Read Batak Simalungun EPESUS 6 Bible Online

EPESUS 6 - Batak Simalungun bible

EPESUS 6

¹Nasiam dakdanak, balosi nasiam ma namatoras nasiam ibagas Tuhan in, ai in do na pintor. [92]

²Pasangap bapamu pakon inangmu! In do titah na parlobei marhasoman bagah-bagah, [93]

³ai ma ase martuah ho anjaha dokah manggoluh i tanoh on! [94]

⁴Nasiam bapa, ulang pasoru-soru nasiam dakdanak nasiam; pagodang-godang nasiam ma sidea ibagas ajar ampa podah ni Tuhan in! [95]

⁵Anjaha nasiam jabolon, balosi nasiam ma kopala nasiam na i tanoh on, marhasoman biar ampa gobir ibagas bujur ni uhur, songon bani Kristus. [96]

⁶Ulang ma pambalosi sanggah ididah tuan nasiam tumang, songon na mambuat-buat uhur ni jolma, tapi songon jabolon ni Kristus ma horjahon nasiam rosuh ni Naibata humbani gok ni uhur nasiam.

⁷Hun bani bujur ni uhur ma nasiam mambalosi, songon bani Tuhan in, sedo bani jolma.

⁸Ai ibotoh nasiam do, suang do jaloon ni ganup humbani Tuhan in, anggo adong na madear na hinorjahonni, barang jabolon ia atap jolma na bebas pe.

⁹Anjaha nasiam kopala-kopala, sonai ma bahen nasiam bani sidea, anjaha parontihon nasiam ma na sorgang-sorgang in, ai ibotoh nasiam do, i nagori atas do Tuhan ni sidea ampa Tuhan nasiam, anjaha seng sididah bohi Ia. [97]

¹⁰Ambahni ai, lambin margogoh ma nasiam ibagas Tuhan in ampa ibagas gogoh ni kuasa-Ni in. [98]

¹¹Pakei nasiam ma pakeian sinjata na humbani Naibata, ase boi tahan nasiam dompak akal-akal ni sibolis in. [99]

¹²Ai seng maruntol hita manlawan daroh pakon daging, tapi dompak sipanrajai do, siparkuasa, sigomgomi dunia hagolapan on, tonduy hajahaton na i awang-awang ai. [100]

¹³Halani ai, jalo nasiam ma pakeian sinjata na humbani Naibata, ase tarbahen nasiam manlawan bani ari na jahat ai, anjaha totap jongjong, dob italuhon nasiam ganupan in.

¹⁴Ase, jongjong ma nasiam, margondit hasintongan bani binongei nasiam, marbaju bosi hapintoron,

¹⁵anjaha nahei marsipatu ringgas ni uhur, laho mangambilankon Ambilan Na Madear, pardameian in. [101]

¹⁶ Ambah ni ganupan in, jalo nasiam ma gantar haporsayaon in, ai tarintopi nasiam do marhitei in haganup panah apuy ni parjahat in. [102]

¹⁷ Jalo nasiam ma homa tangkuluk bosi haluahon ampa podang ni tonduy, ai ma hata ni Naibata. [103]

¹⁸Martonggo ma nasiam barang sadihari pe ibagas Tonduy in, ibagas tonggo ampa elek-elek, anjaha puho ampa golgol manonggohon haganup halak na susi in, [104]

¹⁹age ahu pe, ase ibere bangku hata-Ni, anjaha iungkab pamanganku laho pabotohkon rusia ni Ambilan Na Madear in marhasoman hinsah ni uhur, [105]

²⁰(halani in do ase marhorja ahu songon suruhan na tarrantei), ase marhinsah ni uhur ahu mangkatahonsi, songon na patut. [106]

²¹Tapi, ase ibotoh nasiam na masa bangku ampa horjangku, patugahon ni si Tikikus do bani nasiam ganupan in, ai ia do sanina na hinaholongan anjaha siparugas hatengeran ni uhur ibagas Tuhan in. [107]

²²Halani in do ase husuruh ia marayak nasiam, ase boi botohon nasiam na masa bannami, anjaha ase iapohi uhur nasiam.

²³Damei ma bani sagala sanina ampa holong rapkon haporsayaon humbani Naibata Bapa in ampa humbani Jesus Kristus. [108]

²⁴Idop ni uhur ma mangkasomani haganup na marholong ni uhur bani Tuhanta Jesus Kristus, na totap sadokah ni dokahni.