Read Batak Simalungun 1 KORINT 12 Bible Online

1 KORINT 12 - Batak Simalungun bible

1 KORINT 12

¹Anjaha pasal sibere-bere partonduyon, nasiam sanina, seng dear uhurhu lang marpambotoh nasiam.

²Ibotoh nasiam do, sanggah sipajuh begu-begu ope nasiam, na dob itogu anjaha isarad do nasiam bani gana-gana na longah. [177]

³Halani ai hupabotohkon ma bani nasiam, seng adong halak, na marsahap marhitei Tonduy ni Naibata mangkatahon, “Hona papa ma Jesus,” anjaha seng adong na boi mangkatahon, “Jesus ai ma Tuhan,” anggo lang marhitei Tonduy Na Pansing.

⁴ Bagei do sibere-bere partonduyon, tapi sada do Tonduy. [178]

⁵ Bagei do horja pangidangion, tapi sada do Tuhan. [179]

⁶ Bagei do hagogohon, tapi sada do Naibata, na mangkorhon haganupan ai ibagas haganup.

⁷Bani ganup do ibere partalar ni Tonduy in bahen hadearon ni ganup. [180]

⁸Bani na sada ibere marhitei Tonduy in hata hapentaran, bani na sada nari hata habotohon romban hubani Tonduy na sasada in.

⁹Bani na legan use haporsayaon marhitei Tonduy na sada in, bani na legan sibere-bere pamalumkon marhitei Tonduy na sada in.

¹⁰Bani na legan hagogohon mambahen halongangan, bani na legan panjahaion, bani na legan panimbangion pasal bagei ni tonduy, bani na legan marsahap ibagas hata na legan, anjaha bani na legan use patorangkon sahap ai.

¹¹Tapi haganupan ai ihorjahon Tonduy na sada in, palegan-legan ibagihon bani ganup romban bani rosuh ni uhur-Ni.

¹²Ai songon badan, sada do in, anjaha marpagori buei, tapi haganup pagorini in, age pe buei in, sada badan do in; sonai do age Kristus. [181]

¹³Ai ibagas sada Tonduy do haganup hita tardidi hubagas sada badan, age Jahudi, age Gorik, age jabolon age halak na bebas, anjaha sada do Tonduy ipainumkon bani hita haganup. [182]

¹⁴Ai badan in pe, seng sada pagori, tapi buei do. [183]

¹⁵Porini ihatahon nahei: “Halani seng tangan ahu, seng masuk ahu bani badan, mintor lang masuk badan ma ai halani ai?”

¹⁶Anjaha porini ihatahon pinggol: “Halani seng mata ahu, seng masuk ahu bani badan, mintor lang ma masuk badan ai halani ai?”

¹⁷Anggo mata haganup badan, ija ma parbinogeian? Anggo haganup pinggol, ija ma panganggoh?

¹⁸Tapi iatur Naibata do pagori in, ganup bani iananni bei bani badan, domu hubani rosuh ni uhur-Ni.

¹⁹Porini sada pagori haganup, ija ma badan?

²⁰Ase age pe buei pagori, sada do badan. [184]

²¹Ase seng boi hatahonon ni mata bani tangan: “Seng benahangku ho;” atap ulu mangkatahon bani nahei: “Seng benahangku ho!”

²²Tapi tene, pagori na tar hurang idahon, ai do siporlunan,

²³anjaha pagori ni angkulanta, na hurang harga ninuhurta, ai do sangapan ibahen hita, anjaha na hurang sangap ninuhurta sarinan do hita pasal ai.

²⁴Tapi seng pala porlu ai bani pagori na sangap hinan. Ia Naibata, iatur do angkula in, anjaha sangapan ibahen pagori na dorun hinan,

²⁵ase ulang adong parbolah-bolahan ibagas badan, tapi ase marsiurupan pagori samah pagori.

²⁶Anggo mangarou sada pagori, rap mangarou do haganup pagori in, anjaha anggo ipasangap sada pagori, rap marmalas ni uhur do ganup pagori in.

²⁷Nasiam do badan ni Kristus in, anjaha pagori do nasiam samah nasiam. [185]

²⁸Anjaha ipabangkit Naibata do ibagas kuria in parlobei apostel, paduahon nabi, patoluhon sipangajari, dob ai hagogohon mambahen halongangan, dob ai sibere-bere pamalumkon, gogoh laho mangurupi, hapentaran mambobai, marsahap na legan. [186]

²⁹Ai haganup do gabe apostel? Ai haganup do gabe nabi? Ai haganup do gabe sipangajari? Ai haganup do margogoh mambahen halongangan?

³⁰Ai haganup do dapotan sibere-bere pamalumkon? Ai haganup do marhata na legan? Ai haganup do pandei patorangkon?

³¹Tapi pindahi nasiam ma sibere-bere sibanggalan. Anjaha patuduhononku ope bani nasiam dalan sisurungan. [187]