Read Batak Simalungun JOSUA 18 Bible Online

JOSUA 18 - Batak Simalungun bible

JOSUA 18

¹Dob ai martumpu ma ganup kuria ni halak Israel hu Silo, anjaha ipajongjong sidea ma ijai lampolampo partumpuan ai, dob tunduk tanoh ai i lobei ni sidea. [132]

²Tapi adong ope pitu marga nari na tading i Israel na so ibagihon ope parbagianan ni sidea.

³Jadi nini si Josua ma dompak halak Israel, “Sadia dokah on marlansei nasiam laho manoluk tanoh in, na binere ni Jahowa, Naibata ni ompung nasiam, bani nasiam?

⁴Buat nasiam ma humbani ganup marga tolu halak, ase husuruh sidea manlioti tanoh on, anjaha manurati mangihutkon parbagianan ni sidea bei, dob ai pe ase mulak sidea hu bangku.

⁵Maningon bagion ni sidea in gabe pitu bagian. Totap do si Juda bani tanohni hampit dangsina, anjaha ginompar ni si Josep totap bani tanohni hampit utara.

⁶Tapi surati nasiam ma tanoh in gabe pitu bagian, dob ai boan nasiam ma hu bangku, ase hutibalhon ruji-ruji bani nasiam ijon i lobei ni Jahowa Naibatanta.

⁷Tapi lang marparbagianan halak Levi i tongah-tongah nasiam, ai hamalimon ni Jahowa do parbagianan ni sidea. Ia Gad, Ruben pakon satongah marga Manase domma dapotan parbagianan i dipar ni Jordan hampit hapoltakan, na binere ni si Musa, juakjuak ni Jahowa bani sidea.” [133]

⁸Jadi bingkat ma dalahi ai, anjaha ihatahon si Josua ma hubani na laho manurati tanoh ai, nini ma, “Laho ma nasiam manlioti tanoh in, surati nasiam ma; dob ai mulak ma nasiam hu bangku, ase hudabuh ruji-ruji bani nasiam ijon, i lobei ni Jahowa i Silo.”

⁹Dob ai laho ma dalahi ai, ilioti sidea ma tanoh ai, anjaha isurati mangihutkon huta-huta, gabe pitu bagian hubagas buku; dob ai mulak ma sidea hubani si Josua, hu parsaranan i Silo.

¹⁰Ase idabuh si Josua ma bani sidea ruji-ruji i Silo i lobei ni Jahowa; ase ijai do ibagi si Josua tanoh ai bani halak Israel mangihutkon parbagianan ni sidea bei.

¹¹Jadi luar ma ruji-ruji ni marga Benjamin mar sasapangku anjaha tanoh mangihutkon ruji-ruji bani sidea, ai ma i holangkolang ni anak ni si Juda pakon si Josep.

¹²Parbalogan ni sidea hampit utara mulai hun Jordan; dob ai tangkog ma parbalogan ai hu urung-urung na i utara ni Jeriko, anjaha tangkog hu dolog dompak hasundutan, anjaha marujung i halimisan Bet-Awen.

¹³Hunjai mandipar ma parbalogan ai hu Lus, dompak dangsina hu urung-urung ni Lus, ai ma Bet-El; tuad use ma parbalogan ai hu Aterot-Adar, na i dolog, na i dangsina ni Bet-Horon parkehen. [134]

¹⁴Dob ai marlegot ma parbalogan ai, anjaha marhusor i hasundutan dompak dangsina ni dolog ai, na i dangsina ni Bet-Horon, anjaha marujung i Kiriat-Baal, ai ma Kiriat-Jearim, sada huta ni anak ni si Juda; ai ma pispisni hampit hasundutan. [135]

¹⁵Anjaha pispisni hampit dangsina mulai hun ujung ni Kiriat-Jearim, hunjai laho ma parbalogan ai hu Epron, hu sumbul ni Bah Nepton;

¹⁶dob ai tuad ma parbalogan ai hu ujung ni dolog, na i lobei ni habungan Ben-Hinnom, na i habungan ni halak Refaim, hampit utara, tuad use hu habungan Hinnom, i dangsina ni urung-urung Jebusi, dob ai tuad use hu En-Rogel,

¹⁷dob ai marlegot dompak utara laho hu En-Semes, hunjai laho hu Geliot, ai ma tontang ni tangkogan Adumim; dob ai tuad hu batu ni si Bohan, anak ni si Ruben;

¹⁸anjaha mandipar hu utara ni urung-urung ni Bet-Araba, dob ai tuad hu Araba.

¹⁹Dob ai mandipar ma parbalogan ai hu utara ni urung-urung Bet-Hogla, marujung ma parbalogan ai i uruk parutara ni laut Garam, ai ma i ujung pardangsina ni Jordan, ai ma parbalogan pardangsina.

²⁰Tapi anggo hampit hapoltakan Jordan ai do balogni. Ai ma parbagianan ni halak Benjamin, mangihutkon pangku ni sidea, mangihutkon parbalogan ni sidea inggot.

²¹Ia huta ni marga Benjamin mar sasapangku ai ma: Jeriko, Bet-Hogla, Emek-Kesis,

²²Bet-Araba, Semaraim, Bet-El,

²³Awim, Para, Opra,

²⁴Kapar-Amonai, Ofni pakon Geba. Sapuluh dua huta ma ai pakon dusunni.

²⁵Gibeon, Rama, Beerot,

²⁶Mizpa, Kefira, Mosa,

²⁷Rekem, Jirpeel, Tarala,

²⁸Sela, Elep pakon Jebus -- ai ma Jerusalem --, Gibeat pakon Kiriat. Sapuluh ompat huta ma ai pakon dusunni. Ai ma parbagianan ni halak Benjamin mar sasapangku. [136]