Read Batak Simalungun 1 KORINT 13 Bible Online

1 KORINT 13 - Batak Simalungun bible

1 KORINT 13

¹Porini pe husahapkon sagala sahap ni jolma ampa malekat pe, anggo seng adong holong bangku, songon ogung na marolol do ahu atap giring-giring na mardiring.

²Porini pe adong bangku sibere-bere panjahaion, anjaha hubotoh haganup rusia ampa haganup habotohon, anjaha porini pe parhaporsayaon na botul ahu gabe tarpaosor ahu dolog, anggo seng adong holong bangku, na lang do ahu.

³Anjaha porini hulayak-layakkon haganup artangku anjaha huondoskon badanku ase itutung, anggo seng adong haholongon bangku, sabonar na so marguna do ai bangku. [188]

⁴Na sabar do haholongon in anjaha na basar, seng subil haholongon in, seng mangunsagah anjaha ipajuntul-juntul dirini.

⁵Hormat do haholongon in, seng ipindahi na bani sandiri, seng urah marah, anjaha seng ipadingat-dingat na jahat. [189]

⁶Seng malas uhurni mangidah hagedukon, tapi malas do uhurni bani hasintongan. [190]

⁷Bani haganup do ia tahan, haganup do ihaporsayai, haganup do iarapkon, sabar do ia manaron haganup. [191]

⁸Seng na ra salpu haholongan in. Ia panjahaion maronti do, mangadi do age sahap, habotohon pe maronti do.

⁹Ai mardeba-deba do habotohonta, anjaha mardeba-deba do age panjahaionta.

¹⁰Anggo roh na gokan dear ai, parontihonon ma na mardeba-deba.

¹¹Sanggah dakdanak ahu, danak do parsahapku, danak paruhuronku, danak pingkiranku, tapi dob mangodang ahu, hutadingkon do biak hadanakon ai.

¹²Anggo sonari, mangkawah do hita songon bani sormin, samak hansa, tapi use padumpar bohi ma. Mardeba-deba do panandaionku nuan, tapi anggo use gok ma panandaionku, songon na dob tinandani ahu. [192]

¹³ Ase tolu do na totap, ai ma haporsayaon, pangarapan ampa holong, tapi holong ai do sibanggalan. [193]