Read Batak Simalungun TITUS 2 Bible Online

TITUS 2 - Batak Simalungun bible

TITUS 2

¹Tapi anggo ham, hatahon ma na domu hubani pangajaran na pintor in. [10]

²Ojur ma dalahi na matua maruhur na torang, daulat, porman, sintong ibagas haporsayaon, ibagas holong pakon ibagas hasabaron. [11]

³Sonai homa naboru na matua, marparlahou ma sidea songon halak na mapansing, ulang sipanukas, ulang homa hatagihan bani anggur, tapi sipodahkon na madear ma, [12]

⁴ase tartogu-togu sidea naboru na poso ope mangkaholongi paramangonni ampa dakdanakni,

⁵porman, sopan, bujur mamorluhon horja i rumah, unduk dompak paramangonni bei, ase ulang hona risa hata ni Naibata.

⁶Podahi homa dalahi na maposo, ase marhahormaton.

⁷Ia ham, ibagas haganup, maningon sitiruan ma ibagas horja na madear, pitah anjaha ringgas bani pangajarion; [13]

⁸sihatahon podah na sintong, na seng dong sihataon, ase maila sipanlawan ai, halani seng dong na bajan sihatahononni dompak hita. [14]

⁹Jabolon pe maningon balosanni do tuanni, pamalasonni uhurni ibagas haganup, ulang manlawan-lawan, [15]

¹⁰ulang manangko, tapi ipatuduhkon ma haganup habujuron, ase marsangap pangajaran na humbani Naibata, Sipaluah hita, ibagas haganup.

¹¹ Ai domma mulgap idop ni uhur ni Naibata bahen haluahon ni haganup jolma.

¹² Iajari do hita marhiteihon idop ni uhur-Ni marnalangkon uhur na so daulat ampa hisap-hisap dunia on, ase iparlahouhon hita hapormanon, hapintoron, ampa hadaulaton i dunia on, [16]

¹³ sanggah na paima-imahon hita bani hatuahon na niarapkonta in pakon partalar ni hamuliaon ni Naibata na banggal in ampa Kristus Jesus, Sipaluah hita, [17]

¹⁴ na mamberehon diri-Ni mangkopkop hita, laho manobus hita humbani haganup hajahaton, anjaha urason-Ni bani diri-Ni sada bangsa, ase Ia simadasi, na mangkaringgaskon sagala horja na madear. [18]

¹⁵In ma hatahon, podahkon anjaha akimkon hubani halak humbani gok ni uhurmu. Ulang ma dong na mapas bam. [19]