Read Batak Simalungun 2 TIMOTEUS 3 Bible Online

2 TIMOTEUS 3 - Batak Simalungun bible

2 TIMOTEUS 3

¹Tapi botoh ma, na roh ma ari hasunsahan bani panorang parpudi. [31]

²Ai mangkaholongi dirini ma jolma ijai, paruhur duit, parhata toal, paruhur gijang, panrisai, seng pambalosi bani na matorasni, na so mambotoh martarima kasih, parhabutakon, [32]

³seng parholong, na so ra mardear, na so ra mardamei, sipanukas-nukasi, seng ibotoh mangorom, parringis-ringis, magigi bani na madear,

⁴sipartahi-tahi, na hampung maruhur, na pajuntul-juntulhon diri, na holongan bani hisap ni daging ase bani Naibata. [33]

⁵Songon-songon na daulat do sidea, tapi iparnalang sidea do gogoh ni ai. Ai pe simbili ma sisonai ai. [34]

⁶Halak sisonai do na ra marponop-ponop mammasuki rumah ni halak, mandormai naboru, na dob boratan ibahen dousa, na niarsik-arsik ni bagei ni hisap-hisap, [35]

⁷na tongtong marlajar, tapi lanjar seng boi mananda hasintongan in.

⁸Songon si Jannes ampa si Jamberes panlawan bani si Musa, sonai do homa sidea panlawan bani hasintongan in, ai ma halak, na dob seda pingkiranni anjaha na talu ibagas haporsayaon. [36]

⁹Tapi seng anjai tarpasaud sidea ai torus, ai idahon ni ganup halak do haotoon ni sidea ai, songon na bani sidea halak ondi.

¹⁰Tapi iihutkon ham do ahu bani podah, parlahou, tujuan, haporsayaon lumbang ni uhur, holong ampa hasabaron,

¹¹bani parburuon, sitaronon, na mangonai bangku i Antiokia, Ikonium ampa Listra. Ai ma pangayak-ayakon na hutaron, tapi ipaluah Tuhan in do ahu humbani haganupan in, [37]

¹² tapi sagala na sihol daulat marparlahou ibagas Kristus Jesus, hona parburu do. [38]

¹³Ia halak parjahat ampa sipangoto-otoi sai na lambin jahat do, na mangoto-otoi do sidea anjaha hona oto-otoan. [39]

¹⁴Tapi anggo ham, totap ma ham bani na dob ginuruhonmu ampa na hinaporsayaanmu, ai ibotoh ham do ise na mangajarhonsi bamu, [40]

¹⁵anjaha ibotoh ham do humbani haetek-etekonmu nari, Surat Na Pansing in do, na margogoh papentarhon ham, ase marulih ham bani haluahon marhitei haporsayaon bani Kristus Jesus. [41]

¹⁶ Ai sagala Surat in sinahapkon ni Naibata do, anjaha marguna mamodahi, maminsang, pauli-ulihon ampa manogu-nogu hu hapintoron, [42]

¹⁷ ase gokan dear siminik ni Naibata, mangasup bani sagala horja na madear.