Read Batak Simalungun JOSUA 16 Bible Online

JOSUA 16 - Batak Simalungun bible

JOSUA 16

¹Parbagianan ni anak ni si Josep mangihutkon ruji-ruji, ai ma: Hun Jordan na i lambung ni Jeriko, hampit hapoltakan ni Bah Jeriko, laho hu halimisan, tangkog hu Jeriko, laho hu dolog dompak Betel.

²Hun Betel laho hu Lus, dob ai mandipar hu tanoh ni halak Arki hu Atarot,

³anjaha tuad dompak hasundutan hu tanoh ni halak Japleti, das hu tanoh ni Bet-Horon parkehen, dob ai hu Gezer, anjaha marujung i laut.

⁴Ijalo anak ni si Josep ma parbagiananni, ai ma si Manase pakon si Efraim.

⁵Ia tanoh ni anak ni si Efraim mar sasapangku, ai ma: Parbalogan ni parbagianan ni sidea hampit hapoltakan: Atarot-Adar das hu Bet-Horon parhuluan,

⁶dob ai laho ma parbalogan ai hu laut; hampit utara ai ma Mikmetat; dob ai hampit hapoltakan marlegot ma parbalogan ai hu Taamat-Silo, anjaha mandipar hunjai hampit hapoltakan hu Janoah,

⁷dob ai hun Janoah tuad hu Atarot pakon hu Naarat, dob ai ihonai Jeriko, anjaha marujung i Jordan.

⁸Hun Tapuah laho ma parbalogan ai dompak hasundutan hu Bah Kana anjaha marujung i laut. Ai ma parbalogan ni marga Efraim mar sasapangku.

⁹Ambah ni ai huta na pinapulig bani halak Efraim, i tongah-tongah ni parbagianan i halak Manase, haganup huta-huta rap pakon dusunni. [124]

¹⁰Tapi seng iusir sidea halak Kansan na marianan i Geser. Jadi marianan ma halak Kanaan i tongah-tongah ni Efraim das ronsi sadari on, tapi hona rodi do sidea. [125]