Read Batak Simalungun KOLOSSE 4 Bible Online

KOLOSSE 4 - Batak Simalungun bible

KOLOSSE 4

¹Nasiam tuan-tuan, bahen nasiam ma na pintor ampa na patut bani jabolon nasiam, ingat nasiam, adong do homa bani nasiam Tuhan i nagori atas. [61]

²Tongtong ma nasiam martonggo, anjaha puho ma pasal ai marhasoman tarima kasih. [62]

³Tonggohon nasiam ma homa hanami, ase ibere Naibata labah na ungkab bannami mangambilankon hata in, mangkatahon rusia pasal Kristus, ai halani in do ahu targari, [63]

⁴ase hupatalar in, songon na patut pangkatahonku.

⁵Marpantas ni uhur ma nasiam marparlahou dompak halak na i darat; pargunahon nasiam ma panorang. [64]

⁶Sai tongtong ma jenges hata nasiam, songon na ginaraman, ase ibotoh nasiam, sonaha patut marbalos bani ganup halak. [65]

⁷Patugahon ni si Tikikus do bani nasiam haganup na masa bangku; sanina na hinaholongan do ia, siparugas na bujur, anjaha hasoman sahorja ibagas Tuhan in.

⁸Husuruh do ia bani nasiam, ase ibotoh nasiam na masa bannami, anjaha ase iapoh uhur nasiam. [66]

⁹Dihut do homa si Onesimus, sanina na hinaholongan, na bujur in, ai ma na roh humbani nasiam. Patugahon ni sidea ma bani nasiam sagala na masa bannami. (Pilem. 10)

¹⁰Manongos tabi do bani nasiam si Aristarkus, hasomanku tartutup, ampa si Markus, panogolan ni si Barnabas. Domma ijalo nasiam hata pasalsi, ase anggo roh ma ia bani nasiam, jalo nasiam ma ia. [67]

¹¹Sonai homa si Jesus, na margoran si Justus. Pitah sidea do humbani halak Jahudi hasomanku sahorja ibagas Harajaon ni Naibata; na gabe apoh-apoh do sidea bangku.

¹²Manongos tabi do bani nasiam si Epapras, na roh humbani nasiam, juakjuak ni Kristus Jesus; tongtong do ia maruntol manonggohon nasiam, ase gokan dear nasiam jongjong anjaha atok ibagas haganup, na hinarosuhkon ni Naibata. [68]

¹³Ahu ma manaksihon pasalsi, paboa buei tumang do halojaonni mangkopkop nasiam ampa hasoman na i Laodikea pakon na i Hierapolis.

¹⁴Manongos tabi do bani nasiam si Lukas, doktor in. [69]

¹⁵Padas nasiam ma tabingku bani sanina na i Laodikea ampa bani si Nimpas ampa bani kuria na martumpu i rumahni.

¹⁶Dob ibasa surat on i tongah-tongah nasiam, ibasa ma homa on i kuria Laodikea; anjaha surat na hu Laodikea ai pe basa nasiam ma homa.

¹⁷Hatahon nasiam ma hubani si Arkippus, jaga ma, ase tohonan na dob jinalomu ibagas Tuhan in, torsa idalankon ho in! (Pilem. 2)

¹⁸On ma tabi hun bangku, si Paulus, na sinurat ni tanganku. Dingat nasiam ma ahu, na tarrantei on. Idop ni uhur ma bani nasiam. [70]