Read Batak Simalungun JOSUA 23 Bible Online

JOSUA 23 - Batak Simalungun bible

JOSUA 23

¹Dob ai bani labanglabang ni ari, dob marhasonangan halak Israel ibahen Jahowa dompak ganup munsuh ni sidea inggot, anjaha dob sayur matua si Josua, [168]

²jadi idilo si Josua ma ganup Israel, pangintuaini pakon kopala-kopalani, panguhumni pakon gamotni, nini ma dompak sidea, “Domma sayur matua ahu,

³anjaha domma iidah nasiam sagala na binahen ni Jahowa Naibata nasiam hubani ganup bangsa on mangkopkop nasiam, ai Jahowa Naibata nasiam sandiri do marporang mangkopkop nasiam.

⁴Tonggor ma, domma hubagihon bani nasiam bangsa na teba ai bahen parbagianan ni Israel mar sasamarga, hun Jordan nari -- rap pakon haganup bangsa na dob husiapkon -- das hu laut na bolag ai i hasundutan.

⁵Anjaha Jahowa Naibata nasiam do sihol mardakdak sidea i lobei nasiam, anjaha Ia do na sihol mangusir hun lobei nasiam, ase nasiam manean tanoh ni sidea, romban hubani baga-bagah ni Jahowa Naibata nasiam hubani nasiam.

⁶Antong totap tumang ma uhur nasiam manramotkon anjaha mangkorjahon haganup na tarsurat ibagas buku titah ni si Musa, ase ulang manlembang nasiam hu siamun barang hu sambilou, [169]

⁷ase ulang saor nasiam bani bangsa na tading i tongah-tongah nasiam, barang padilo-diloon nasiam goran ni naibata ni sidea, barang marbija marhiteihon ai, barang balosan nasiam ai, barang marsombah nasiam hujai; [170]

⁸tapi marsijoloman hubani Jahowa Naibata nasiam ma nasiam, songon na binahen nasiam das hubani sadari on.

⁹Ai domma iusir Jahowa hun lobei nasiam bangsa na bolon anjaha na markuasa, anjaha sahalak pe lang na tahan jongjong i lobei nasiam das hubani sadari on. [171]

¹⁰Sahalak tumang humbani nasiam mardakdak na saribu halak, ai Jahowa Naibata nasiam sandiri do marporang mangkopkop nasiam, songon na dob pinarbagah-Ni hinan.

¹¹Jaga tumang ma nasiam bani diri nasiam laho mangkaholongi Jahowa Naibata nasiam;

¹²ai anggo marbalik nasiam, anjaha longkot uhur nasiam bani tading-tadingan ni bangsa, na tading i tongah-tongah nasiam, anjaha marsibuatan boru nasiam, anjaha marsaor nasiam pakon sidea anjaha sidea pakon nasiam,

¹³botoh nasiam ma, seng be nunuton ni Jahowa Naibata nasiam mangusir bangsa on hun lobei nasiam; tapi sidea ma gabe siding ampa tirangkap, gabe lonsing-lonsing i lambung nasiam, gabe duri ibagas mata nasiam, paima siap nasiam hun tanoh na madear on, na dob binere ni Jahowa Naibata nasiam bani nasiam. [172]

¹⁴Tonggor ma, na laho ma ahu marayak dalan parsadaan ni ganup tanoh on, anjaha botoh nasiam ma humbani sagala uhur pakon tonduy nasiam, na so adong tading age sada hata humbani haganup hata na madear in, na pinarbagah ni Jahowa Naibata nasiam bani nasiam; haganup do saud bani nasiam, seng dong tading age sada hata hunjai. [173]

¹⁵Tapi songon na sogop bani nasiam haganup hata na madear, na pinarbagah ni Jahowa Naibata nasiam bani nasiam, sonai ma pasogopon ni Jahowa bani nasiam haganupan hamagouan, paima siap tumang nasiam bahenon-Ni hun tanoh na madear on, na dob binere ni Jahowa Naibata nasiam bani nasiam,

¹⁶anggo ilaosi nasiam padan ni Jahowa Naibata nasiam, na dob tinonahkon-Ni bani nasiam, gabe laho nasiam mambalosi naibata na legan, anjaha marsombah nasiam hujai, jadi gajag ma ringis ni Jahowa bani nasiam, anjaha podas ma nasiam agouon-Ni hun tanoh na madear, na dob binerehon-Ni bani nasiam.”