tarsilang do si Paulus mangkopkop nasiam? Ai hubagas goran ni si Paulus do nasiam tardidi?

¹⁴Tarima kasih ma huhatahon, halani seng dong hudidi humbani nasiam sobali si Krispus ampa si Gayus, [8]

¹⁵ase ulang adong na mangkatahon hubagas goranku sandiri nasiam tardidi.

¹⁶Tapi dihut do tene parrumah ni si Stepanas hudidi; na legan, seng hubotoh atap adong ope na dob hudidi. [9]

¹⁷Ai seng isuruh Kristus ahu mandidihon, tapi mangambilankon Ambilan Na Madear do, anjaha ai pe seng marhata hapentaron, ase ulang lumei kuasa ni silang ni Kristus. [10]

¹⁸ Ai haotoon do hata pasal silang in bani halak na laho magou, tapi hagogohon ni Naibata do in banta, na jumpahan haluahon. [11]

¹⁹Ai tarsurat do, “Huparseda do hapentaron ni na pentar, anjaha huambukkon do uhur ni siparuhur.” [12]

²⁰Ija do halak na pentar? Ija do sibotoh surat? Ija do siparsual-sual ni dunia on? Ai lang gabe haotoon do hapentaron ni dunia on ibahen Naibata?

²¹Ai halani ibagas hapentaron ni Naibata, seng itanda dunia on Naibata marhitei hapentaron, gabe iharosuhkon Naibata ma paluahkon na porsaya in marhitei ambilan haotoon. [13]

²²Ai na mangindo tanda do halak Jahudi, anjaha mangindahi hapentaron halak Gorik. [14]

²³Tapi anggo hanami, Kristus na tarsilang in do iambilankon hanami; parsangsian do in bani Jahudi anjaha haotoon bani halak sipajuh begu-begu. [15]

²⁴Tapi bani na dob tardilo ai, halak Jahudi age halak Gorik, Kristus, ai ma hagogohon ni Naibata ampa hapentaron ni Naibata. [16]

²⁵Ai haotoon ni Naibata, pentaran do ai ase jolma in, anjaha hagalekon ni Naibata, gogohan do ai ase jolma in. [17]

²⁶Tonggor nasiam ma pandiloon-Ni in bani nasiam, saninangku, seng piga nasiam na pentar mangihutkon pardagingon, seng piga na markuasa, seng piga na sangap. [18]

²⁷Tapi na oto ninuhur ni dunia on, ipilih Naibata laho pailahon na pentar, anjaha na galek ninuhur ni dunia on, ipilih Naibata laho pailahon na gogoh.

²⁸Na toruh anjaha na mahiri i dunia on ipilih Naibata, na lang in do tene, ase langkononni na adong hinan,

²⁹ase ulang adong hajolmaon na mangunsagah i lobei ni Naibata. [19]

³⁰Tapi marhiteihonsi do ase ibagas Kristus Jesus nasiam, ai Ia do gabe hapentaron banta humbani Naibata, hapintoron ampa hapansingon ampa haluahon, [20]

³¹ase saud na dob tarsurat in, “Na mamuji dirini, ibagas Tuhan in ma ia mamuji!“