Read Batak Simalungun JOSUA 13 Bible Online

JOSUA 13 - Batak Simalungun bible

JOSUA 13

¹Jadi dob sayur matua si Josua, nini Jahowa ma hu bani, “Domma sayur matua ho, anjaha buei tumang ope tanoh in sipatundukon.

²On do tanoh, na tading ai ope: Ganup nagori ni halak Palistim pakon ganup tanoh Gesuri,

³hun bah Sihor nari, na i hapoltakan ni Masir, das hu parbalogan ni Ekron na hampit utara -- masuk hubani halak Kanaan do hiraon ai --, na lima raja ni halak Palistim ai ma raja hun Gaza, Asdod, Askalon, Gad pakon na hun Ekron; ambah ni ai halak Awi,

⁴na i Dangsina, ganup tanoh ni halak Kanani, pakon Meara. Na masuk hubani halak Sidon, das hu Apek, hu parbalogan ni halak Amori,

⁵ambah ni ai tanoh ni halak Gibli, pakon ganup Libanon, dompak hapoltakan, hun Baal-Gad na i bona ni Dolog Hermon nari, das hu Hamat,

⁶ganup pangisi ni tanoh dolog, hun Libanon nari das hu Misrepot-Maim, ganup halak Sidon. Ahu pe mangusir sidea i lobei ni halak Israel. Ruji-rujihon tumang ma in bahen parbagianan ni Israel, songon na dob huhatahon bam. [97]

⁷On pe bagihon ma tanoh on bahen parbagianan bani na siah marga pakon bani na satongah marga Manase.”

⁸Rap pakon marga Manase na satongah nari, domma ijalo marga Ruben pakon Gad parbagiananni bei, na binere ni si Musa hubani sidea i dipar ni Jordan hampit hapoltakan, songon na binere ni si Musa, juakjuak ni Jahowa hubani sidea, [98]

⁹Hun Aroer, na i topi ni habungan ni bah Arnon, pakon huta na i tongah-tongah ni habungan ai, pakon haganup pamah Medeba das hu Dibon;

¹⁰pakon ganup huta ni si Sihon, raja ni halak Amori, na manggomgomi Hesbon das hu parbalogan ni halak Amon;

¹¹pakon Gilead ampa tanoh ni halak Gesuri pakon Maakati, pakon ganup Dolog Hermon ampa ganup Basan das hu Salka;

¹²ganup gomgoman ni si Og i Basan, na manggomgomi i Astarot pakon i Ederei, ia ma na tading humbani tading-tadingan ni ginompar ni si Refaim, na tinaluhon anjaha na niusir ni si Musa.

¹³Tapi seng iusir halak Israel anggo halak Gesuri pakon halak Maakati; marianan i tongah-tongah ni halak Israel do halak Gesuri pakon Maakati ronsi sadari on.

¹⁴Pitah hubani marga Levi do na so ibere parbagianan; galangan situtungon bani Jahowa, Naibata ni Israel do parbagianan-Ni, songon na hinatahon-Ni hinan bani sidea. [99]

¹⁵Ase domma ibere si Musa hinan parbagianan hubani marga Ruben mar sasapangku! (4 Mus. 32)

¹⁶Ia tanoh ni sidea, ai ma hun Aroer na i topi ni habungan ni bah Arnon pakon huta na i tongah-tongah ni habungan ai, pakon ganup na i lambung ni Medeba,

¹⁷Hesbon pakon ganup huta na i pamah ai, Dibon pakon Bamot-Baal ampa Bet-Baal-Meon,

¹⁸Jahas, Kedemot pakon Mefaat,

¹⁹Kiriataim, Sibma, Zeretsahar na i dolog ni habungan ai,

²⁰Bet-Peor, raboyon ni Pisga pakon Bet-Jesimot,

²¹ai ma ganup huta na i pamah ai, pakon ganup harajaon ni si Sihon, raja ni halak Amori, na manrajai i Hesbon, na tinaluhon ni si Musa, ia pakon kopala-kopala ni Midian, ai ma si Ewi, Rekem, Sur, Hur pakon Reba, raja wakil ni si Sihon, marianan i tanoh ai.

²²Sonai homa si Bileam, anak ni si Beor, partondung ai, ibunuh halak Israel do marhitei podang, rap pakon hasomanni na tarbunuh ai. [100]

²³Jadi parbalogan ni tanoh ni halak Ruben, ai ma Bah Jordan pakon topi-topini ai. Ai ma parbagianan ni halak Ruben mar sasapangku, huta pakon dusun.

²⁴Anjaha domma ibere si Musa parbagiananni hubani halak Gad, hubani ginompar ni si Gad mar sasapangku.

²⁵Tanoh ni sidea, ai ma: Jaeser pakon ganup huta na i Gilead, pakon satongah ni tanoh ni halak Amon, das hu Aroer patontang pakon Rabba,

²⁶anjaha hun Hesbon das hu Ramot-Mispa pakon Betonim anjaha hun Mahanaim das hu parbalogan ni Debir,

²⁷anjaha i pamah ai Bet-Haram, Bet-Nimra, Sukkot pakon Zafon, teba-teba hun harajaon ni si Sihon, raja hun Hesbon, Jordan pakon topi-topini, das hu ujung ni Tao Kinneret i dipar ni Jordan hampit hapoltakan.

²⁸Ai ma parbagianan ni halak Gad mar sasapangku, huta pakon dusun.

²⁹Domma ibere si Musa parbagianan hubani satongah marga Manase, on ma parbagianan ni na satongah marga Manase ai mar sasapangku.

³⁰Tanoh ni sidea ai mulai hun Mahanaim: ganup Basan, ganup harajaon ni si Og, raja hun Basan, pakon ganup huta ni si Jair na i Basan, onom puluh huta bueini, [101]

³¹pakon satongah ni Gilead, Astarot, Ederei, huta-huta ni harajaon ni si Og, na i Basan; ibere ma ai hubani si Makir, anak ni si Manase, hubani satongah anak ni si Makir mar sasapangku.

³²Ai ma na binagihon ni si Musa i pamah Moab i dipar ni Jordan, hampit hapoltakan ni Jeriko.

³³Tapi hu marga Levi, seng dong ibere si Musa parbagianan; Jahowa Naibata ni Israel do parbagianan ni sidea, songon na hinatahon-Ni hubani sidea. [102]