Read Batak Simalungun 1 TIMOTEUS 3 Bible Online

1 TIMOTEUS 3 - Batak Simalungun bible

1 TIMOTEUS 3

¹Hata na sintong do on, “Halak na sihol gabe parmahan ibagas kuria, sipindahi horja na madear do ai. [27]

²Halani ai, ia parmahan ibagas kuria, ulang ma adong sihataon bani, pargotong ni sada naboru, torang maruhur, pandei, hormat marparlahou, sipartamuei, na pandei mangajari, [28]

³ulang parminum, ulang parringis, tapi parlamlam ma, ulang siparingor, anjaha ulang simata duit.

⁴Halak na pandei mangatur rumah tanggani ma ai, pardakdanak sibalosi ajar, hormat ibagas haganup. [29]

⁵Ai anggo seng ibotoh manrajai rumah tanggani, sonaha ma boi ia patorsahon kuria ni Naibata?

⁶Ulang ma halak na baru masuk Kristen, ase ulang gabe gijang uhurni jadi madabuh hubagas uhum ni sibolis.

⁷Maningon dear baritani bani halak pardarat, ulang madabuh ia jadi sirisaon ampa hubagas siding ni sibolis.” [30]

⁸Sonai homa siparugas maningon hormat do, seng sipardua hata, seng parminum, seng simata duit. [31]

⁹Maningon marsijoloman sidea bani rusia ni haporsayaon in ibagas panggora ni uhur na borsih.

¹⁰Maningon siujion do homa lobei sidea; dob torang nani, seng dong sihataon bani sidea, ai pe ase boi sidea gabe siparugas.

¹¹Sonai homa parinangon ni sidea maningon hormat do, ulang sihata-hatai hasoman, torang maruhur anjaha bujur bani haganup. [32]

¹²Ia siparugas, maningon paramangon ni sada naboru do, na mambotoh manrajai anakni ampa rumah tanggani. [33]

¹³Sidalankon horja parugason ai dear-dear, tontu lambin marsangap do, anjaha lambin martenger ni uhur ibagas haporsayaon bani Kristus Jesus.

¹⁴Mangarap do ahu, podas do ahu roh marayak ham, tapi husuratkon do on bamu, ase,

¹⁵porini hun dokah ahu roh, gabe ibotoh ham sonaha patut marparlahou ibagas Rumah ni Naibata, in ma kuria ni Naibata na manggoluh in, tiang ampa onjolan ni hasintongan in. [34]

¹⁶ Banggal do tongon rusia ni hadaulaton in, domma talar ibagas daging, iparhatongon hapintoronni marhitei Tonduy, taridah bani malekat, iambilankon bani sipajuh begu-begu, ihaporsayai i dunia on, tarangkat hu hasangapon. [35]