Read Batak Simalungun JOSUA 1 Bible Online

JOSUA 1 - Batak Simalungun bible

JOSUA 1

¹Jadi dob matei si Musa, juakjuak ni Jahowa, nini Jahowa ma dompak si Josua, anak ni si Nun, suruh-suruhan ni si Musa,

²“Domma matei si Musa, juakjuak-Kin, on pe bingkat ma ho, dipari ma Jordan on, ho pakon haganup bangsa on, hu tanoh siberehonon-Ku hubani sidea, hubani halak Israel. [1]

³Ganup ianan sidogeian ni tapak ni naheinima, domma Hubere bannima, songon na dob Huhatahon hubani si Musa hinan. [2]

⁴Humbani halimisan ai pakon Libanon das hu bah bolon ai, ai ma Bah Eprat, haganup tanoh ni halak Het das hu laut na bolag ai hampit hasundutan, ai ma parbalogannima.

⁵Seng dong barang ise na tahan jongjong i lobeimu sadokah ho manggoluh; songon pangkasomaning-Ku bani si Musa, hasomanan-Ku do ho; seng anjai paturuton-Ku barang tadingkonon-Ku ho. [3]

⁶Pir ma tonduymu anjaha totap uhurmu, ai maningon ho do marbagi tanoh on bahen parbagianan ni bangsa on, na dob Hubulawankon hubani ompung ni sidea, laho mamberehon ai bani sidea. [4]

⁷Asal ma pir tonduymu anjaha totap tumang uhurmu manramotkon anjaha mangkorjahon romban hubani ganup titah in, na dob tinonahkon ni si Musa, juakjuak-Kin, bam. Ulang ho manlembang hunjai, hu siamun atap hu sambilou, ase martuah ho barang huja pe ho laho. [5]

⁸ Ulang ma mosor buku ni titah on hun pamanganmu, sai pingkir-pingkiri ma in arian pakon borngin, ase iramotkon anjaha ihorjahon ho romban hubani na tarsurat ibagas in, jadi marulih ma ho bani sagala dalanmu anjaha mardohar ma ho. [6]

⁹Ai lang domma Huhatahon bam, ʻPir ma tonduymu anjaha totap uhurmu, ulang gobir anjaha mabiar, ai Jahowa Naibatamu do hasomanmu, barang huja pe ho laho?ʼ ”

¹⁰Dob ai iparentahkon si Josua ma hubani pambobai ni bangsa ai,

¹¹“Bontas nasiam ma tongah-tongah ni parsaranan in, anjaha hatahon nasiam ma hubani bangsa in, ʻPasirsir nasiam ma bohal nasiam, ai ibagas tolu ari on ope diparan nasiam ma Jordan on, ase imasuki anjaha isoluk nasiam tanoh sibereon ni Jahowa Naibata nasiam in bani nasiam, bahen parbagianan nasiam.ʼ ”

¹²Jaha hubani halak Ruben, Gad pakon satongah marga Manase nini si Josua ma,

¹³“Ingat nasiam ma hata na tinonahkon ni si Musa, juakjuak ni Jahowa bani nasiam, na mangkatahon, ʻDomma sonang nasiam ibahen Jahowa Naibata nasiam, anjaha ibere bani nasiam tanoh on. [7]

¹⁴Tading ma parinangon nasiam, anak nasiam pakon pinahan nasiam i tanoh, na dob binere ni si Musa bani nasiam i dipar ni Jordan; tapi sagala siimbang munsuh i tongah-tongah nasiam maningon mandipar ma marsinjata bei i lobei ni sanina nasiam, laho mangurupi sidea,

¹⁵paima sonang ibahen Jahowa sanina nasiam songon nasiam, anjaha dihut sidea manoluk tanoh, sibereon ni Jahowa Naibata nasiam bani sidea; dob ai mulak ma nasiam hu tanoh parbagianan nasiam, ase nasiam simada ai, ai ma tanoh na binere ni si Musa, juakjuak ni Jahowa, hubani nasiam i dipar ni Bah Jordan hampit hapoltakan.ʼ ”

¹⁶Dob ai nini sidea ma mambalosi si Josua, “Ganup na pinarentahkonmu bennami sai bahenonnami do, anjaha barang huja pe hanami suruhonmu, parayakonnami do.

¹⁷Songon panangihonnami bani si Musa, sonai do tangihononnami ham, asal ihasomani Jahowa Naibatamu ham, songon na hinasomanan-Ni si Musa.

¹⁸Barang ise na mangimbang parentahmu, anjaha seng itangihon hatamu, sagala na pinarentahkonmu bennami, maningon marutang hosah ia; pir ma tonduymu anjaha totap uhurmu.” [8]