Read Batak Simalungun JOSUA 14 Bible Online

JOSUA 14 - Batak Simalungun bible

JOSUA 14

¹On do parbagianan na jinalo ni halak Israel i tanoh Kanaan, na binagihon ni Malim Eleasar pakon si Josua, anak ni si Nun pakon kopala ni halak Israel mar sasamarga. [103]

²Marhitei ruji-ruji do ibagihon bani sidea parbagianan ni sidea ai, songon na tinonahkon ni Jahowa marhiteihon ni si Musa, bereon hubani na siah pakon na satongah marga ai. [104]

³Ai domma ibere si Musa parbagianan ni na dua pakon na satongah marga ai i dipar i Jordan, tapi hubani halak Levi seng dong ibere parbagianan i tongah-tongah ni sidea. [105]

⁴Ai gabe dua marga do anak ni si Josep, ai ma si Manase pakon si Efraim; halani ai seng ibere sidea parbagianan bani halak Levi i tanoh ai, pitah huta do bahen ianan pakon sampalan bahen ianan ni pinahan ni sidea ampa ugas-ugas ni sidea. (bd. 21)

⁵Songon na tinonahkon ni Jahowa hubani si Musa, sonai do ibahen halak Israel, anjaha ibagi sidea ma tanoh ai.

⁶Dob ai roh ma halak Juda marayak si Josua i Gilgal, gabe nini si Kaleb, anak ni si Jepunne, halak Kenas ai ma hu bani, “ Ibotoh ham do hata, na hinatahon ni Jahowa hubani si Musa, juakjuak ni Jahowa, pasal ahu pakon pasal ham i Kades Barnea. [106]

⁷Marumur ompat puluh tahun ma ahu, sanggah na sinuruh ni si Musa, juakjuak ni Jahowa, ahu hun Kades-Barnea, laho mangkahapi tanoh ai; anjaha mulak ma ahu mamboan barita bani songon na domu ibagas uhurhu. [107]

⁸Tapi hasomanku, na rap tangkog pakon ahu mangganggui uhur ni bangsa in, tapi anggo ahu totap do marsijoloman hubani Jahowa Naibatangku.

⁹Jadi marbulawan ma si Musa bani ari ai, nini ma, “Tanoh, na nidalanan ni naheimu, bam ma ai bahen parbagianan bam pakon bani anakmu sadokah ni dokahni, halani totap ni uhurmu bani Jahowa Naibatangku.

¹⁰On pe, tonggor ma, ipagoluh Jahowa do ahu songon na hinatahon-Ni ai, sonari domma ompat puluh lima tahun, dob ihatahon Jahowa hata ondi bani si Musa, sadokah mardalan halak Israel i halimisan. On pe, tonggor ma, ualuh puluh lima tahun ma ahu sadari on.

¹¹Tong ope gogohku sadari on, songon sanggah bani parsuruh ni si Musa bangku; songon gogohku ijia, lanjar sonai ope gogohku sonari laho marporang, laho luar pakon masuk. [108]

¹²Halani ai, bere ma bangku dolog on, songon pangkatahon ni Jahowa bani ari ai, ai ibogei ham sandiri do bani ari ai, halak Enak do ijai, anjaha huta na banggal anjaha na toguh do ai. Ra ihasomani Jahowa do ahu, ase tarusir ahu sidea, songon na hinatahon ni Jahowa.” [109]

¹³Jadi ipasu-pasu si Josua ma ia, anjaha ibere Hebron hubani si Kaleb, anak ni si Jepunne, bahen parbagiananni [110]

¹⁴Sonai ma Hebron gabe parbagianan ni si Kaleb, anak ni si Jepunne, halak Kenas ai, ronsi sadari on, halani totap ni uhurni bani Jahowa Naibata ni Israel.

¹⁵Ia goran ni Hebron sapari Kiriat-Arba do; si Arba, ai do jolma sibolonan i tongah-tongah ni halak Enak. Jadi sonang ma tanoh ai humbani hamunsuhon. [111]